كەشە قازاقستان پارلامەنتى ءماجىلىسىنىڭ توراعاسى ورال مۇحامەدجانوۆ ليتۆا پرەزيدەنتى داليا گريباۋسكايتەمەن كەزدەستى. ءماجىلىس توراعاسى ليتۆا پرەزيدەنتىنىڭ قازاقستانعا جاساعان وسى ارنايى ساپارى ەكى مەملەكەت اراسىنداعى ىنتىماقتاستىق بايلانىستىڭ جاڭا دەڭگەيگە كوتەرىلۋىنە ىقپال ەتەتىنىنە سەنىم ءبىلدىردى, دەپ حابارلادى وسى پالاتانىڭ باسپاسوز قىزمەتى.
«قازاقستان ءۇشىن ليتۆا بالتىق تەڭىزى ايماعىنداعى ماڭىزدى ساياسي جانە ەكونوميكالىق ارىپتەس بولىپ سانالادى. ءبىز ليتۆامەن بايلانىستىڭ بارلىق سالادا تەرەڭدەي تۇسۋىنە جانە اۋقىمى كەڭەيۋىنە ۇلكەن ءمان بەرىپ وتىرمىز», دەدى و.مۇحامەدجانوۆ. ءوزارا ءتيىمدى ىنتىماقتاستىقتى نىعايتۋ ماقساتىندا ەكى ەلدىڭ اراسىندا جوعارى دەڭگەيدە پىكىر الماسۋ بايلانىسى تۇراقتى ءوربىپ كەلەدى.
حالىقارالىق ماسەلەلەردە قازاقستان مەن ليتۆانىڭ ۇستانىمدارى ءبىر-بىرىنە جاقىن جانە ۇقساس. ءماجىلىس توراعاسى ەۋروپا دەڭگەيىندە جاسالعان قازاقستاننىڭ باستامالارىنا قولداۋ ءبىلدىرىپ كەلە جاتقان ليتۆالىق تاراپقا ريزاشىلىعىن جەتكىزدى. و.مۇحامەدجانوۆ: «2010 جىلى ەلىمىزدىڭ ەقىۇ-عا توراعالىق ەتكەن كەزىندە جانە وسى مىڭجىلدىقتاعى ءبىرىنشى رەت بولعان ءسامميتتى ءوتكىزۋ بارىسىندا ليتۆانىڭ قولداۋىن ايرىقشا بايقادىق. قازىر ليتۆانىڭ ەقىۇ-عا جەتەكشىلىك ەتۋىنە ىجداعاتتىلىقپەن نازار سالىپ وتىرمىز», دەدى.
ءماجىلىس توراعاسى مارتەبەلى مەيمانعا: «ءسىزدىڭ ساپارىڭىز قازاقستان تاۋەلسىزدىگىنىڭ 20 جىلدىعى قارساڭىندا جۇزەگە اسىپ وتىر. ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ باسشىلىعى ارقاسىندا وسى جىلدار ىشىندە قازاقستان حالىقارالىق دەڭگەيدە, اتاپ ايتقاندا, بەيبىتشىلىك پەن قاۋىپسىزدىكتى نىعايتۋدا, ۇلتتارارالىق جانە ءدىندەرارالىق ۇنقاتىسۋدى جۇزەگە اسىرۋدا, يادرولىق قارۋسىز الەمدى ورناتۋدا تولاعاي تابىستارعا قول جەتكىزدى», دەپ مەملەكەتىمىزدىڭ جەتىستىكتەرىن باياندادى.
ءوز كەزەگىندە داليا گريباۋسكايتە حانىم ەلدەر اراسىنداعى ىنتىماقتاستىق بايلانىس جان-جاقتى دامۋ ءۇشىن قارىم-قاتىناستىڭ جوعارى دەڭگەيدە بولۋى ماڭىزدى ەكەنىن ايتتى. وسى رەتتە پارلامەنتارالىق بايلانىس تا ۇلكەن ماڭىزعا يە. «ەڭ باستىسى, بۇل ىستە ەكى ەلدىڭ ساياساتكەرلەرى دە, كاسىپكەرلەرى دە بەلسەندىلىك تانىتقانى ءجون. جانە دە ناقتى ناتيجەلەرگە قول جەتكىزىلۋى كەرەك. سونىڭ ىشىندە كەلىسىمدەردى زاڭ تۇرىندە بەكىتۋ پارلامەنتشىلەردىڭ قوسقان ۇلەسى بولماق», دەدى د.گريباۋسكايتە. سونداي-اق ول ەل اراسىنداعى, قالالار اراسىنداعى بايلانىستى دامىتۋ تۋرالى ويلارىمەن ءبولىستى. قازاقستاننىڭ جەتىستىكتەرى جايلى ايتا كەلىپ, كورىكتى استاناعا جىلى پىكىرىن جەتكىزدى.
داليا گريباۋسكايتە ءماجىلىستىڭ قۇرمەتتى قوناقتار كىتابىنا ىزگى تىلەگىن جازىپ, قولتاڭباسىن قالدىردى.