بيىلعى جارىس قۇرلىقتىق حوككەي ليگاسىندا ونەر كورسەتىپ جۇرگەن ازۋلى كلۋبتاردىڭ قاتىسۋىمەن ەستە قالدى. سونداي-اق, شۆەيتساريادان «داۆوس» حوككەي ۇجىمىنىڭ ارنايى كەلۋى دە ءتۋرنيردىڭ اياسىن كەڭىتىپ, بەدەلىن ارتتىرا ءتۇستى.
جارىستىڭ سوڭعى كۇنى مۇز ايدىنىندا «بارىس» پەن ۆلاديۆوستوكتىڭ «ادميرال» كلۋبى كۇش سىناستى. ويىن وتە شيەلەنىستى جاعدايدا ءوربىدى. حوككەيشىلەر مۇز ۇستىندە ءجيى-ءجيى ۇستاسىپ, ءتىپتى توبەلەسىپ قالىپ جاتتى. قالاي بولعان كۇندە دە, «بارىس» ويىنشىلارىنىڭ وسىنىڭ الدىندا «تراكتورمەن» بولعان وتە تارتىستى ماتچتا كوپ كۇش جۇمساپ, قالجىراپ قالعاندىقتارى بايقالىپ تۇردى. ول ويىندا ەلوردالىق كلۋب قوناقتاردى بۋلليت بويىنشا 3:2 ەسەبىمەن ارەڭ دەگەندە جەڭگەن بولاتىن.
مىنە, سونىڭ سالدارى بولسا كەرەك, «بارىس» كلۋبى قارسىلاسىنا ەڭ قۇرىعاندا ءبىر شايبا دا سوعا الماي, 0:3 ەسەبىمەن جەڭىلىپ قالدى. ويىننىڭ ءبىرىنشى كەزەڭىندە ەسەپتى قوناقتاردىڭ شابۋىلشىسى نيكولاي گلۋحوۆ اشتى. ەكىنشى كەزەڭدە ماكسيم كيتسىن ەسەپتى 2:0-گە جەتكىزدى. ال سوڭعى كەزەڭدە نيكولاي گلۋحوۆ وسى ويىنداعى ءوزىنىڭ ەكىنشى شايباسىن سالىپ, كەزدەسۋدىڭ سوڭعى نۇكتەسىن قويدى.
«ادميرال» وسى جەڭىسىنەن كەيىن تۋرنير كەستەسىندە ەكىنشى ورىندا تۇرعان «بارىستى» ىعىستىرىپ, كۇمىس جۇلدەگەر اتاندى. ال ءتۋرنيردىڭ باس جۇلدەسى – پرەزيدەنت كۋبوگى وسى جارىستا وتكىزگەن بەس ويىننىڭ بىرەۋىندە عانا جەڭىلگەن نيجنەكامسكىنىڭ «نەفتەحيميك» كومانداسىنا بۇيىردى. ايتا كەتەتىن جايت, قازىرگى ۋاقىتتا تاتارستاننان كەلگەن بۇل كلۋبتى قازاقستان قۇراما كومانداسى مەن «بارىستىڭ» باس باپكەرى بولعان اندرەي نازاروۆ جاتتىقتىرادى.
قايرات ءابىلدا, «ەگەمەن قازاقستان»