زاڭعار تۇلعا, ۇلى جازۋشى مۇحتار اۋەزوۆتىڭ تۋعان كۇنى بيىل وسكەمەندە وزگەشە مەرەكەلەندى. 28 قىركۇيەك كۇنى شاھارداعى قالامگەر اتىنداعى كوشەدە وبلىس ورتالىعىنداعى بارلىق كىتاپحانالارىنىڭ قاتىسۋىمەن جالپىقالالىق كىتاپحانالىق اكتسيا ۇيىمداستىرىلدى.
بۇل كۇنى م.اۋەزوۆ داڭعىلى بويىندا بەينە جانە اۋديو-جارناما جۇمىس ىستەپ, اۆتوبۋس ايالدامالارىندا مەرەكەلىك كىتاپ كورمەلەرى مەن شولۋلارى, ادەبي «ورىندىقتار», مانەرلەپ وقۋ, جازۋشى شىعارماشىلىعى بويىنشا تالقىلاۋلار مەن ۆيكتورينالار ۇيىمداستىرىلدى. قالا تۇرعىندارى «اۋەزوۆ جولىمەن» كىتاپ GPS-نە قاتىسىپ, جازۋشى ءومىربايانى, شىعارمالارى, داڭعىلعا ونىڭ ەسىمىنىڭ بەرىلۋى جايىنداعى, وزگە دە قىزىقتى عيماراتتارعا قانىقتى.
ا.پۋشكين اتىنداعى وبلىستىق كىتاپحانا QR-كىتاپحانا مەن Uni Library ءموبيلدى وقۋ زالى قىزمەتىن ۇسىندى. كىتاپحانا سايتىندا ورنالاسقان ونلاين نۇسقاسى بار ينتەراكتيۆتى ۆيكتورينا (http://kray.pushkinlibrary.kz) جەرلەسىمىزدىڭ شىعارماشىلىعى تۋرالى تۇرعىنداردىڭ ءبىلىمىن تەكسەرۋگە تاماشا مۇمكىندىك بەردى. وبلىستىق مامانداندىرىلعان كىتاپحانا زاعيپ جانە ناشار كورەتىن ادامدارعا ارناپ ءوز باعدارلاماسىن ۇيىمداستىردى. م.اۋەزوۆ داڭعىلى بويىمەن جۇرەتىن مارشرۋتتىق اۆتوبۋس جولاۋشىلارى دا نازاردان تىس قالمادى. ەڭ بەلسەندى جولاۋشىلار ىنتالاندىرۋ سىيلىقتارىمەن ماراپاتتالدى.
ء«بىز مۇحتار اۋەزوۆ شىعارمالارىن قازاق جانە ورىس تىلدەرىندە دە وقيمىز. مەن بۇگىن وزىممەن بىرگە 9-سىنىپتىڭ وقۋشىلارىن ەرتىپ كەلدىم. بۇل مەكتەپكە ەكى جىلدان بەرگى جۇمىس ىستەگەن ۋاقىتىمدا بالالاردىڭ كىتاپتى از وقيتىنىن اڭعاردىم. بۇل – ءبىزدىڭ قالاعا, وبلىسقا عانا ەمەس, ەلىمىزگە, بۇكىل الەمگە ورتاق پروبلەما دەپ ويلايمىن. قازىرگى وقۋشىلار كىتاپتى ينتەرنەت ارقىلى وقيدى. مەن وقۋشىلارىما مۇحتار اۋەزوۆتىڭ كىتابىن وقۋ قاجەتتىگىن ايتقانىمدا بىردەن عالامتورعا ەنىپ, وقي جونەلدى. بۇل جاعداي ءبىر جاعىنان كوڭىلگە كىربىڭ تۇسىرگەنىمەن, زامان تالابىنا قارسى تۇرا المايمىز. ەڭ باستىسى, كىتاپ وقۋعا دەگەن قۇلشىنىستارى تومەندەمەسە دەيمىز», - دەيدى قالاداعى № 18 مەكتەپتىڭ كىتاپحاناسىنىڭ مەڭگەرۋشىسى ۆالەنتينا يۆانوۆا.
ازامات قاسىم,
«ەگەمەن قازاقستان»
وسكەمەن