موڭعوليانىڭ جاڭادان سايلانعان پرەزيدەنتى حالتمااگين باتتۋلگا انت قابىلداپ, بۇرىنعى پرەزيدەنتتەن ءموردى الدى. وسىلايشا ول مەملەكەت باسشىسى مىندەتىنە رەسمي تۇردە كىرىستى, دەپ حابارلايدى قازاقپارات mmontsame.mn-گە سىلتەمە جاساپ.
يناۋگۋراتسيانىڭ سالتاناتتى ءراسىمى مەملەكەتتىك رەزيدەنتسيانىڭ ۇلكەن زالىندا ءوتتى. حالتمااگين باتتۋلگا پوديۋمعا شىعىپ, قولىنا موڭعوليانىڭ كونستيتۋتسياسىن الىپ, انت بەردى. سوڭىنان جاڭا پرەزيدەنت ءسوز سويلەدى.
«مەن ەڭ الدىمەن, كەدەيلىك دەڭگەيىن تومەندەتۋمەن جانە موڭعوليا ازاماتتارى ءۇشىن جاڭا جۇمىس ورىندارىن اشۋمەن اينالىساتىن بولامىن», - دەپ اتاپ ءوتتى ول.
حالتمااگين باتتۋلگا ءوز ازاماتتارىنىڭ پىكىرىن مۇقيات تىڭداپ, ۇلتتىق بىرلىكتى قامتاماسىز ەتەتىنىن ايتتى. «موڭعوليا ۇلتتىق ونەركاسىبى دامىعان جانە قىسقا مەرزىم ىشىندە ءوز ەكونوميكاسىن كوتەرە بىلگەن ەل بولادى», - دەدى موڭعوليانىڭ جاڭا پرەزيدەنتى يناۋگۋراتسيانىڭ سالتاناتىندا.
ەسكە سالايىق, موڭعوليانىڭ كونستيتۋتسياسىنا سايكەس پرەزيدەنت وكىلدىگىنىڭ مەرزىمى ءتورت جىلعا سوزىلادى.