رۋحاني كەلىسىم كۇنى اياسىندا ەل اۋماعىندا قايىرىمدىلىق شارالارىن ۇيىمداستىرۋ تۋرالى يگى باستامانى تاياۋدا حالىقارالىق «رۋحاني كەلىسىم كونگرەسى» قوعامدىق قورىنىڭ پرەزيدەنتى, پارلامەنت سەناتىنىڭ دەپۋتاتى تولەگەن مۇحامەدجانوۆ كوتەرگەن بولاتىن. بۇعان دەيىن رۋحاني كەلىسىم كۇنى اياسىندا ەل اۋماعىندا جالپى سانى 60 000 وتانداسىمىز قاتىسقان قايىرىمدىلىق شاراسى وتكەن ەدى. بيىلعى جىلى دا وسى ءداستۇردى جاڭعىرتىپ, قايىرىمدىلىق اكتسياسىن جاڭعىرتۋ قاجەتتىگى تۋرالى ۇسىنىستى استانا قالاسىنداعى ۇكىمەتتىك ەمەس ۇيىمدار دا قولداپ, وزدەرىنىڭ وتانداستارعا ۇندەۋىن تاراتتى. ۇندەۋدە بىلاي دەلىنەدى.
قۇرمەتتى قازاقستاندىقتار! وتانداستار! قازاقستان رەسپۋبليكاسىنىڭ تاۋەلسىزدىگىنە 20 جىل تولىپ وتىرعان بيىلعى ايرىقشا جىلدا ءبىز قاسيەتتى تاۋەلسىزدىكتىڭ ادامدار بويىنان قانداي شىعارماشىلىق ەكپىن, قانداي تىڭ كۇشتەر اشقاندىعىنىڭ كۋاسى بولۋدامىز.
تاريح قويناۋىنا ەنگەن بۇل جىلدار ارالىعىندا ءبىزدىڭ حالىق ءوزىنىڭ ۇلتارالىق قارىم-قاتىناستىڭ تەپە-تەڭدىگىن ساقتاي وتىرىپ, بەيبىت ءومىر سۇرە الاتىن قوناقجاي ەل ەكەندىگىن كورسەتە ءبىلدى, جاڭا رۋحاني باستامالاردى تۋدىرا الدى. وسىنداي باستامالاردىڭ قاتارىندا رۋحاني كەلىسىم كۇنى اتتى ەرەكشە مەرەكە دە بار, ايتا كەتەرلىك ءجايت – ءدال وسىنداي ەرەكشە كۇن الەمنىڭ ءبىر دە ءبىر ەلىندە جوقتىعى. بۇل باستاما 1992 جىلى 18 قازاندا الماتى قالاسىندا وتكەن I بۇكىلالەمدىك رۋحاني كەلىسىم كۇنى اياسىندا كوتەرىلىپ, ەل تاراپىنان قولداۋ تاپقان ەدى. ارادا بەس جىل وتكەندە 1997 جىلى وسى مەرەكەگە وراي مەرەكەلىك داستارقان قازاقستاننىڭ تۇكپىر-تۇكپىرىندە ۇيىمداستىرىلىپ, وعان جالپى سانى 60 مىڭ ادام قاتىسقان ەدى. ولاردىڭ ءبارىنىڭ باسىن ءبىر جەرگە قوسقان بىرلىك, ىزگىلىك پەن قايىرىمدىلىق, جەتىمدەرگە, قارتتار مەن جالعىزىلىكتى جاندارعا, ناۋقاس جاندار مەن مۇگەدەكتەرگە دەگەن وڭ نيەت بولاتىن.
ءبىزدىڭ ەلباسىمىز نۇرسۇلتان نازارباەۆتىڭ رۋحاني كەلىسىم قوزعالىسىنا بەرگەن جوعارى باعاسىن ماقتان تۇتامىز, وسى كۇنى ءوزىنىڭ بارشا قازاقستاندىققا دەگەن ىزگى تىلەكتەرىن دە جولداعان ەدى.
قۇرمەتتى وتانداستار, رۋحاني كەلىسىم كۇنى اياسىندا ءبىز بارشاڭىزدى, قايىرىمدىلىق قاعيدالارىن ساقتاي وتىرىپ, ءبىر-ءبىرىمىزگە كومەك بەرۋگە, قايىرىمدىلىق قاجەت كەزدە سۇيەۋ بولۋعا شاقىرامىز. بۇل ادام ءوزىنىڭ جانى ىزگى پەندە ەكەنىن تۇسىنەتىن, جاراتۋشى يەنىڭ «بەرگەن ادامنىڭ قولى سەمىپ قالمايدى» دەگەن سوزدەرىن نەگىزگە الۋ كەرەك.
دەمەۋشىلىك – بۇل تەك قانا جاقسى ىقىلاس ەمەس, بۇل ىزگىلىك پەن قايىرىمدىلىقتىڭ جۇرەكتەن شىققان شىنايىلىعى. بۇل ەگەر شىن جۇرەكتەن شىققان يگى قاسيەتتەر بولسا قايىرىمدىلىققا قول جەتكىزگەن ادامنىڭ دا جۇرەگىنە ىزگىلىك نۇرىن سەبەرى ءسوزسىز. وسى ارقىلى ادامدار اراسىنداعى رۋحاني بايلانىس ورنايدى.
ءبىز بۇگىن كاسىپكەرلەردى, ساياساتكەرلەردى, قوعام قايراتكەرلەرىن جانە ءدىنباسىلارىن, رەسپۋبليكامىزدىڭ بارلىق ازاماتتارىن 18 قازان كۇنى وتەتىن قايىرىمدىلىق استارعا اتسالىسۋعا شاقىرامىز. داستارقان باسىندا ءبىر ءۇزىم ناندى ءبولىپ جەۋدىڭ ءبىزدىڭ حالىق ءۇشىن قانداي ماعىناسى بارىن ءبارىمىز دە بىلەمىز. بۇل كۇن ءبىزدىڭ بارشامىز ءۇشىن رۋحاني كەلىسىمنىڭ مەرەيىن كوتەرگەن, ۇلت پەن دىنگە بولىنبەي ءبىرگە اتاپ وتەتىن مەرەكەگە اينالسىن.
ۇندەۋگە بەلسەندى جاستار اتىنان قوعام, عىلىم, ۇكىمەتتىك ەمەس ۇيىمدار وكىلدەرى قول قويعان.