كەشە «يادروسىز الەم ءۇشىن» اتتى حالىقارالىق كونفەرەنتسيا شەڭبەرىندە ۇيىمداستىرىلعان مەكتەپ وقۋشىلارى مەن بۇلدىرشىندەردىڭ وسى تاقىرىپقا ارناعان شىعارمالارى مەن سۋرەتتەرى كونكۋرسىنىڭ ناتيجەسى جاريالانىپ, جەڭىمپازدار ماراپاتتالدى.
سىيلىق تاپسىرۋ ءراسىمىن سىرتقى ىستەر ءمينيسترىنىڭ ورىنباسارى قايرات وماروۆ جۇرگىزدى. كونكۋرسقا قاتىسقاندار اراسىنان جەڭىمپاز دەپ تانىلعان التى وقۋشى ەلىمىزدىڭ ءار تۇكپىرىنەن كەلگەن ەدى, ولاردىڭ ءبارى دە دەمەۋشىلەر اپەرگەن ايپاد پلانشەتتەرىن يەلەندى.
كونكۋرس ناتيجەسى بويىنشا شىعارمالار اراسىنان ءبىرىنشى ورىندى شىعىس قازاقستان وبلىسى زايسان اۋدانىنداعى اينابۇلاق ورتا مەكتەبىنىڭ 9-سىنىپ وقۋشىسى اقمارال ماناپوۆا الدى. اقمارال شىعارماسىندا ءوز باسىنان وتكەن جايلاردى جازعان ەكەن. يادرولىق سىناق الاڭىنا جاقىن ماڭدا تۋعان ونىڭ اناسىنىڭ بويىنان قاتەرلى ىسىك دەرتى تابىلىپ, وعان وتا جاسالادى. باستان كەشكەن قيىندىقتى وقۋشى قىز شىنايىلىقپەن باياندايدى. ال شىعارماسىنىڭ سوڭىندا ول: ەگەر سەندەردىڭ تۇراتىن جەرلەرىڭدە يادرولىق سىناقتار جاسالاتىن بولسا, ءۇنسىز قالماي, باستارىڭدى كوتەرىپ, قارسىلىق بىلدىرىڭدەر, دەپ ءوزىنىڭ قۇرداستارىن اشىق كۇرەسكە شاقىرادى.
ەكىنشى ورىنعا الماتى قالاسىنداعى №32 مەكتەپتىڭ 11-سىنىپ وقۋشىسى ءدىنيسلام بەكقاليەۆتىڭ ولەڭى لايىق دەپ تابىلدى. ال ءۇشىنشى ورىن يادرولىق سىناقتى باسىنان وتكەرگەن ولكەنىڭ ۇلانى, اباي اۋدانىنداعى قاراۋىل مەكتەبىنىڭ 10-سىنىپ وقۋشىسى جاينار نازىمقىزىنا بەرىلدى. تۋعان جەرىن شەكسىز سۇيەتىن قىز ءوزىنىڭ شىعارماسىندا يادرولىق سىناقتارعا لاعنەت ايتادى.
سۋرەتتەر نوميناتسياسى بويىنشا ءبىرىنشى ورىندى تاراز قالاسىنداعى №43 مەكتەپتىڭ 2-سىنىپ وقۋشىسى سانجار بەگايداروۆ, ەكىنشى ورىندى قوستاناي وبلىسى جىتىقارا قالاسىنداعى گيمنازيانىڭ 7-سىنىپ وقۋشىسى جانات تەمىرحانوۆ جانە ءۇشىنشى ورىندى قاراعاندى قالاسىنداعى №101 مەكتەپ-ليتسەيدىڭ 8-سىنىپ وقۋشىسى مۇحتار سەرىكوۆ الدى.
جەڭىمپازداردى ماراپاتتاۋ راسىمىنە اتوم قىرعىنىن ارقاسىمەن كوتەرگەن ناگاساكي قالاسىنىڭ قازىرگى مەرى توميحيسا تاۋە قاتىستى. ال ماراپاتتار الۋعا «قازاتومونەركاسىپ» ۇك پەن «قازاقستاننىڭ ازاماتتىق اليانسى» ۇيىمى قولۇشىن بەرگەن ەكەن.
جاقسىباي سامرات.
استانا.