وڭتۇستىك قازاقستان وبلىستىق ەڭبەك ينسپەكتسياسى باسقارماسىنا جاڭا باسشى تاعايىندالدى.
وبلىس اكىمىنىڭ وكىمىمەن اتالعان باسقارمانىڭ باسشىسى ءارى وڭتۇستىك قازاقستان وبلىسىنىڭ باس مەملەكەتتىك ەڭبەك ينسپەكتورى لاۋازىمىنا الماسبەك كەڭەسبەك ۇلى مامىتبەكوۆ تاعايىندالدى.
الماسبەك كەڭەسبەك ۇلى بۇعان دەيىن ورداباسى اۋدانىنىڭ اكىمى قىزمەتىن اتقارعان بولاتىن. ايتا كەتەيىك, الماسبەك مامىتبەكوۆ 1969 جىلى تۋعان, ءبىلىمى جوعارى, ماماندىعى - گەوگرافيا جانە بيولوگيا پاندەرىنىڭ وقىتۋشىسى, ەكونوميكا جانە بيزنەس باكالاۆرى.
ەڭبەك جولىن 1984 جىلى شىمكەنت وبلىسى تۇلكىباس اۋدانىنىڭ قۇس فابريكاسىنىڭ ەلەكترومونتەرى رەتىندە باستاعان. مەملەكەتتىك قىزمەتتى 1996 جىلى شىمكەنت قالالىق جاستار ءىسى, تۋريزم جانە سپورت باسقارماسىنىڭ مامانى لاۋازىمىنان باستاعان.
2005-2016 جىلدارى وڭتۇستىك قازاقستان وبلىسى ىشكى ساياسات دەپارتامەنتى ديرەكتورىنىڭ ورىنباسارى, وڭتۇستىك قازاقستان وبلىسى تۇلكىباس اۋدانى اكىمىنىڭ ورىنباسارى, وڭتۇستىك قازاقستان وبلىسى ىشكى ساياسات باسقارماسىنىڭ باستىعى, وڭتۇستىك قازاقستان وبلىسى اكىمى اپپاراتىنىڭ ۇيىمداستىرۋ-ينسپەكتورلىق بولىمىندەگى وبلىس اكىمىنىڭ باس ينسپەكتورى, «نۇر-وتان» پارتياسىنىڭ وڭتۇستىك قازاقستان وبلىسى بويىنشا فيليالى توراعاسىنىڭ ورىنباسارى جانە ءبىرىنشى ورىنباسارى, وڭتۇستىك قازاقستان وبلىسى اكىمى اپپاراتى ءباسپاسوز قىزمەتىنىڭ باسشىسى, وڭتۇستىك قازاقستان وبلىسى ىشكى ساياسات جانە ءدىن ىستەرى باسقارماسىنىڭ, ىشكى ساياسات باسقارماسىنىڭ باسشىسى لاۋازىمدارىن اتقارعان.