بۇگىن استاناداعى بوكس كەشى مەيىرىم نۇرسۇلتانوۆ (3-0, 2كو) پەن يسماەل بۋەنو (15-6-0, 10 كو) اراسىنداعى جەكپە-جەكتەن باستالدى, دەپ xابارلايدى قازاقپارات
ءبىرىنشى راۋندتىڭ باسىندا ەكى بوكسشى ءبىر-ءبىرىن زەرتتەپ كوردى. الايدا مەيىرىم نۇرسۇلتانوۆ ۇزاققا سوزباي, ءوز دجەبتەرىن دە, اپپەركوتتارىن دىتتەگەن جەرىنە جەتكىزە ءبىلدى. مەيىرىمنىڭ شابۋىلى قارقىندى بولعانى سونشا, برازيليالىق بوكسشى رينگتىڭ سىرتىنا ۇشىپ كەتتى. سول كۇيى ۇزاق تۇرا المادى. وسىلايشا, قازاقستاندىق بوكسشى كەزەكتى جەكپە-جەگىن نوكاۋتپەن اياقتاپ وتىر.
"نەگىزى, بۇل جەكپە-جەككە قاتتى دايىندالدىم. بىراق كەزدەسۋ تەز اياقتالدى. تەز بىتكەنى دە جاقسى. قارسىلاسىمدى زەرتتەدىك. عالامتوردا جەكپە-جەكتەرى از. بىرەۋىن تاۋىپ زەرتتەدىك", - دەيدى مەيىرىم نۇرسۇلتانوۆ.
ونىڭ ايتۋىنشا, كەلەسى جەكپە-جەگى 24 قازاندا نيۋ-يورك قالاسىندا وتەدى. بوكسشى وعان اقش-تا دايىندالادى.
ايتا كەتەيىك, بۇگىنگى بوكس كەشىنىڭ باستى جەكپە-جەگىندە قانات يسلام (24-0, 19كو) كانادالىق برەندون كۋككە (18-0, 11كو) قارسى شىعادى. ولار ءبىرىنشى ورتا سالماقتاعى WBA Inter-Continental جانە WBO-NABO نۇسقاسىنىڭ چەمپيوندىق اتاقتارىن ساراپقا سالاتىن بولادى. بوكس كەشىن «Qazsport» تەلەارناسى تىكەلەي ەفيردە كورسەتىپ جاتىر. 20:00-گە «Qazaqstan» ۇلتتىق ارناسى دا تىكەلەي ەفيرگە شىعادى. بۇدان بولەك, Fite.tv ينتەرنەت ارناسى, سونداي-اق TVtibi مەن Flipps ارقىلى تىكەلەي رەپورتاجدار جۇرىگىزىلەدى.