«جاتتىقتىرۋشىلار شتابى «Cuba Domadores»-كە قارسى فينالعا شىعاتىن بوكسشىلار قۇرامىن انىقتادى. رينگكە ءبىزدىڭ كلۋبىمىزدىڭ قۇرامىنان كەلەسى بوكسشىلار شىعادى: تەمىرتاس ءجۇسىپوۆ (49 كگ), ولجاس ساتتىباەۆ (52 كگ), ءىلياس سۇلەيمەنوۆ (56 كگ), زاكير سافيۋللين (60 كگ), ءدىلمۇرات ميجيتوۆ (64 كگ), اسلانبەك شىمبەرگەنوۆ (69 كگ), ارمان رىسبەك (81 كگ), انتون پينچۋك (91 كگ) جانە ولجاس بۋكاەۆ (+91 كگ)», - دەدى قازاقستاندىق كوماندانىڭ باس باپكەرى نۇرلان اقۇرپەكوۆ. ونىڭ ايتۋىنشا, «Astana Arlans» اتىنان 75 كگ سالماق دارەجەسىندە كىمنىڭ ونەر كورسەتەتىندىگى ازىرگە بەلگىسىز, ول بۇگىن شەشىلۋى ءتيىس. «وسى سالماقتا شىعادى دەپ جوسپارلاعان ءابىلحان امانقۇل بۇگىن مەديتسينالىق تەكسەرۋدەن ءوتىپ, رەنتگەنگە تۇسەدى. دارىگەرلەردىڭ تۇجىرىمىنان كەيىن عانا ونىڭ فينالعا شىعۋ, شىقپاۋى بەلگىلى بولادى. ەگەر, جاراقات العان بوكسشىنىڭ شارشى الاڭعا شىعۋىنا تىيىم سالىنسا, ونىڭ ورنىنا اتالعان سالماق دارەجەسىندە ساپارباي ايداروۆ شىعادى», - دەدى اقۇرپەكوۆ.
الداعى سەنبىدە دۇنيەجۇزىلىك بوكس سەرياسىنىڭ فينالى وتەدى. قازاقستان استاناسىنىڭ شارشى الاڭىندا Astana Arlans پەن Cuba Domadores كوماندالارىنىڭ بوكسشىلارى كەزدەسەدى, دەپ حابارلايدى Sports.kz.