فينليانديادا ءبىلىم الۋعا مۇمكىندىك مولايدى

وتاندىق ءبىلىم جۇيەسىنىڭ دامۋىنا فين ەلىنىڭ دە ۇلەسى بار. بۇل ورايدا 2012 جىلدان بەرى ەلىمىزبەن تىعىز جۇمىس ىستەپ كەلە جاتقان KFEIG كونسورتسيۋمىن اتاۋعا بولادى. فينليانديانىڭ يۋۆياسكيۋليا, لاحتي جا­نە حيامە قالالارىنداعى ۋنيۆەرسيتەتتەر قا­زاقستاندىق ءبىلىم جۇيەسى ءۇشىن ماڭىزى زور يننوۆاتسيالىق جوبالاردى جۇزەگە اسىرۋدا. كونسورتسيۋم ەلىمىزدىڭ دەنساۋلىق ساق­تاۋ مي­نيسترلىگىنىڭ ارىپتەسى رەتىندە مە­دي­­تسي­نالىق ماماندىقتاردى, اسىرەسە, مەدبي­كە ءىسى, مەديتسينا ۋنيۆەرسيتەتتەرى مەن كول­لەد­جدەردەگى پەداگوگتاردىڭ بىلىكتىلىگىن كو­تە­رۋگە قىزمەت ەتەدى. 

2013 جىلدان باستاپ قازاقستاندىق مەد­بيكەلەردىڭ بىلىكتىلىك دەڭگەيىن كوتەرۋ ءۇشىن فين وقۋ ورىندارىمەن ارىپتەستىك باي­لانىس ورناعان بولسا, 2014 جىلى دۇنيە­جۇ­زىلىك بانك جوباسىنىڭ اياسىندا فين باع­دار­لاماسى بويىنشا باكالاۆر بىلىكتىلىگىن الۋ­عا قاناتقاقتى باعدارلاما دايارلاندى. يۋۆياسكيۋليا جانە لاحتي قالالارىنداعى ۋني­ۆەرسيتەتتەر استانا قالاسى اكىمدىگىنىڭ جو­عارى مەديتسينالىق كوللەدجىمەن, رەس­پۋب­ليكالىق مەديتسينالىق كوللەدجبەن (الماتى ق.) جانە تۇركىستان كوپسالالى جو­عا­رى مەديتسينالىق كوللەدجىمەن 2016-2019 جىل­دارعا كەلىسىمشارت ءتۇزىپ, ارىپتەستىك باي­لانىس ورناتقان. ودان بولەك فيندىك ارىپ­تەستەر ەلىمىزدە جانە فينليانديادا مەديتسي­نا سالاسى بويىنشا 40 شاقتى شەبەرلىك سى­نىپ­تارىن وتكىزگەن. وعان وسى سالانىڭ 700-دەن اسا پەداگوگتارى قاتىسقان. 

 شارا بارىسىندا ءسوز العان فينليانديا ما­دەنيەت جانە ءبىلىم ءمينيسترى سانني گران-لااسونەن حانىم فين ەلىندەگى ءبىلىم جۇيەسىنىڭ ارتىقشىلىقتارىنا توقتالدى. ەكىجاقتى ارىپتەستىكتىڭ جاقسى ناتيجە بەرەتىنىنە سەنىم ءبىلدىردى. سوڭعى بىرەر جىل كولەمىندە فينليانديانىڭ ءبىلىم سالاسىنىڭ تاعى دا ەكى قادام العا اتتاعانىن مالىمدەدى. 

سونىمەن, بۇل جولى يۋۆياسكيۋليا قول­دان­بالى عىلىمدار ۋنيۆەرسيتەتى مەن قا­زاق مەديتسينالىق ۇزدىكسىز ءبىلىم بەرۋ ۋني­ۆەرسيتەتى اراسىندا كەلىسىمشارتقا قول قوي­ىلدى. الدىن الا جوسپارلانعان بۇل كە­لى­سىمشارتقا سايكەس مەدبيكە ءىسى مامان­دى­عى بويىنشا ماگيستر دارەجەسىن الۋ ءۇشىن 20 شاقتى ادام الماتىدا17-18 تامىزدا ەمتيحان تاپسىرىپ, وقۋعا تۇسكەن. ولار ەكى ەلدىڭ دە ديپلومىنا يە بولماق. 

سونداي-اق, تاعى ءبىر كەلىسىمشارت يۋۆياسكيۋليا قولدانبالى عىلىمدار ۋنيۆەر­سي­تەتى, حيامە قولدانبالى عىلىمدار ۋني­ۆەر­سيتەتى مەن «نازارباەۆ زياتكەرلىك مەك­تەپتەرى» دەربەس ءبىلىم بەرۋ ۇيىمدارى ارا­­سىندا ءتۇزىلدى. «نازارباەۆ زياتكەرلىك مەكتەپتەرى» دببۇ باسقارما توراعاسىنىڭ ورىنباسارى سۆەتلانا ەسبوسىنوۆانىڭ ايتۋىنشا, فين ەلى باستاۋىش مەكتەپتە ءبىلىم بەرۋ مەن ورتا مەكتەپتە ءبىلىم بەرۋ ىسىنە قاتتى ما­ڭىز بەرەدى. سول سەبەپتى, بۇل ەلدە باستاۋىش مەكتەپتە بىرنەشە ءتىل بىلەتىن, ماگيستر دا­رەجەسى بار پەداگوگتار جۇمىس ىستەيدى. بۇل ورايدا, نازارباەۆ زياتكەرلىك مەكتەپتەرىنىڭ دە فين ەلىنەن ۇيرەنەرى از ەمەس. سۆەتلانا ەسبوسىنوۆا وسىنىڭ الدىندا ءبىرلى-جارىم ۇستازداردىڭ فين ەلىنەن وقىپ كەلگەنىن العا تارتتى. ەندىگى جەردە كەلىسىمشارتقا سايكەس, زياتكەرلىك مەكتەپتەردىڭ ۇستازدارىن فين ەلىندە وقىتۋ مۇمكىندىگى ارتپاق. 

ايگۇل سەيىل,

"ەگەمەن قازاقستان"