كوورپاراتيۆتىك كليەنتتەرمەن 7 جىل بويى تابىستى جۇمىس ىستەگەن سوڭ بانك يسلامدىق قارجى قۇرالدارىن جەكە تۇلعالارعا قولجەتىمدى ەتۋ ماقساتىمەن نارىقتىڭ جەكە تۇلعالارعا قىزمەت كورسەتۋ سالاسىنا شىقتى. زاماناۋي جانە جايلى ستيلدە راسىمدەلگەن كەڭسە حالىقارالىق دەڭگەيدەگى كليەنتتىك قىزمەت كورسەتۋدى كوزدەگەن. الداعى ۋاقىتتا بۇكىل ەل اۋماعى بويىنشا ونلاين-سەرۆيس ارقىلى قىزمەت كورسەتۋ جوسپارلانىپ وتىر. قازىرگى ۋاقىتتا بانك كليەنتتەرى دەپوزيت, كارتا ونىمدەرىن, كاسسالىق-ەسەپ ايىرىسۋ قىزمەتتەرىن پايدالانا الادى. بانك ۇسىناتىن ينۆەستيتسيالىق دەپوزيتتەر قازاقستان نارىعى ءۇشىن جاڭا جانە بىرەگەي ءونىم ەكەنىن ەسكەرگەن ءجون. كليەنتتەردىڭ قاجەتتىلىكتەرىن ەسكەرە كەلە, جۋىق ارادا جەكە تۇلعالاردى قارجىلاندىرۋ باعدارلاماسىن ىسكە قوسۋ جوسپارلانىپ وتىرعان كورىنەدى.
– قازاقستانداعى يسلامدىق قارجىلاندىرۋدىڭ ودان ارى دامي تۇسۋىنە جانە ونىڭ جەكە تۇلعالار ءۇشىن قولجەتىمدى بولۋىنا ىقپالداسۋ ماقساتىندا ءبىز جەكە تۇلعالارعا ارنالعان ونىمدەردى ىسكە قوسىپ, الماتىدا العاشقى فيليالىمىزدى اشتىق. يسلامدىق قارجىلاندىرۋ سەكتورى جىلىنا 15% وسىممەن, عالامدىق قارجىلىق جۇيەدەگى ەڭ جىلدام دامۋشى سالا بولىپ قالۋدا. قازاقستاندا يسلامدىق قارجىلاندىرۋدىڭ الەۋەتى زور. قازاقستانداعى يسلامدىق بانكينگ فلاگمانى رەتىندە ءبىز يسلامدىق قارجىلىق قۇرالداردىڭ ارتىقشىلىقتارىن ءتۇسىندىرىپ, ونىڭ وڭىردەگى بەچماركينگىن قۇرۋدى ماقسات ەتتىك. – دەيدى «Al Hilal» يسلام بانكى» اق باسقارما توراعاسى گوردون حاسكينس.
يسلامدىق بانكينگتىڭ ءداستۇرلى بانكينگتەن نەگىزگى ايىرماشىلىعى – يسلام بانكىنىڭ قىزمەتى شاريعات زاڭدىلىقتارىن باسشىلىققا الادى. مۇنداي ءادىس سەرىكتەستىك قارىم-قاتىناستارعا نەگىزدەلگەن. ساراپشىلار يسلامدىق بانكتىك ونىمدەر ءدىني سەنىمىنە قاراماستان, بارلىق ادامدار ءۇشىن قولجەتىمدى ەكەنىن ايتادى. الىناتىن تابىس وندىرىسكە جانە ساۋداعا ينۆەستيتسيالاۋمەن بايلانىستى بولۋى, ال بارلىق قارجىلىق وپەراتسيالار ناقتى اكتيۆتەرمەن دالەلدەنۋى ءتيىس. مامانداردىڭ ايتۋىنشا, رەتتەۋشى ورگانداردان باسقا بانكتىڭ قىزمەتىن يسلامدىق قۇقىقتانۋ, قارجى, بانكتىك ءىس سالاسىندا ءبىلىمى بار حالىقارالىق تاجىريبەسىنە سۇيەنەتىن عالىمداردان قۇرالعان شاريعات كەڭەسى قاداعالاپ وتىرادى.
ارمان وكتيابر, «ەگەمەن قازاقستان» الماتى