بۇگىن ۆەنگريا استاناسى بۋداپەشت قالاسىندا دزيۋدودان الەم چەمپيوناتىنىڭ جالاۋى جەلبىرەيدى. جىلدىڭ ەڭ ماڭىزدى دوداسىنا دۇنيە ءجۇزىنىڭ 64 ەلىنەن كەلگەن 428 دزيۋدوشى قاتىسادى. قازاقستان ۇلتتىق قۇراماسى ساپىندا 17 دزيۋدوشى ەل نامىسىن قورعايدى. وسى بايراقتى باسەكە الدىندا دزيۋدودان ۇلتتىق قۇرامانىڭ باس باپكەرى ەرمەك يمامبەكوۆكە حابارلاسىپ, شاكىرتتەرىنىڭ ءدۇبىرلى دوداعا دايىندىعىن سۇراعان بولاتىنبىز.
– ۆەنگرياعا 19 تامىز كۇنى ۇشىپ كەلدىك. استانا مەن بۋداپەشت اراسىنداعى ۋاقىت ايىرماشىلىعى ءتورت ساعات. سپورتشىلارىمىزدىڭ جارىس ۋاقىتىندا وزدەرىن قولايسىز سەزىنبەس ءۇشىن, ۋاقىت ايىرماشىلىعى مەن كۇن رايىنا الدىن الا بەيىمدەلۋ ماقساتىندا جارىس بولاتىن ەلگە ەرتە كەلدىك. سونداي-اق, الەم چەمپيوناتى الدىنداعى سوڭعى وقۋ-جاتتىعۋ جۇمىستارىن دا وسى ەلدە وتكىزدىك. ۆەنگريادا ارمەنيا, يوردانيا, ۆەتنام, كۋبا, قىرعىزستان ەلدەرىنىڭ سپورتشىلارىمەن بىرگە سەگىز كۇندىك جاتتىعۋ جۇمىستارىن اياقتاپ, سپورتشىلارىمىزدىڭ پسيحولوگيالىق دايىندىعىن پىسىقتادىق. باستىسى, دزيۋدوشىلارىمىز جاراقاتتان ءدىن امان, – دەدى ە.يمامبەكوۆ.
– الەم چەمپيونى ەلدوس سمەتوۆتىڭ وسى الەم بىرىنشىلىگىنە دايىندىعى تۋرالى نە ايتاسىز؟
– ەلدوس سمەتوۆ ريو-2016 وليمپياداسىنان كەيىن اقپان ايىندا گەرمانيانىڭ ديۋسسەلدورف قالاسىندا وتكەن گران-پري تۋرنيرىندە ءساتسىز ونەر كورسەتتى. كەيىننەن جاراقات الىپ, ۇزاق ۋاقىت قۇراما ساپىنان شىعىپ قالعان بولاتىن. جاراقاتىنان ايىعىپ كەلگەن سوڭ, شىلدە ايىندا سااربريۋككەندە وتكەن ەۋروپانىڭ اشىق كۋبوگىندا «قولاعا» قول جەتكىزىپ, بابىندا ەكەنىن دالەلدەدى. قازىرگى تاڭدا بالۋانىمىزدىڭ جاعدايى جاقسى. وقۋ-جاتتىعۋ جۇمىستارىندا دا جاقسى كۇرەس كورسەتىپ, بابىندا ەكەنىن بايقاتتى.
– ەكى جىل بۇرىن ەلىمىزدە وتكەن الەم چەمپيوناتىندا ەكى مەدال يەلەنىپ ەدىك. بيىل دا وسى مەجەنى قايتالاي الامىز با؟
– بيىلعى الەم بىرىنشىلىگىندە ەرلەر قۇراماسىنان ەكى مەدال الۋدى جوسپارلاپ وتىرمىز. قۇرامامىزدا ەكى الەم چەمپيونى بار. ولار – ەلدوس سمەتوۆ (60 كگ) پەن ماكسيم راكوۆ (-100 كگ). وسى ەكى دزيۋدوشىمىز كوك تۋىمىزدى جەلبىرەتەدى دەپ ۇمىتتەنەمىز. باسقا سپورتشىلارىمىز دا وسال ەمەس. الايدا, بۇل جەرگە «سەن تۇر, مەن اتايىن» دەيتىن كىل مىقتىلار كەلەتىن بولعاندىقتان, سپورتشىلاردىڭ شاما-شارقىن باعامداعان دۇرىس. ارينە, مەدال سانى ءبىز ويلاعان شامادان اسىپ تۇسسە, نۇر ۇستىنە نۇر بولار ەدى. ارىق ايتىپ, سەمىز شىققانعا نە جەتسىن.
– بيىلعى دودا ەرەجەسىندە ازداعان وزگەرىستەر بار سياقتى. ولاردىڭ دزيۋدوشىلارعا دەگەن اسەرى قانداي بولادى دەپ ويلايسىز؟
– ءيا, جىل باسىندا حالىقارالىق دزيۋدو فەدەراتسياسى دزيۋدوداعى كەيبىر ەرەجەلەرگە وزگەرىس ەنگىزىپ, كوماندالىق سايىستى وليمپيا ويىندارىنا ەنگىزگەنىن حابارلادى. الداعى الەم بىرىنشىلىگى قاڭتاردا قابىلدانعان جاڭا ەرەجەلەر مەن تالاپتارعا ساي وتەدى. ماسەلەن, بۇرىن كوماندالىق سايىستا دزيۋدوشىلار بەس سالماق بويىنشا بەلدەسسە, قازىر ەرلەر – ءۇش, قىزدار ءۇش سالماقتا ءوزارا مىقتىنى انىقتايدى. تاعى ءبىر ەرەكشەلىك, وسى ۋاقىتقا دەيىن ەرلەر مەن ايەلدەر اراسىندا ەكى كوماندا جاساقتالىپ, جەرەبە بولەك-بولەك تارتىلسا, قازىر ءۇش ايەل جانە ءۇش ەر دزيۋدوشىدان تۇراتىن 6 ادامدىق ءبىر كوماندا بولىپ كۇرەسەدى. قازاقستان ەرلەر قۇراماسىنان كوماندالىق سايىسقا التى دزيۋدوشىنى دايىنداپ وتىرمىز. نەگىزگى قۇرامدا جانساي سماعۇلوۆ (73 كگ), يسلام بوزباەۆ (90 كگ) جانە بيىلعى «قازاقستان بارىسى» اتانعان ەلامان ەرعاليەۆ (+100 كگ) بار. ال قوسالقى قۇرامنان ەراسىل ساكەن ۇلى (73 كگ), ءازيز قالقامان ۇلى (90 كگ) جانە ەرجان شىنكەەۆ (+100 كگ) كۇرەسۋى مۇمكىن.
– اڭگىمەڭىزگە راحمەت. بالۋاندارىمىزعا ساتتىلىك تىلەيمىز.
ءالي بيتورە,
«ەگەمەن قزااقستان»