وتاندىق بايلانىس جۇيەسى دەگەندە حالىقتىڭ جادىندا جاتتالىپ قالعان, ويىنا بىردەن ورالا كەتەتىن وردالى شاڭىراق – «قازاقتەلەكوم».
وسى كومپانيا – ەگەمەندىك العان ەڭسەلى تۇستان باستاپ, ءتىپتى وعان دەيىن دە حالىققا قالتقىسىز قىزمەت ەتىپ كەلە جاتقان تەلەكوممۋنيكاتسيا سالاسىنداعى تەگەۋرىندى ۇجىم. مەكەمەنىڭ قىسقاشا تاريحىنا ۇڭىلسەك اتاسىنان نەمەرەسىنە دەيىن وسى جەردە قىزمەت ىستەپ كوكتەپ وتىرعان اۋلەتتەر كوپتەپ كەزدەسەدى. بۇل ءوز كەزەگىندە «قازاقتەلەكوم» شاڭىراعىنىڭ ۇرپاقتار ساباقتاستىعىن جالعايتىن التىن كوپىرگە اينالعانىن اڭعارتسا كەرەك. تامىرى مەن تاريحى تەرەڭدە جاتقان كومپانيانىڭ ەل دامۋىنداعى الار ۇلەسى اۋقىمدى.
كومپانيادا كادر الەۋەتتىلىگى, تەحنولوگيالىق مۇمكىندىكتەر, ستراتەگيالىق مىندەتتەردى دۇرىس جوسپارلاۋ, قىزمەت تۇرلەرىن وڭتايلاندىرۋ سياقتى نەگىزگى جۇمىستاردىڭ بارلىعى جۇيەلى تۇردە جولعا قويىلعان. ەلىمىزدىڭ بارلىق وڭىرىندەگى بولىمشەلەرى بۇقارا حالىققا بايلانىس سالاسىنىڭ بارلىق تالاپتارىنا ساي قىزمەت كورسەتەدى. كومپانيا وتاندىق اقپاراتتىق كوممۋنيكاتسيا نارىعىن دامىتۋ ساياساتىن ىسكە اسىرا وتىرىپ, الەمدىك ستاندارتتارعا جاۋاپ بەرەتىن جوعارى تەحنولوگيالى ينفراقۇرىلىم جۇيەسىن قۇردى. ءبىر ايتا كەتەرلىگى, اتالعان قوعامدا ترانسفورماتسيا باعدارلاماسى اياسىندا اۋقىمدى ىستەر اتقارىلىپ كەلەدى. ەلباسى قولداۋىمەن باستاۋ العان باعدارلامانىڭ ەل ەكونوميكاسىنا تيگىزەر پايداسى مول ەكەنى ايتپاسا دا تۇسىنىكتى. بۇل ۇزاق مەرزىمدى پروتسەسس 2050 جىلعا دەيىن ەلىمىزدىڭ ەڭ دامىعان 30 ەلدىڭ قاتارىنا قوسىلۋىنا ىقپال ەتەدى. وسىنداي الەمنىڭ جەتەكشى ەلدەرىندە جۇزەگە اسىرىلعان جوبانىڭ ەلىمىزدە تىڭ تىنىس الىپ, كەڭگە قانات جايىپ كەلە جاتقانى كوڭىل قۋانتادى. زامان جىلجىپ, ۋاقىت سىرعىعان سايىن ءار سالانىڭ جاڭاشا سيپاتتا دامىپ وتىراتىنى بەلگىلى. وسى رەتتە اتالعان ۇجىم كەز كەلگەن سۇرانىسقا جاۋاپ بەرە الاتىن زامانعا ساي, باسەكەگە قابىلەتتىلىگىمەن حالىقتىڭ سەنىم ۇدەسىنەن شىعىپ كەلەدى. كومپانيا قىزمەتكەرلەرى بۇل تۇرعىدا مەكەمەنىڭ ەجەلدەن قالىپتاسقان ءداستۇرلى جولىن بەرىك ۇستاۋدى نازاردان تىس قالدىرعان ەمەس.
– «تەلەكوممۋنيكاتسيا سالاسى وتە جىلدام ءارى قارقىندى وزگەرىس ۇستىندە, ۋاقىت وتكەن سايىن باسەكەلەستىك تالاپتارى كۇشەيىپ كەلەدى جانە جاڭا ويىنشىلار قاتارى دا كوپتەپ سانالادى. سول سەبەپتى وسىنداي جاعدايدا بىزگە نەعۇرلىم جىلدام ءارى يكەمدى بولۋ قاجەت, ياعني كومپانيانىڭ ۇيىمدىق مودەلى وزگەرۋى ءتيىس. ءبىز ءوز ابونەنتتەرىمىزدىڭ ۇسىنىستارىنا بارىنشا شۇعىل ارەكەت ەتۋىمىز كەرەك. كومپانيانىڭ جاڭارتىلعان ستراتەگياسىن ءتۇسىندىرۋ, سونىمەن قاتار «قازاقتەلەكوم» اق الداعى ترانسفورماتسيالاۋ جونىندەگى ستراتەگيالارى مەن جوسپارلارىنىڭ نەگىزگى ەرەجەلەرىن تالقىلاۋ مەن ۇسىنىستاردى جيناۋ ءۇشىن قىزمەتكەرلەرمەن كەرى بايلانىستى ۇيىمداستىرۋ ماقساتىندا تۇراقتى تۇردە جۇمىس ۇجىمدارىمەن كوممۋنيكاتسيالىق توپ-مەنەدجمەنت سەسسيالارى وتكىزىلۋدە. ترانسفورماتسيا بارىسىن ءتۇسىندىرۋ جونىندە جۇمىستار جۇرگىزىلىپ, ۇجىمعا الداعى جوسپارلار جەتكىزىلىپ, وسىعان سايكەس كومپانيا بىرتە-بىرتە وزگەرەتىن بولادى. اتقارىلعان جۇمىس ناتيجەسى بويىنشا قىزمەتكەرلەردىڭ باسىم بولىگى ترانسفورماتسيالاۋدى كومپانيانىڭ الداعى بولاشاقتا دامۋىنىڭ بىرەگەي مۇمكىندىگى دەپ قابىلدايدى. توپ-مەنەدجەرلەردىڭ قاتىسۋىمەن وتكىزىلەتىن كوممۋنيكاتسيالىق سەسسيالار بارىسىندا بيزنەس-ۇدەرىستەردى جەتىلدىرۋ بويىنشا ۇسىنىستار قارالۋدا. ۇيىمنىڭ بارلىق دەڭگەيىندەگى ءبىزدىڭ قىزمەتكەرلەر ورتالىق كەڭسەدەن باستاپ, وڭىرلىك بولىمشەلەرگە دەيىن وزگەرىستەر قاجەتتىلىگىن ءتۇسىنىپ, ولارعا بەلسەندى تۇردە اتسالىسۋدا. كومپانيانىڭ جاڭارتىلعان ستراتەگياسىنىڭ ارقاسىندا, ءبىز سەنىممەن العا قاراي ۇمتىلىپ, كوزدەگەن ماقساتتارعا تابىستى قول جەتكىزىپ, قويىلعان مىندەتتەردى ويداعىداي ورىنداپ كەلەمىز», – دەيدى «الماتىتەلەكوم» ءوتد باس ديرەكتورى شەرحان رازدىقوۆ.
جوعارىدا ايتىلعان جاڭا ستراتەگيالىق جوسپار كومپانيانىڭ جاڭاشا دامۋىنا جول اشپاق. ول ءۇشىن حالىققا قىزمەت كورسەتۋدەگى ءاربىر كىشكەنتاي ەلەمەنتكە دەيىن جان-جاقتى ساراپتان وتكەن. 2014 جىلدان باستاپ قولعا الىنعان «ورلەۋ» جاڭعىرتۋ باعدارلاماسى وسىنىڭ ايقىن دالەلى. بۇل جوبانىڭ نەگىزگى ماقساتى نارىقتاعى كوشباسشى ورىندى نىعايتا تۇسۋگە باعىتتالعان. باعدارلاما كۇشىنە ەنگەننەن بەرى كومپانيا ەلەۋلى جەتىستىكتەرگە قول جەتكىزگەن. سونىڭ ناتيجەسىندە ابونەنتتىك بازا مولشەرى ۇلعايىپ, قىزمەت كورسەتۋ ساپاسى ارتا تۇسكەن. وسىعان وراي توپتامالىق ۇسىنىستار تىزبەگى قالىپتاسىپ, تەك بايلانىس قانا ەمەس, اقپاراتتىق تەحنولوگيالار ارناسىنداعى قاجەتتىلىكتى جاباتىن تۇتىنۋشىلارعا تىڭ ءونىم تۇرلەرىن ۇسىنۋعا جول اشىلعان.
قاي سالادا بولماسىن جەتىستىككە قول جەتكىزۋدىڭ باستى قاعيداسى تەرەڭ ءبىلىم مەن كاسىبي شەبەرلىك. ياعني, سالانى العا سۇيرەيتىن ساپالى كادر. سەبەبى, ءوز جۇمىسىن شىن ىقىلاسىمەن جاقسى كورەتىن مامان عانا ەڭبەك جولىندا بارلىق قاجىر-قايراتىن, ءبىلىم-بىلىگىن اياماي ماقساتقا جەتۋدە تاباندى تۇردە قىزمەت ەتەدى. بار ءومىرىن وسى ىرگەلى شاڭىراقتىڭ تاسىن ورگە دومالاتۋعا ارناعان تالاي ازاماتتاردىڭ ارتىنان ەرگەن ۇل-قىزدارى اتا-اناسىن ۇلگى تۇتىپ, وسى كاسىپتى تاڭداپ, ءومىرىن اتا-اناسىنىڭ تەرى سىڭگەن, وزدەرى ءۇشىن قاستەرلى سانالاتىن شاڭىراقپەن بايلانىستىرعان. كەيىننەن ول قىزمەتكەرلەردىڭ ۇرپاقتارى دا اتا-اجەنىڭ ۇلاعاتتى جولىن جالعاپ, وسى كاسىپتىڭ يەسى اتانىپ, «قازاقتەلەكوم» قازانىندا قايناعان. «قازاقتەلەكومنىڭ» ەل اۋماعىنداعى بارلىق بولىمشەلەرىنىڭ قىزمەتكەرلەر تاريحىنا كوز جۇگىرتسەڭىز, قاي وڭىردە بولماسىن ءۇرىم-بۇتاعىمەن ومىرلەرىن وسى مەكەمەمەن بايلانىستىرعان وتباسىلار جەتىپ ارتىلادى. اتادان بالاعا ميراس بولعان بۇل جالعاستىقتى كەزدەيسوقتىق دەپ ايتا المايسىز.
قولىمىزعا تۇسكەن مالىمەتتەردى سارالاي كەلە, مۇندا ەڭبەك ەتكەن اۋلەتتەردىڭ جالپى ەڭبەك ءوتىلى بەس مىڭ جىلدى قۇرايتىنىن كورىپ تاڭ-تاماشا بولدىق. اتادان بالاعا, ۇرپاقتان-ۇرپاققا جالعاسقان وسى كوش-كەرۋەن ءبۇتىن ءبىر جۇيەنىڭ اياعىنا نىق تۇرۋىنا قاجىر-قايراتىن ارناعان تۇلعالاردىڭ ومىرىمەن استاسىپ جاتىر. تىنىمسىز توككەن تەر, ورتاق مۇرات, وتباسى مۇشەلەرىن ودان سايىن تىعىز بايلانىستىرا تۇسەتىن ورتاق كاسىپ ۇلكەن تاجىريبەنىڭ قاينار بۇلاعىنا اينالىپ مول جەتىستىكتەرگە جول اشادى. وسىنىڭ بارلىعى ءبىر-بىرىمەن بىتە قايناسىپ وتباسىلىق قاستەرلى قۇندىلىققا اينالادى. جاۋاپكەرشىلىك ارتىپ, اكە كاسىبىنە ادالدىق تانىتۋ كەرەك دەگەن تۇسىنىك تۋىندايدى. مامانداردىڭ ايتۋىنشا, ۇرپاقتار ساباقتاستىعىن جالعاپ, ءبىر مەكەمەدە ۇزاق ەڭبەك ەتكەن اۋلەتتەر باسقالارعا قاراعاندا كاسىبىنە قۇرمەتپەن قارايدى. اتا-اناسىنىڭ, تۋىستارىنىڭ توككەن تەرى مەن تابىستى جولىن جالعاي وتىرىپ, وعان داق تۇسىرمەۋگە تىرىسادى. وسىلايشا, ەڭبەك ونىمدىلىگى كوبەيىپ, كومپانيانىڭ الەۋەتى ارتا تۇسەدى. وسىنىڭ بارلىعىن نازاردان تىس قالدىرماي, ەلەپ-ەسكەرىپ, قىزمەتكەرلەرىنىڭ وتباسىلىق قۇندىلىقتارىن جوعارى باعالايتىن مەكەمەدە ۇرپاقتار ساباقتاستىعى جالعاسا بەرۋى زاڭدى دا. قىزمەتكەرلەرىنە ەرەكشە قۇرمەتپەن قارايتىن كومپانيا سوڭعى جىلدارى وتباسى كۇنىنە وراي مەكەمەنىڭ ورىستەۋىنە ەلەۋلى ۇلەس قوسقان اۋلەتتەردى ماراپاتتاۋدى داستۇرگە اينالدىرىپ كەلەدى. بۇل ءوز كەزەگىندە ازاماتتاردىڭ ايبىنىن اسقاقتاتا تۇسەدى. ەلباسى نۇرسۇلتان نازارباەۆ ءوز جولداۋىندا ء«بىز بولاشاققا كوز تىگىپ, تاۋەلسىز ەلىمىزدى «ماڭگىلىك ەل» ەتۋدى مۇرات قىلدىق. «قازاقستان-2050» ستراتەگياسى وسىناۋ ماڭگىلىك جولداعى بۋىندار بىرلىگىنىڭ, ۇرپاقتار ساباقتاستىعىنىڭ كورىنىسى», دەگەن ەدى. وتاندى ءسۇيۋ ەرلىكپەن عانا ولشەنبەيدى. ءار ادام ءوز كاسىبىنىڭ شەبەرى, ءوز سالاسىنىڭ جاناشىرى بولسا ودان ارتىق سۇيىسپەنشىلىك جوق. ءوز ىسىڭە دەگەن سۇيىسپەنشىلىك – ۇلكەن جەتىستىكتىڭ قاقپاسى. ال, ۇلكەن جەتىستىكتەر جيىنتىعى قوعامدى العا جەتەلەيدى. قوعامعا قالتقىسىز قىزمەت ەتىپ, بايلانىس سالاسىنىڭ بارلىق كەڭىستىگىندە شەبەرلىگىمەن شىڭدالعانداردىڭ ساپىنان قازاقتەلەكومدىقتاردىڭ قاجىرلى ەڭبەگىن ايتۋعا بولادى.
«قازاقتەلەكوم» اق ۋاقىت كوشىنە ساي قالىپتاسقان يگى داستۇرلەرىن ساقتاي وتىرىپ دامىپ كەلەدى. جىل سايىن قىزمەت كورسەتۋ اياسى كەڭىپ, تەحنولوگيالىق ۇدەرىستەردى جاقسارتۋ مەن تەحنولوگيالاردى جاڭارتۋ بويىنشا كەشەندى جۇمىستار جۇرگىزىلۋدە. زاماناۋي نارىق تالاپتارى كۇن سايىن بايلانىس سالاسىنا وزگەرىس اكەلىپ, بيزنەس-ورتا تالاپتارى كۇردەلەنە تۇسكەنىمەن, اتى اڭىزعا اينالعان مەكەمە ءوز بيىگىنەن تۇسكەن جوق. الداعى ۋاقىتتا دا تەگەۋرىندى كومپانيا ەگەمەندىكپەن بىرگە جاساپ ەل يگىلىگى جولىندا جاڭا بەلەستەردى باعىندىرا بەرەتىنىنە سەنەمىز.
ارمان وكتيابر, «ەگەمەن قازاقستان»