الەمدەگى استىقتى ەكسپورتقا شىعاراتىن الدىڭعى قاتارلى ون مەملەكەتتىڭ ساناتىنداعى قازاقستان مەن گەرمانيانىڭ, ونىڭ ىشىندە اۋىلشارۋاشىلىق تەحنيكالارىن شىعاراتىن نەمىس كومپانيالارىنىڭ اراسىنداعى ارىپتەستىك بايلانىس كوپ جىلداردان بەرى ءتيىمدى جالعاسىن تابۋدا. بۇگىندە الەمدىك رىنوكتا ۇلكەن سۇرانىسقا يە «كلااس», «لەمكەن», تاعى باسقا ماركالى تەحنيكالاردى كوپتەپ كەزدەستىرۋگە بولادى. ەلىمىزدە اۋىل شارۋاشىلىعى تەحنيكالارىن شىعاراتىن گەرمانيالىق 15 فيرما جۇمىس ىستەيدى. ولاردىڭ وكىلدىكتەرى اقمولا وبلىسىندا دا اشىلعان.
2010 جىلى گەرمانيا جانە قازاقستان اۋىل شارۋاشىلىعى مينيسترلىكتەرىنىڭ مەملەكەتارالىق كەلىسىم-شارتتارىنا سايكەس رەسپۋبليكامىزدا نەمىس اگرارلىق ورتالىعىن قۇرۋ جونىندە شەشىم قابىلدانعان ەدى. استىقتى زەرەندى اۋدانىندا وتكەن «القاپ كۇنىندە» وسى ورتالىقتىڭ تۇساۋكەسەرى بولدى. سالتاناتتى شاراعا قازاقستان رەسپۋبليكاسى اۋىل شارۋاشىلىعى مينيسترلىگىنىڭ جاۋاپتى حاتشىسى ەۆگەني امان, گەرمانيانىڭ ازىق-ت ۇلىك جانە تۇتىنۋشىلار قۇقىعىن قورعاۋ مينيسترلىگىنىڭ مەملەكەتتىك حاتشىسى پەتەر بلەزەر, اقمولا وبلىسى اكىمىنىڭ ءبىرىنشى ورىنباسارى قادىرحان وتاروۆ, سولتۇستىك وڭىردەگى جەتەكشى استىق شارۋاشىلىقتارىنىڭ باسشىلارى, عالىمدار قاتىستى.
مەملەكەتتىك حاتشى مەن جاۋاپتى حاتشى ەكى ەل اراسىنداعى ءداستۇرلى بايلانىستار ۋاقىت تالابىنداعى كۇردەلى مىندەتتەردى شەشۋگە وڭ ىقپال جاسايتىندىعىن اتاپ كورسەتتى. گەرمانيالىق بەلدى فيرمالاردىڭ ماماندارى جاڭا تەحنيكالار مەن تەحنولوگيالاردىڭ ازىق-ت ۇلىك قاۋىپسىزدىگىن قامتاماسىز ەتۋدەگى, ەگىنشىلىك مادەنيەتىن كوتەرۋ جانە زامانالىق اۋىل شارۋاشىلىعى ستراتەگياسىن قالىپتاستىرۋداعى ورنىنا كەڭىنەن توقتالدى. جاڭا قۇرىلعان حالىقارالىق ورتالىققا جۇكتەلەر مىندەتتەر تۋرالى اتالعان جوبانى جۇزەگە اسىرۋشى حويەنحايم باتىس ەۋروپا ۋنيۆەرسيتەتىنىڭ ديرەكتورى دوكتور حاين شيۋللەر ارنايى بايانداما جاسادى.
سالتاناتتى شاراعا قاتىسۋشىلار زەرەندى اۋدانىنىڭ ەگىستىك القاپتارىنداعى, دالا قىرماندارى مەن ەلەۆاتورلارداعى قاربالاس جۇمىس بارىسىمەن تانىستى.
باقبەرگەن امالبەك, اقمولا وبلىسى.