فرانتسيانىڭ رەنن قالاسىندا الماتى قالاسىنىڭ ءمادەنيەت كۇندەرى بولىپ ءوتتى. قالالىق «Morpa» ساياباعىنان الماتى اللەياسى اشىلىپ, وندا ايگىلى قازاق اپورتىنىڭ وسكىندەرى وتىرعىزىلدى.
اسەم الماتىنىڭ اتىن يەلەنگەن اللەيانىڭ سالتاناتتى اشىلۋ راسىمىنە الماتى قالاسى اكىمىنىڭ ورىنباسارى سەرىك سەيدۋمانوۆ, قازاقستان رەسپۋبليكاسىنىڭ فرانتسيا مەملەكەتىندەگى توتەنشە جانە وكىلەتتى ەلشىسى نۇرلان دانەنوۆ, رەنن قالاسىنىڭ مەرى دەنيل دە لاۆو, ۆيتسە-مەر روزەلين لە فرانسۋا حانىم جانە باۋىرلاس قاتىناستار كوميتەتىنىڭ توراعاسى تەرري ليبريح مىرزالار قاتىستى.
وسى شارا اياسىندا رەننىڭ Shambres Liberte كەشەنىندە قازاق ۇلتتىق قولونەر تۋىندىلارىنىڭ كورمەسى مەن جارمەڭكەسى وتكىزىلدى. كورەرمەندەردى اسىرەسە قازاقتىڭ كيىز باسۋ, ساز بالشىقتان ىدىس جاساۋ, الاشا تىگۋ جانە شي توقۋ سەكىلدى ۇلتتىق ونەرى ەرەكشە باۋرادى.
فرانتسۋز جەرىندەگى الماتى ءمادەنيەتىنىڭ كۇندەرى «سازگەن سازى» فولكلورلىق-ەتنوگرافيالىق ءانسامبلى مەن «ارناۋ» انسامبلىنىڭ جانە قازاقستاننىڭ ەڭبەك سىڭىرگەن ءارتىسى ايگۇل قوسانوۆا, اباي اتىنداعى وپەرا جانە بالەت تەاترىنىڭ سوليستەرى الفيا كارىموۆا مەن مەدەت شوتاباەۆتاردىڭ قاتىسۋىمەن ءوتكەن گالا-كونتسەرتپەن اياقتالدى. Shambres Liberte كەشەنىنىڭ ساحناسىنان قۇرمانعازى مەن نۇرعيسانىڭ, سونداي-اق فرانتسۋزدىڭ ايگىلى كومپوزيتورلارىنىڭ كۇيلەرى شاشۋ بوپ توگىلدى.
قانات ەسكەندىر,
الماتى.