تىلەكتەر ورىندالادى
قوعامنىڭ باستى بايلىعى, ادام ءومىرىنىڭ ساپالىق وزىق كورسەتكىشى تۇرعىن ءۇي. «ءۇيى جوقتىڭ, كۇيى جوق» دەپ بەكەر ايتىلماعان. ەل ەكونوميكاسىنىڭ قارقىندى دامۋىنا بايلانىستى ەلباسىنىڭ بيىلعى جولداۋىندا ماسەلەنىڭ ءمانىسى ايقىندالىپ, 2011-2020 جىلدارعا ارنالعان تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى قولعا الىندى. جەتىسۋدىڭ باس قالاسى تالدىقورعاندا دا تياناعىن كەلتىرەر جۇمىستار جەتكىلىكتى.
«ەگەمەن قازاقستان» گازەتىنىڭ الماتى وبلىسىنداعى ءتىلشىسى كۇمىسجان بايجان تالدىقورعان قالاسىنىڭ اكىمى ماحاببات بيگەلديەۆكە
– ءسىز بۇعان نە دەيسىز؟
– شاھار حالقىنىڭ كوپشىلىگى كوپ قاباتتى تۇرعىن ۇيدە تۇراتىندىقتان, سۋمەن, جىلۋمەن قامتۋ, باسقا دا جۇمىستار قىزمەتىمىزدىڭ نەگىزگى بولىگى دەسەك, ارتىق ايتپاعانىم. ونىڭ ۇستىنە توزىعى جەتكەن باسپانالاردى ءجوندەۋ دە اسا قاجەت. «نۇر وتان» حالىقتىق-دەموكراتيالىق پارتياسىنىڭ قالالىق فيليالى, «تالدىقورعان قالالىق تۇرعىن ءۇي قىزمەتى» جاۋاپكەرشىلىگى شەكتەۋلى سەرىكتەستىگى جانە پارتيالىق باقىلاۋ كوميسسياسى, سالاعا جاۋاپتى ماماندار كوممۋنالدى ۇيلەردە تۇراتىن تۇرعىندارمەن كەزدەسۋلەر وتكىزىپ, ولاردىڭ تالاپ-تىلەكتەرىن زەردەلەپ, جۇمىس اۋقىمى بەلگىلەنگەن-ءدى.
قالادا كۇردەلى جوندەۋدى قاجەت ەتەتىن كوپ قاباتتى تۇرعىن ۇيلەردىڭ سانى وسىلايشا ايقىندالدى. تالدىقورعان قالاسىنداعى وسىنداي 15 ءۇيدى قالپىنا كەلتىرۋ, جوندەۋگە بيىل 247 ملن. تەڭگە ءبولىنىپ, ءتيىمدى جۇمساۋعا نازار اۋدارىلدى. باعدارلاماعا سايكەس ۇكىمەت جوندەۋ جۇمىستارىنا قاجەتتى قارجىنى نەسيە رەتىندە وتە تومەنگى پايىزبەن بەرگەنىن ايتقان ءجون. تۇرعىندار بۇل قارجىنى جەتى جىلدا قايتارۋلارى ءتيىس. ماسەلەن, ءار پاتەرگە شاققانداعى ونىڭ مولشەرى مىڭ تەڭگە مەن ءۇش مىڭ تەڭگە ارالىعىندا بولىپ وتىر.
تۇرعىن ۇيلەردىڭ اۋلالارى دا جاڭارتىلىپ, اباتتاندىرۋ جالعاسىپ كەلەدى. كۇزدىڭ جىلى كۇندەرىن پايدالانىپ, شاھارداعى تاعى دا 8 ءۇيدەگى اعىمداعى جوندەۋ جۇمىستارى اياقتالىپ قالدى. ءبىر سوزبەن ايتقاندا, قالاداعى كوپ قاباتتى ءساندى جاڭا ۇيلەرمەن قاتار, ەسكىلەرىن جاڭارتىپ, ساۋلەتتەندىرۋ باعىتىنداعى جۇمىس ءالى دە جالعاساتىنى انىق.
الماتى وبلىسى.