كوپشىلىكتى تولعانتقان وسى جانە باسقا ماسەلەلەر ەسەپتى جيىندا كەڭىنەن تالقىلانىپ, كەمشىلىكتەردى تۇزەتۋدىڭ جولدارى قاراستىرىلدى
پەتروپاۆل قالاسىنىڭ اكىمى ن. اشىمبەتوۆتىڭ 19, 20 شاعىن اۋداندارى, بوركي, سولنەچنىي, كىرپىش, نوۆوپاۆلوۆ كەنتتەرى تۇرعىندارى الدىنداعى ەسەبى اشىق اڭگىمە تۇرىندە ءوتتى. نۇرجان كەمەر ۇلىنىڭ شاھار باسشىلىعىنا تاعايىندالعانىنا كوپ بولا قويعان جوق. سوعان قاراماستان, پروبلەمالارمەن جەتە تانىستىعى باياندامادان اڭعارىلىپ تۇردى. ول قول جەتكەن جەتىستىكتەردى بايانداۋمەن قاتار, كەمشىلىكتەردى جويۋدىڭ جولدارىن دا كورسەتىپ بەردى.
باياندامادا تۇرعىنداردى الەۋمەتتىك قورعاۋ جانە جۇمىسقا ورنالاستىرۋ جايىنا كەڭ ورىن بەرىلدى. بۇل ورايدا, “جول كارتاسىنىڭ” يگىلىگىن كورىپ وتىرعاندار قاتارى قالىڭداپ كەلەدى. بىلتىر وسى باعدارلاما اياسىندا 3430 ادام, الەۋمەتتىك جۇمىس ورىندارىنا 1600 ادام جۇمىسقا ورنالاستىرىلعان. “جاستار تاجىريبەسى” باعدارلاماسى شەڭبەرىندە جوعارى, ورتا ارناۋلى وقۋ ورىندارىنىڭ 320 تۇلەكتەرىمەن كەلىسىم-شارت جاسالعان. 723 ادام قايتا وقىتۋ كۋرستارىندا جاڭا ماماندىقتاردى يگەرگەن. بوس ورىن جارمەڭكەلەرى ارقىلى 600-گە جۋىق پەتروپاۆلدىق تۇراقتى جۇمىستارعا ورنالاسقان. 13 مىڭ ادام جۇمىسپەن جانە جاڭا ماماندىقپەن قامتاماسىز ەتىلگەن. ءسويتىپ, ەكونوميكالىق بەلسەندى تۇرعىندارعا شاققاندا جۇمىسسىزدار دەڭگەيى 0,9 پايىزدى قۇراعان. جۇمىسسىزداردىڭ مۇددەسىن قورعاۋ ماقساتىمەن 757 ۇجىمدىق كەلىسىم-شارت جاسالعان. جۇمىس ورىندارىن ساقتاۋ, جۇمىسشىلاردىڭ قۇقىعى مەن كەپىلدىگىن قامتاماسىز ەتۋ ءۇشىن كاسىپورىندارمەن 11 مەموراندۋمعا قول قويىلعان. از قامتىلعان ازاماتتاردى الەۋمەتتىك قورعاۋ تەتىكتەرى دە قاراستىرىلعان. ماسەلەن, 7622 پەتروپاۆلدىق 137 ميلليون تەڭگەنىڭ تۇرعىن ءۇي جانە مەملەكەتتىك اتاۋلى كومەگىن العان. تاماق جانە ازىق-ت ۇلىك ونىمدەرىنىڭ قولجەتىمدى باعاسىن تۇراقتاندىرۋ باعىتىندا 49 رەت اۋىلشارۋاشىلىق جارمەڭكەلەرى وتكىزىلىپ, ساۋدا كولەمى 418 ميلليون تەڭگەگە جەتكەن. كاسىپكەرلەردىڭ باستاماسىمەن ارزان ءونىم ساتاتىن ساۋدا پاۆيلوندارى اشىلعان. بۇلارداعى باعا بازارلارعا قاراعاندا 10-15 پايىز ارزان. مەملەكەت باسشىسىنىڭ تاپسىرماسىنا سايكەس كوتەرمە-بولشەك ساۋدا ورتالىقتارىنىڭ جۇيەسى ۇلعايدى. “قىزىلجار-اقباستاۋ” كوممۋنالدى بازارى جانىندا ازىق-ت ۇلىك ءونىمدەرىن دەلدالسىز تۋرا جەتكىزىپ ساتاتىن كوتەرمە-ساۋدا ورىندارى پايدا بولدى. بىلتىرعى ەسەپتى كەزدەسۋدە ايتىلعان 346 ۇسىنىس قالالىق شارالارعا ەنگىزىلگەن ەدى. سولاردان ورىندالعانى – 336. بۇلاردىڭ باسىم كوپشىلىگى قالانى كوركەيتۋ, جولداردى, ەنەرگەتيكالىق كەشەندى, سۋ شارۋاشىلىعىن, تۇرعىن ءۇي-كوممۋنالدىق جۇيەنى جاقسارتۋ ءماسەلەلەرىنە تىكەلەي قاتىستى. “قالانىڭ سولتۇستىك-شىعىس ايماعىندا تۇراتىن سىزدەردەن 42 ءوتىنىش تۇسكەن بولاتىن. ولاردىڭ بارلىعى شەشىمىن تاپتى. كەيبىرىنە توقتالا كەتەيىن. اتاپ ايتقاندا, جەكە سەكتور ءۇشىن قاتتى تۇرمىستىق قالدىقتاردى توگۋ ءۇشىن ارنايى ورىندار ءبولىندى. وقۋشىلاردى مەكتەپتەرگە تاسىمالداۋ قايتادان رەتتەلدى. جولداردىڭ وي-شۇڭقىرلارى تەگىستەلدى. ايالدامالار جوندەلىپ, كوشەلەر جارىقتاندىرىلدى”, دەي كەلىپ قالا باسشىسى بيىل “جول كارتاسى” باعدارلاماسى بويىنشا جولداردى جوندەۋگە 300 ميلليون, كوشەلەردى جارىقتاندىرۋعا 199 ميلليون تەڭگە قاراستىرىلعانىن ايتىپ ءوتتى.
نۇرجان كەمەر ۇلى وبلىس ورتالىعىندا قوردالانىپ قالعان ماسەلەلەردىڭ ءالى دە جەتىپ ارتىلاتىنىن جاسىرمادى. سولاردىڭ وزەكتىسىنە تۇرعىن ءۇي-كوممۋنالدىق شارۋاشىلىق سالاسىنداعى پروبلەمالاردى اتادى. قالانىڭ اباتتاندىرىلعان تۇرعىن ءۇي قورى 1023 ءۇيدى قۇراسا, ۇشتەن ءبىرى 40 جىلدان استام جوندەۋ كورمەگەن. 289 ءليفتىنىڭ 55-ءى ىستەن شىققان. ال, جەكە مەنشىك سەكتورداعى 14 مىڭنان استام ءۇي ساپالى كوممۋنالدىق قىزمەتكە ءزارۋ. ءبۇلدىرشىندەردى مەكتەپكە دەيىنگى بالالار مەكەمەلەرىمەن قامتاماسىز ەتۋ دە وتكىر الەۋمەتتىك ماسەلەلەردىڭ ءبىرى. بالاباقشا كەزەگىندە سەگىز مىڭنان استام ءسابي كەزەكتە تۇر. جۋىق ارادا 320 ورىندىق بالاباقشانى پايدالانۋعا بەرۋ كوزدەلسە, بيىل تاعى 520 ورىندىق ەكى بالالار مەكەمەسىن ىسكە قوسۋ جوسپارلانعان. بۇدان تىسقارى مەكتەپتەر جانىنان 400 ورىندىق شاعىن ورتالىقتار بوي كوتەرەتىن بولادى. مەملەكەتتىك تاپسىرىسقا سايكەس جەكە مەنشىك مەكتەپكە دەيىنگى ۇيىمدارداعى ورىن سانى 225-كە ارتتىرىلادى.
كوممۋنالدىق جەلىلەردىڭ قولدانىس ۋاقىتىنىڭ ۇزاقتىعى, توزۋى كۇردەلى جوندەۋلەردى قاجەت ەتەدى. وسىعان وراي, ارنايى باعدارلاما قابىلدانىپ, ەنەرگيا قورىن 25-30 پايىز ۇنەمدەۋ جولى قاراستىرىلعان. بۇل, ارينە, تىعىرىقتان شىعۋدىڭ وڭتايلى ءتاسىلى ەمەس. رەسپۋبليكالىق بيۋدجەتتەن قارجىلىق دەمەۋ بولمايىنشا, سالانى ىلگەرى باستىرۋ وتە قيىن. سول سياقتى تازارتۋ قۇرىلعىلارىن دا قالپىنا كەلتىرۋ نايقالۋدى كۇتپەيدى. بۇگىندە اعىن سۋلاردى تازارتۋ جۇمىستارى 12 قوسىندى زاتتار بويىنشا وتكىزىلۋى ءتيىس بولسا, بۇل تالاپ ورىندالار ەمەس.
قالا ينفراقۇرىلىمى جۇمىسىنىڭ تيىمدىلىگىن كوپ جاعدايدا ونىڭ جول-كولىك قۇرىلىمى انىقتايتىنى ءسوزسىز. بۇل باعىتتا ءبىراز شارۋالاردىڭ اتقارىلعانى بايقالادى. ولاي بولسا, اتالعان قۇرىلىمنىڭ ىلگەرى باسۋىنا نە كەدەرگى جاساپ وتىر؟ ارىز-شاعىمداردىڭ ازايماۋىن نەمەن تۇسىندىرۋگە بولادى؟ ماسەلەن, يننا ياكوۆلەۆا, دۋلات جەڭىس ۇلى, بوريس كولموگوروۆ, ليزا كونوۆالوۆا, تاعى باسقالارى قوعامدىق كولىك قوزعالىسىنىڭ ناشارلىعىن, قىستىڭ كوزى قىراۋدا ايالدامالاردا سارىلىپ توسىپ قالاتىندارىن ءسوز ەتتى. وڭ وزگەرىستەرگە قاراماستان, كۇرمەۋى كوپ تۇيتكىلدى ماسەلەلەردىڭ نە سەبەپتى ورىن الىپ وتىرعانىنا ەسەپتى كەزدەسۋگە قاتىسقان وبلىس اكىمى سەرىك ءبىلالوۆ تە ارنايى توقتالدى. پەتروپاۆل قالاسىندا 5 تروللەيبۋس, 13 اۆتوبۋس, 14 شاعىن اۆتوبۋس باعىتتارىندا 296 كولىك بىرلىگى جولاۋشىلار تاسىمالداۋ قىزمەتىمەن اينالىسادى. قىزمەت كورسەتۋ ساپاسىن ارتتىرۋ جانە جىلجىمالى قۇرام پاركىن جاڭارتۋ ماقساتىمەن 184 جاڭا اۆتوبۋس ساتىپ الىنعان. بىلتىر قالالىق جولاۋشىلار كولىگى 17,6 ميلليون ادامدى تاسىمالداعان. بۇل كورسەتكىش 2008 جىلعا قاراعاندا 6,7 پايىزعا ارتىق. سوڭعى ەكى جىل بويى جولاقى تاريفى وزگەرتىلگەن جوق. دەمەك, الداعى ۋاقىتتا دا تاسىمالداۋ قىزمەتىنە ادامداردىڭ سۇرانىسى ارتپاسا, كەمىمەيدى دەگەن ءسوز. پەتروپاۆلدىقتاردىڭ تالاپ-ءتىلەكتەرىنە وراي ءۇش جاڭا باعىت بويىنشا قاتىناس ۇيىمداستىرىلىپ, ءتورت باعىتتىڭ قوزعالىسى وزگەرتىلگەن. بەسكول كەنتىنە دەيىن “6ت” تروللەيبۋس باعىتى اشىلعان. الايدا, تاسىمال قىزمەتىنىڭ ساپاسى كوپشىلىكتى ءالى دە قاناعاتتاندىرمايدى. سويتسە, بار گاپ جولاۋشىلار تاسىمالداۋمەن اينالىساتىن كاسىپورىندار اراسىندا ادال باسەكەلەستىكتىڭ تومەندىگىندە جاتىر ەكەن. كەيبىرەۋلەر تەندەردى ۇتىپ العاننان كەيىن ماسەلەنى جىلى جاۋىپ قوياتىن ءتارىزدى. قىزمەت رىنوگىن قالىپتاستىرۋمەن شۇعىلدانۋدىڭ ورنىنا, جەكە باس پايداسىن كوبىرەك كۇيتتەيتىن سەكىلدى. سوڭعى تەكسەرىس-رەيد قىزمەت كورسەتۋ ءمادەنيەتىنىڭ تومەندىگىن ايعاقتاپ بەرگەن.
جيىندا سويلەۋشىلەر قالا اكىمىنىڭ جۇمىسىنا وڭ باعا بەردى. وبلىس اكىمى س.ءبىلالوۆ الدا اتقارىلاتىن مىندەتتەردى اتاپ كورسەتىپ, قالا باسشىلىعىنا ناقتى تاپسىرمالار جۇكتەدى.
ءومىر ەسقالي.
پەتروپاۆل.
العان اسۋلار الاسارمايدى
ءار ءتۇرلى دەڭگەيدەگى اكىمدەردىڭ حالىقتىڭ الدىندا ەسەپ بەرۋى بيلىك تىزگىنىن ۇستاعانداردىڭ ەلمەن ەتەنە جۇمىس ىستەۋىنىڭ ۇتىمدى ءۇردىسى بولعانىن ءومىردىڭ ءوزى كورسەتىپ وتىر. ال حالىقتىڭ الدىندا قىزارىپ-قىسىلماس ءۇشىن جىل بويى اتقارىلعان جۇمىستاردىڭ قايتارىمدى بولۋىنا قول جەتكىزۋ كەرەك-اق. بۇل وسى كەزەڭدەگى تىندىرىلعان ىستەردى ساراپقا سالىپ, الداعى جىلعا مىندەتتەر بەلگىلەيتىن دە ءسات.
اكىمدەردىڭ جىل سايىن وتكىزىلەتىن وزدەرىنىڭ ەسەبىنە تياناقتى دايىندالاتىنى دا سوندىقتان. قارعالى اۋدانىنىڭ اكىمى مۇحتار جۇماعازيەۆ جەلتاۋ اۋىلدىق وكرۋگىندە وتكەن ەسەبىنە ءجۇزى جارقىن كەلدى. بۇل وكرۋگكە پەتروپاۆلوۆ جانە ءشامشى قالداياقوۆ اتىنداعى اۋىلدار قارايدى.بۇعان دەيىن دە بىرنەشە اۋىلدىق وكرۋگتەر ەسەپ بەرگەن ول اۋداننىڭ ەكونوميكالىق, الەۋمەتتىك-مادەني دامۋ باعىتتارىن تاراتىپ باياندادى. جىل ىشىندە اتقارىلعان جۇمىستار كوڭىلگە سەنىم ۇيالاتادى. اۋدان ەكونوميكاسىنىڭ جەتەكشى سالاسى اۋىل شارۋاشىلىعى بولىپ تابىلادى. الەمدىك قارجى داعدارىسىنا, اۋا رايىنىڭ قۋاڭشىلىقتى بولعانىنا قاراماستان, قارعالىلىقتار اگروونەركاسىپ كەشەنى بويىنشا ءوندىرىس كولەمىن 2 پايىزعا ارتتىرعان. اۋداندا اۋىل شارۋاشىلىعى تەحنيكالارىن جاڭارتۋعا 765,2 ملن.تەڭگە ينۆەستيتسيا سالىنىپتى. بۇل 2008 جىلعى كورسەتكىشتەن 2,3 ەسە ارتىق. اۋدان اكىمى قولدا بار تەحنيكانىڭ 80 پايىزى توزعانىن دا جاسىرمادى.
– ءبىز اقتوبەنىڭ ازىق-ت ۇلىك بەلدەۋىن قامتاماسىز ەتەتىن اۋدانداردىڭ قاتارىنا جاتامىز. سوندىقتان وبلىس “تابيعات+ ” جشس-ىنە تامشىلاتىپ سۋارۋ تەحنولوگياسىن ەنگىزۋگە قوماقتى قارجى ءبولدى. بۇل شارۋاشىلىق كارتوپ وسىرىلەتىن القاپتى 120-150 گەكتارعا دەيىن كەڭەيتۋى قاجەت. “پاتساەۆ” جشس-ءىن سۋمەن قامتاماسىز ەتۋ ماسەلەسى دە شەشىمىن تاباتىن بولادى, – دەدى مۇحتار سابىر ۇلى.
ەسەپتى كەزەڭدە اۋدان بويىنشا ونەركاسىپ ءوندىرىسىنىڭ كولەمى 869,2 ملن. تەڭگەنى قۇرادى. اعىمداعى جىلى “اقتوبە-تەمىر-ۆس” جشس وڭتۇستىك ۆەليحوۆ كەن ورنىندا گەولوگتىق-بارلاۋ جۇمىستارىنا كىرىسپەك. ءساۋىر ايىنان باستاپ سولتۇستىك ۆەليحوۆ كەن ورنى كارەرىندە كەن ءوندىرۋ مەن باسقا ءوندىرىس جۇمىستارى جالعاسادى. جالپى قۇنى 200,0 ملن. دوللار تۇراتىن بۇل جوبا جۇزەگە اسقاندا, جىلىنا 900,0 مىڭ توننا تەمىر كەنى وندىرىلەدى دەپ كۇتىلۋدە. وسى سەرىكتەستىك ۇستىمىزدەگى جىلعى شىلدە ايىندا ۆەليحوۆ تەمىر كەن ورنىندا تاۋ-كەن بايىتۋ كومبيناتىنىڭ قۇرىلىسىنا كىرىسەدى. بۇل جوبالار وبلىستىڭ 2010 جىلعا ارنالعان يندۋستريالىق-يننوۆاتسيالىق دامۋ باعدارلاماسىنا ەنگىزىلگەن.
اۋىلدىق جەرلەردىڭ وزەكتى ماسەلەلەرىنىڭ ءبىرى حالىقتى ساپالى اۋىز سۋمەن قامتاماسىز ەتۋ ەكەنى ءسوزسىز. اۋداندا بۇل باعىتتا دا ءجۇيەلى جۇمىستىڭ ءىزى قالانعانى اڭعارىلادى. “اۋىز سۋ” باعدارلاماسى اياسىندا قارابۇتاق, بادامشا, ءالىمبەت, حەرسون اۋىلدارىنداعى سۋ قۇبىرى كەشەنى قايتا جاراقتاندىرىلدى. 2010 جىلى رەسپۋبليكالىق بيۋدجەتتەن بولىنگەن 685,2 ملن. تەڭگە مامىت, پەتروپاۆلوۆ, ش.قالداياقوۆ, گريگورەۆ, ستەپنوي اۋىلدارىنداعى سۋ قۇبىرى كەشەندەرىن قايتا جاراقتاندىرۋعا جۇمسالادى.
2009 جىلى اۋدان بويىنشا جالپى الاڭى 4560 شارشى مەتر 58 تۇرعىن ءۇي سالىنىپ, پايدالانۋعا بەرىلىپتى. 2010 جىلى جالپى الاڭى 3350 شارشى مەتر تۇرعىن ءۇي سالۋ جوسپارلانۋدا. “جول كارتاسى” شەڭبەرىندە رەسپۋبليكالىق جانە وبلىستىق بيۋدجەتتەن بادامشا اۋىلىنىڭ كارىز جۇيەسىن قايتا جاراقتاندىرۋعا 111,4 ملن. تەڭگە, اكىمدىك عيماراتىنىڭ قۇرىلىسىنا وبلىستىق بيۋدجەتتەن 200,0 ملن. تەڭگە بولىنەدى.
وسى ەسەپتى كەزدەسۋ وتكىزىلىپ وتىرعان پەتروپاۆلوۆ اۋىلىنا جەتكىزۋشى گاز قۇبىرى جانە ورامىشىلىك گاز ءبولۋشى جەلىلەردىڭ قۇرىلىسىنا وبلىستىق بيۋدجەتتەن 135,9 ملن. تەڭگە قارالعانىن ەستىگەن اۋىلدىقتار ءبىر سەرپىلىپ قالدى. وتكەن جىلى كولىك جولدارىن كۇتىپ ۇستاۋعا, جىلۋ جۇيەلەرىن جوندەۋگە بولىنگەن قارجى ءوز ورنىمەن جۇمسالعان. اۋداندا بايلانىس سالاسىنىڭ قىزمەتىن جەتىلدىرۋدە دە ىلگەرىلەۋشىلىك بار. بۇرىندارى اۋدان ورتالىعى – بادامشا كەنتىنىڭ باس اۋرۋىنا اينالىپ كەلگەن كوپ قاباتتى تۇرعىن ۇيلەر مەن مەكەمەلەردىڭ جىلۋمەن قامتىلۋى جاقسارىپ, پروبلەما وڭ شەشىمىن تاپقان.
جەرگىلىكتى بيۋدجەتكە تۇسەتىن سالىقتار مەن تولەمدەر 113,8 پايىزعا ورىندالىپتى. اۋداندا ءۇستىمىزدەگى جىلدىڭ 1 قاڭتارىنا 633 شاعىن جانە ورتا بيزنەس سۋبەكتىلەرى بولعان. ولار 6 213,1 ملن. تەڭگەنىڭ ءونىمىن ءوندىرىپ, بيۋدجەتكە 415,9 ملن. تەڭگە تۇسىرگەن. ەسەپتى كەزەڭدە 10,6 مىڭ ادام ەڭبەكپەن قامتىلعان. بىلتىردىڭ وزىندە 582 جاڭا جۇمىس ورىندارى اشىلعان. سونىڭ ناتيجەسىندە اۋداندا جۇمىسسىزدار سانى ازايىپ كەلەدى.
دەنساۋلىق ساقتاۋ جانە ءبىلىم بەرۋ سالاسىندا دا جاقسى ىستەر جالعاسىن تاۋىپ وتىر. سوڭعى جىلدارى عانا بىرەۋلەردىڭ مەنشىگىنە ءوتىپ كەتكەن ءتورت مەكتەپكە دەيىنگى بالالار مەكەمەسى قايتارىلىپ الىنسا, بىلتىر التى ءبىلىم بەرۋ نىسانى كۇردەلى جوندەلىپتى. اۋداندا تۋبەركۋلەزبەن اۋىراتىنداردى انىقتاۋ جانە ەمدەۋدىڭ ارقاسىندا, ونداي سىرقاتقا شالدىققاندار ازايعان.
مۇحتار سابىر ۇلى اۋدانداعى وزەكتى ماسەلەلەردى دە اينالىپ ءوتپەدى. ول كەيبىر شارۋاشىلىق قۇرىلىمدارىنىڭ مال سانىن كەمىتۋگە جول بەرگەنىن, ەگىستىككە جارامدى جەرلەردىڭ اينالىمعا قوسىلماي وتىرعانىن باسا ايتتى. سونداي-اق, كوممۋنالدىق كاسىپورىندار قىزمەتتەرىنىڭ زامان تالابىنان كەيىن قالىپ كەلە جاتقانىن سىنادى. شاعىن جانە ورتا بيزنەس سۋبەكتىلەرىنىڭ قايتارىمدىلىعىنا قول جەتكىزۋگە شاقىردى. كەيبىر ەلدى مەكەندەردە جاستاردىڭ مادەني دەمالىسىن ۇيىمداستىرۋدىڭ ولقى سوعىپ جاتقانىن دا جاسىرمادى. مال تۇقىمىن اسىلداندىرۋ, مالدى قولدان ۇرىقتاندىرۋ ءوز دارەجەسىندە جۇرگىزىلمەي وتىرعانىن اتاپ كورسەتتى.
دەگەنمەن, اكىمنىڭ اڭگىمەسىنەن اڭعارعانىمىز, جالپى العاندا قارعالى اۋدانىندا ادامداردىڭ تۇرمىسى مەن دەنساۋلىعىن جاقسارتۋ باعىتىندا ايتارلىقتاي جۇمىستار اتقارىلۋدا. سوندىقتان كەزدەسۋگە كەلگەن اۋىل تۇرعىندارى جەكە باستىڭ ماسەلەلەرىنەن گورى جالپىعا ورتاق, كوپكە پايداسى تيەتىن پروبلەمالارعا نازار اۋداردى. كەزدەسۋدە شىعىپ سويلەۋشىلەر اۋدان اكىمىنىڭ ەسەبىن قاناعاتتانارلىق دەپ باعالادى. اۋىل تۇرعىنى گالينا سلينچەنكو اۋداندىق اۋرۋحانانىڭ باس دارىگەرى ءادىلحان بوقانوۆقا ۇلىن اجال تىرناعىنان الىپ قالعاندارى ءۇشىن العىسىن جاۋدىرسا, پەتروپاۆلوۆ ورتا مەكتەبىنە “ديپلوممەن – اۋىلعا” اكتسياسى اياسىندا كەلىپ جۇمىسقا تۇرعان تاسبولات مۇقاشەۆ تۇرعىن ءۇي بولگەن اۋدان اكىمىنە ريزاشىلىعىن ءبىلدىردى. وسى مەكتەپتىڭ ۇستازى تامارا سانگايلو حالىقتىق قولونەردى دامىتۋ جايىندا وي قوزعادى. ارداگەرلەر كەڭەسىنىڭ توراعاسى مارس شىنتاسوۆ باستالعان شارۋالاردىڭ جالعاسىن تاباتىنىنا سەنىم ارتتى. مۇحتار جۇماعازيەۆ قويىلعان سۇراقتار جانە كوتەرىلگەن ماسەلەلەرمەن كۇندەلىكتى اينالىسىپ وتىرعانىن ايتىپ, بارلىق ساۋالدارعا تولىققاندى جاۋاپ بەردى.
اۋا رايى ايازدى بولعانىمەن, كوپ جينالعان اۋىلدىقتاردىڭ ەرتەڭگى كۇنگە دەگەن سەنىمى بەكي ءتۇسكەنىن ەمەن-جارقىن اڭگىمەلەسۋلەرىنەن, قۋانىشتى جۇزدەرىنەن اڭعاردىق.
ساتىبالدى ءساۋىرباي.
اقتوبە وبلىسى.