باكۋ تورىندە كەزدەسۋلەر قىزىقتى جانە تارتىستى ءوتىپ جاتىر. كەشە بوكسشىلار الەم چەمپيوناتىنىڭ جارتىلاي فينالىندا كۇش سىناستى. بۇل ايقاستار ءتۇسكى جانە كەشكى باعدارلاماعا ءبولىنىپ, ادەتتەگىدەي ەكى رينگتە ەمەس, ەندى ءبىر عانا شارشى الاڭدا ءوتتى. وسى جولداردى جازىپ وتىرعاندا بىزگە ەڭ جەڭىل سالماقتاعى ەكى كەزدەسۋدىڭ عانا ءناتيجەسى بەلگىلى بولدى. بىرىنشىسىندە وليمپيادا مەن الەمنىڭ ەكى دۇركىن چەمپيونى قىتايلىق زوۋ شيمين رەسەيلىك داۆيد ايراپەتياندى ۇتتى. ەكىنشى كەزدەسۋدە ازيا چەمپيونى, الەم چەمپيوناتىنىڭ قولا جۇلدەگەرى كورەيالىق جونگ شين موڭعوليالىق الەم چەمپيونى سەردامبا پۋرەۆدورجدان ايلاسىن اسىردى.
وسى ءتورت بوكسشىنىڭ ءبارى ءبىر-بىرىمەن كەزدەسىپ جۇرگەن بوكسشىلار. ميلاندا وتكەن سوڭعى الەم چەمپيوناتىندا دا وسى بوكسشىلاردىڭ كەزدەسكەنى ەسىمىزدە. سول كەزدە رەسەيلىك ايراپەتياننىڭ فينالدا موڭعول بوكسشىسىنا قالاي ەسە جىبەرگەنى كۇنى بۇگىنگە دەيىن كوز الدىمىزدا. ەندى ولاردىڭ جولى بيىلعى سىندا تۇيىسپەسە دە, ەكەۋى دە فينالعا بارار جولدا قارسىلاستارىنان ۇتىلۋعا ءماجبۇر بولدى.
كەشە باسقا ەلدەردىڭ بوكسشىلارىنان – ۋكراينادان تورتەۋ, كۋبادان ۇشەۋ, انگليا, برازيليا, وزبەكستان, يتاليادان ەكى-ەكى بوكسشىدان رينگكە شىقسا, اقش, يرلانديا, تاجىكستان, موڭعوليا, بەلارۋس, لاتۆيا, ءۇندىستان, گەرمانيادان ءبىر-ءبىر ادامنان قولعاپ ءتۇيىستىردى. ال رەسەيدەن ايراپەتياننان باسقا ميشا الويان مەن ەگور مەحونتسەۆ, قىتايدان زوۋ شيميننەن باسقا ۋانۋان ۋانگ كەزدەسۋ وتكىزدى. ال الاڭ يەلەرىنەن بيىل ەكى بوكسشى جارتىلاي فينالعا شىعىپ وتىر. سونىڭ ءبىرى اسا اۋىر سالماقتاعى ماگومەدراسۋل مەدجيدوۆ ءبىزدىڭ يۆان دىچكومەن كەشكى باعدارلامادا كەزدەستى. ازەربايجان شيرەك فينالدا كۋبانىڭ الىبى اتاقتى فەليكس ساۆوننىڭ جيەنى ەريسلاندي ساۆوندى ءۇش راۋندتا ءۇش رەت نوكداۋنعا جىبەرىپ, كەلەسى اينالىمعا شىققان بولاتىن. وسى كۇنى ازەربايجاننىڭ تاعى ءبىر ءۇمىتى 91 كيلوداعى تەيمۋر ماممادوۆ قىتاي ۋانۋان ۋانگپەن ايقاستى.
بيىل برازيليا قۇراماسى دا جاقسى بوكس كورسەتۋدە. ولار دا الاڭ يەلەرى سياقتى ەكى بوكسشىسىن جارتىلاي فينالعا شىعاردى. الەم چەمپيوناتىندا وسى برازيليالىقتار تۋرالى ءبىزدىڭ باپكەرلەر «الماتىدا جارىسقا كەلەر الدىندا ءبىزدەن بوكستى ۇيرەنىپ ەدى, ەندى كوردىڭ بە, ءوزىمىزدىڭ باسىمىزعا تاياق بولىپ ءتيىپ جاتىر», دەپ قالجىڭداپ قويادى. ءار قالجىڭنىڭ استارىندا شىندىق بار دەمەكشى, لاتىنامەريكالىقتار بيىلعى سىنداعىداي قارقىندارىن ساقتاسا, لوندون وليمپياداسىندا قاي ەل بوكسشىلارىنا بولسا دا كۇتپەگەن سىي جاساۋى ابدەن مۇمكىن.
كەشە كەشكىسىن جارتىلاي فينالدا عاني جايلاۋوۆ كۋبالىق ياسنيەر تولەدومەن, سەرىك ءساپيەۆ لاتۆيالىق ەگيديۋس كاۆالاياۋسكاسپەن, ءادىلبەك نيازىمبەتوۆ وزبەك ەلشود راسۋلوۆپەن جانە اسا اۋىر سالماقتاعى يۆان دىچكو ازەربايجان ماگومەدراسۋل مەدجيەۆپەن كەزدەستى. ءا.نيازىمبەتوۆ پەن س.ساپيەۆ فينالعا شىقسا, ع.جايلاۋوۆ پەن ي.دىچكو قارسىلاستارىنان جەڭىلىپ, قولا جۇلدەگە يە بولدى.
داستان كەنجالين – باكۋدەن.