سايلاۋ جاسىرىن داۋىس بەرۋ ارقىلى جاناما سايلاۋ قۇقىعى نەگىزىندە جۇرگىزىلدى. باسقاشا ايتقاندا, اۋىلدىق وكرۋگ, كەنت جانە اۋىل اكىمدەرى ءتورت جىلدىق وكىلەتتىك مەرزىمگە تيىسىنشە اۋداندىق, قالالىق ءماسليحاتتاردىڭ دەپۋتاتتارى بولىپ تابىلاتىن سايلاۋشىلار تاراپىنان سايلاندى.
سايلاۋعا قاراعاندى وبلىسىنىڭ 16 ايماعى قاتىستى, ونىڭ 129-ى اۋىلدىق وكرۋگتەر, اۋىلدار مەن كەنتتەر. سايلاۋعا بارلىعى 388 ۇمىتكەر قاتىسقان, ونىڭ 287-ءسى ەر ادام جانە 101-ءى ايەل ادام.
كوميسسيا توراعاسى ەرعارا ايماعامبەتوۆتىڭ ايتۋىنشا, وتكەن سايلاۋ قورىتىندىسى بويىنشا 129 اكىم بەرىلگەن داۋىس باسىمدىعىمەن سايلانىپ, ونىڭ 83-ءى اۋىلدىق وكرۋگتەردىڭ, 22-ءسى كەنت جانە 24-ءى اۋىل اكىمدەرى بولىپ وتىر. سايلانعان اۋىل اكىمدەرىنىڭ 121-ءى ەر ادام, 8-ءى ايەل ادام. بارلىق سايلانعان اكىمدەردىڭ جوعارى بىلىمدەرى بار. ولاردىڭ كوپشىلىگى ينجەنەرلەر مەن مۇعالىمدەر, ەكونوميستەر مەن اۋىل شارۋاشىلىعى قىزمەتكەرلەرى جانە زاڭگەرلەر.
اتالعان سايلاۋعا جەرگىلىكتى بيۋدجەتتەن 20 ميلليون تەڭگەدەن استام قاراجات بولىنگەن. ايتالىق, ءار ۇمىتكەرگە ۇگىت-ناسيحات جۇمىستارىن جۇرگىزۋ ءۇشىن 66 500 تەڭگە قاراستىرىلىپتى.
ەندى سايلانعان اكىمدەر وزدەرىنىڭ قىزمەتتىك مىندەتتەرىنە كىرىسپەس بۇرىن, ەكى اپتاعا سوزىلاتىن ارنايى تەكسەرىستەن ءوتۋى قاجەت.
ميراس اسان, «ەگەمەن قازاقستان»
قاراعاندى وبلىسى