يندۋستريالاندىرۋ – جاڭا قازاقستاننىڭ ەكونوميكالىق دامۋىنداعى نەگىزگى فاكتور دەۋگە بولادى. ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ باستاماشىسى ەل پرەزيدەنتى نۇرسۇلتان نازارباەۆ ونى جاڭارۋدىڭ زور مۇمكىندىگى دەپ اتادى. ەلىمىز كولەمىندە ۇدەمەلى يندۋستريالاندىرۋ باعدارلاماسى بويىنشا قازىردىڭ وزىندە 300 جوبا جۇزەگە اسىرىلدى, جىل سوڭىنا دەيىن تاعى 129 جوبانى ىسكە قوسۋ جوسپارلانعان. مىڭداعان جاڭا جۇمىس ورىندارى اشىلدى. ساراپشىلار يندۋستريالاندىرۋ ستراتەگياسى, اسىرەسە, مەملەكەت تۇرعىندارىنىڭ ۇشتەن ءبىرىن قۇرايتىن جاس قازاقستاندىقتارعا ايرىقشا ىقپال ەتتى دەيدى.
كەشە جاڭا جامبىل فوسفور زاۋىتىندا جاستاردىڭ يندۋستريالىق فورۋمى ءوتتى. مەملەكەتتىڭ جاڭا يندۋستريالىق دامۋ باعىتىنا قولداۋ كورسەتۋ ءۇشىن «نۇر وتان» پارتياسى قولعا العان فورۋمعا 300-گە جۋىق جاس بۋىن وكىلدەرى جينالدى. ولاردىڭ قاتارىندا ينجەنەرلەر, حيميكتەر, تەحنولوگتار, لابورانتتار بار. بۇل كاسىپورىن ۇدەمەلى يندۋستريالىق-يننوۆاتسيالىق دامۋ باعدارلاماسىنا ەنەتىن نەگىزگى نىسانداردىڭ ءبىرى. پرەزيدەنتىمىزدىڭ دامۋ باعدارلاماسىنىڭ ارقاسىندا «قازفوسفاتتا» 5 بىردەي يننوۆاتسيالىق جوبا جۇزەگە اسىرىلىپ جاتىر. سونىڭ ىشىندە كۇكىرت قىشقىلى تسەح قۇرىلىسىن, بايىتۋ فابريكاسىن, جاڭا فوسفور ءوندىرىسىن ەرەكشە اتاپ وتۋگە بولادى. وسىلاي ءونىم تۇرلەرىنىڭ كوبەيىپ, وتىمدىلىگىنىڭ ارتۋى ءبىرىنشى كەزەكتە جاستاردىڭ جاڭا جۇمىسپەن قامتىلۋىنا جول اشاتىنى ءسوزسىز.
«نۇر وتان» حدپ توراعاسىنىڭ ءبىرىنشى ورىنباسارى نۇرلان نىعماتۋلين «ەلباسىمىز, «نۇر وتان» پارتياسىنىڭ توراعاسى نۇرسۇلتان نازارباەۆتىڭ تىكەلەي تاپسىرماسى بويىنشا قابىلدانعان يندۋستريالىق باعدارلاماسى قازىرگى ۋاقىتتا جاستاردىڭ ەرەكشە نازارىندا. سەبەبى, وسى باعدارلامانىڭ ارقاسىندا جاستارىمىز جاڭا ماماندىقتاردى يگەرىپ قانا قويماي, سونىمەن بىرگە, يننوۆاتسيالىق كاسىپورىنداردا جاڭا تەحنولوگيالارمەن جۇمىس ءىستەۋگە مۇمكىندىك الىپ وتىر», دەپ اتاپ ءوتتى.
– پرەزيدەنتىمىزدىڭ جاڭا باعدارلاماسى ءبىزدىڭ كاسىپورىن ءۇشىن ۇلكەن مۇمكىندىكتەرگە جول اشتى. اتاپ ايتار بولساق, ءبىز ءوندىرىستى جاڭعىرتۋ ءۇشىن ينۆەستيتسيا الدىق, ەندى ونىمدەرىمىزدىڭ ساپاسىن بۇرىنعىدان دا جاقسارتۋ ماقساتىن كوزدەپ وتىرمىز. ءبىزدىڭ زاۋىتىمىز وڭىردەگى ەڭ ءىرى كاسىپورىننىڭ ءبىرى بولعاندىقتان, ونىڭ پايداسىن بارلىق جامبىل وبلىسى تۇرعىندارى سەزىنىپ وتىر دەۋگە بولادى, – دەدى «كازفوسفات» جشس جاڭا جامبىل فوسفور زاۋىتىنىڭ ديرەكتورى مۇقىش ەسكەندىروۆ.
ارمان قاراعاليەۆ – ەڭبەك جولىن وسى زاۋىتتا باستاعان جاس ماماننىڭ ءبىرى. اكەسى دە, اپكەسى دە وسى كاسىپورىندا ەڭبەك ەتكەن. ءوزى مەملەكەت تاراپىنان جاسالىپ وتىرعان مۇمكىندىكتى قالت جىبەرمەي, ارقاشان بىلىكتىلىگىن ارتتىرىپ, تاجىريبەسىن جەتىلدىرۋمەن كەلەدى. سونىڭ ناتيجەسىندە بەس جىل ىشىندە قاتارداعى ينجەنەردەن باستىقتىڭ ورىنباسارى قىزمەتىنە دەيىن جوعارىلادى. قازىر ءوز ۇجىمىندا ءبىلىمدى, ىسكەر, ەڭبەكقور مامان رەتىندە زور بەدەلگە يە. ونىڭ ايتۋىنشا, پرەزيدەنتتىڭ جاڭا باعدارلاماسى جاستاردىڭ ومىردەن ءوز ورنىن تابۋىنا, بولاشاققا دەگەن سەنىمدەرىن ارتتىرۋعا, لايىقتى ماماندىق يەلەنىپ, ويداعىداي جۇمىسقا ورنالاسۋىنا كەڭ جول اشقان. ەڭبەكاقى جوعارى ءارى تۇراقتى تۇردە ءوز ۋاقىتىندا تولەنەدى.
وسىنداي قامقورلىققا ءبولەنگەن فورۋمعا قاتىسۋشىلار پرەزيدەنتتىڭ يندۋستريالىق-يننوۆاتسيالىق دامۋ باعدارلاماسىنا دەگەن ريزاشىلىقتارى مەن قولداۋلارىن ءبىلدىردى جانە باعدارلامانىڭ تابىستى جۇزەگە اسىرىلۋى ءۇشىن بار كۇش-جىگەرلەرىن جۇمسايتىندىقتارىن ايتتى.
سونداي-اق بۇگىن كاسىپورىننىڭ 40 جۇمىسشىسى «نۇر وتان» پارتياسىنىڭ قاتارىنا كىردى. پارتيا بيلەتتەرىن ولارعا نۇرلان نىعماتۋلين تابىس ەتتى.
«ەگەمەن-اقپارات».
جامبىل وبلىسى.