اقش-تىڭ قورعانىس ءمينيسترى لەون پانەتتا ءيزرايلدى «وقشاۋلاۋ» ساياساتىنىڭ كۇش الىپ كەلە جاتقانىنا ءوز الاڭداۋشىلىعىن ءبىلدىرىپ, وسى ەلدىڭ بيلىگىندەگىلەردى وڭىردەگى بۇرىنعى ارىپتەستەرىمەن ديپلوماتيالىق قاتىناستى قالپىنا كەلتىرۋگە شاقىردى.
پەنتاگون باسشىسىنىڭ پىكىرىنشە, ءيزرايلدى «وقشاۋلاندىرۋدىڭ» ارتا ءتۇسۋى تاياۋ شىعىستا «اراب كوكتەمى» دەگەن اتقا يە بولعان توڭكەرىستەرگە سوقتىردى. وڭىردەگى بۇل وزگەرىستەر يزرايل ءۇشىن ءتيىمسىز. ۆاشينگتون ءيزرايلدىڭ تۇركيامەن, ەگيپەتپەن, باسقا دا ەلدەرمەن ىنتىماقتاستىق ورناتۋىنا جان-جاقتى كومەك كورسەتىپ, ىقپال ەتۋگە دايىن. پەنتاگون باسشىسى تاياۋ شىعىسقا ساپارى اياسىندا يزرايل مەن پالەستينا باسشىلارىنىڭ كەزدەسۋىنە قاتىسپاق.
كوپتەگەن قىزمەتكەر قىسقارتىلادى
«رەيتەر» اگەنتتىگىنىڭ حابارلاۋىنشا, گرەكيا ۇكىمەتى بيۋدجەت شىعىندارىن قىسقارتۋ جونىندەگى شارالار بويىنشا 30 مىڭعا جۋىق مەملەكەتتىك قىزمەتشىنى جۇمىستان بوساتۋ تۋرالى جوسپارعا كەلىسىم بەردى.
اتى-ءجونىن جاريا ەتپەۋدى وتىنگەن ۆيتسە-ءمينيستردىڭ ايتۋىنشا, قىسقارتۋعا جاتقىزىلاتىن مەملەكەتتىك قىزمەتشىلەردىڭ العاشقى بولىگى الدىمەن «قىسقارتۋعا» تۇسەدى. وسىلايشا جىل اياعىنا قاراي 30 مىڭ شەنەۋنىك ەڭبەك رەزەرۆىنە اۋىستىرىلاتىن بولادى. گرەكيا ۇكىمەتىنىڭ باعالاۋىنشا, ەلدىڭ 2011 جىلعى بيۋدجەت تاپشىلىعى ىشكى جالپى ءونىمنىڭ 8,5 پايىزىن قۇراعان. بۇل مەملەكەت بۇگىندە دەفولت شەگىندە تۇر, ەلدىڭ مەملەكەتتىك قارىزى 350 ميلليارد ەۋروعا جۋىق.
سايلاۋ ناۋقانىن نارىشكين باسقارادى
«ەدينايا روسسيا» پارتياسىنىڭ سايلاۋ ناۋقانىن پرەزيدەنت اكىمشىلىگىنىڭ باسشىسى سەرگەي نارىشكين باسقاراتىن بولدى. «كوممەرسانت» باسىلىمىنىڭ جازۋىنشا, مەملەكەتتىك دۋما سايلاۋىندا «ەدينايا روسسيانىڭ» سايلاۋداعى ءتىزىمىن دميتري مەدۆەدەۆ باستايتىندىعىنا بايلانىستى وسىنداي شەشىم قابىلدانعان.
اتالعان باسىلىمنىڭ دەرەكتەرىنە قاراعاندا, س.نارىشكين كەشەگى كۇنگە دەيىن سايلاۋ ناۋقانى جونىندە ەكى جيىن وتكىزىپتى. ال «ربك» اگەنتتىگىنىڭ تاراتقان اقپاراتتارى بويىنشا, سايلاۋ ناۋقانى بارىسىندا ايماقتار ورتالىقتان قارجىلاي كومەك المايدى. وڭىرلەردەگى سايلاۋ ناۋقانىنا بيزنەسمەندەر دەمەۋشىلىك كورسەتەتىن بولادى.
تابيعي گاز كەن ورنى تابىلدى
شري-لانكادا تابيعي گاز كەن ورنى تابىلعان. ەل تاريحىندا تۇڭعىش رەت تابىلعان تابيعي گاز ورنى تەڭىز دەڭگەيىنەن 4,3 مىڭ مەتر تومەندىكتە, ەلدىڭ سولتۇستىك-باتىسىندا كورىنەدى.
تابىلعان تابيعي گاز كەنىنىڭ كولەمى قانشالىقتى, ول وڭدەۋگە جارامدى ما, بۇل جاعى ازىرگە بەلگىسىز. بۇرعىلاۋ جۇمىستارىن جۇرگىزگەن Cairn Lanka كومپانياسى وكىلىنىڭ سوزىنە قاراعاندا, ونداعى كوممەرتسيالىق ءونىم كولەمىن انىقتاۋ ءۇشىن ءبىرشاما ۋاقىت قاجەت. ال شري-لانكا مينيسترلەر كابينەتى مۇشەسىنىڭ ايتۋىنشا, تابىلعان بۇل كەن ورنى شەت مەملەكەتتەردىڭ وسى ەل اۋماعىندا ەنەرگەتيكالىق رەسۋرستاردى بارلاۋعا قىزىقتىرادى دەگەن ۇمىتتە.
وق اتۋعا بۇيرىق بەرمەگەن
ەگيپەتتىڭ ۋاقىتشا باسشىسى جانە قارۋلى كۇشتەر جوعارعى كەڭەسىنىڭ توراعاسى حۋسەين تانتاۆي حوسني مۇباراكتىڭ 2011 جىلعى قاڭتار-اقپان ايلارىنداعى حالىق تولقۋلارى بارىسىندا شەرۋگە شىققاندارعا قارسى وق اتۋ جونىندە اسكەريلەرگە بۇيرىق بەرمەگەنىن مالىمدەدى.
اسكەري گەنەرال بۇل ءسوزىن 2 قازاندا ەكس-پرەزيدەنتتىڭ ءىسى بويىنشا وتكەن جابىق سوت تىڭداۋى كەزىندە ايتقان. ءدال وسىنداي مالىمدەمەنى قىركۇيەكتىڭ باسىندا قاۋىپسىزدىك كۇشتەرىنىڭ ساردارى مەن پوليتسيا گەنەرالى دا جاساعان بولاتىن. دەگەنمەن, رەسمي مالىمەتتەر بويىنشا, ەگيپەتتەگى حالىق تولقۋى كەزىندە 850-گە جۋىق ادام قازا تاپقان ەدى. كوپشىلىك ونى ارميا مەن پوليتسيادان كورەدى.
ءراببانيدىڭ ولىمىنە قاتىسى جوق
اۋعاندىق «حاككاني» ەكسترەميستىك توبى ليدەرلەرىنىڭ ءبىرى سيرادج حاككاني وزدەرىنىڭ اۋعانستاننىڭ ەكس-پرەزيدەنتى بۋرحانۋددين ءراببانيدىڭ ولىمىنە قاتىسى جوقتىعىن مالىمدەدى. مۇنى ول ۆۆس News جاڭالىقتار قىزمەتىنە بەرگەن سۇحباتىندا ايتقان.
س.حاككانيدىڭ سوزىنە قاراعاندا, اتالعان توپتىڭ وكىلدەرى مۇسىلمان ەلدەرىنىڭ دە, مۇسىلمان ەمەس ەلدەردىڭ دە بارلاۋ قىزمەتىمەن «بايلانىس جاساپ» تۇرادى. ولاردىڭ ىشىندە اقش تا بار. اقش «حاككاني» ەكسترەميستىك توبىن جيھاد جاساۋدى قويىپ, اۋعانستان بيلىگىمەن كەلىسسوز جۇرگىزۋگە شاقىرادى. كەيبىر مالىمەتتەر بويىنشا, «حاككاني» توبىندا 10-15 مىڭداي ادام بار. توپ «تاليباننىڭ» بۇيرىقتارىمەن قىزمەت ەتەدى.
سىيلىق لاۋرەاتتارى انىقتالدى
بىرقاتار اقپارات اگەنتتىكتەرىنىڭ حابارلاۋىنشا, مەديتسينا سالاسى بويىنشا نوبەل سىيلىعىنىڭ لاۋرەاتتارى انىقتالعان.
بيىلعى جىلى بۇل اتالىمداعى نوبەل سىيلىعىنا ءۇش عالىم – امەريكالىق بريۋس بەتلەر, كانادالىق رالف شتەيمان جانە ليۋكسەمبۋرگ ازاماتى جيۋل حوففان يە بولىپ وتىر. ستوكگولمدەگى كارولين مەديتسينا ينستيتۋتىنىڭ جانىنداعى نوبەل سىيلىعىن تاعايىنداۋ جونىندەگى كوميتەتتىڭ مالىمدەۋىنشە, عالىمدار بۇل سىيلىققا تۋا بىتكەن يممۋندىق جۇيەگە قاتىستى جۇرگىزگەن زەرتتەۋلەرى ءۇشىن يە بولعان. سىيلىق 10 جەلتوقساندا ستوكگولمدە سالتاناتتى جاعدايدا تاپسىرىلادى.
قىسقا قايىرىپ ايتقاندا:
*فيليپپين سودىرلارى وسىدان ەكى ايدان استام ۋاقىت بۇرىن كەپىلدىككە العان اقش ازاماتشاسىن بوساتتى. سودىرلارعا اقشا تولەگەنى نەمەسە تولەمەگەنى تۋرالى اقپارات جوق.
*رەسەيدىڭ ۆولگوگراد وبلىسىنداعى كازاكتار جاساعىنىڭ ءتورت مۇشەسى ستانيتسا اتامانىمەن قوسا ەسىرتكى ساۋدالادى دەگەن كۇدىكپەن تۇتقىندالدى. ولاردان 30 كيلودان استام ماريحۋانا تاركىلەندى.
*نەمىس ەكونوميكالىق زەرتتەۋلەر ينستيتۋتىنىڭ مالىمەتتەرى بويىنشا, گەرمانيا ءۇشىن اۋعانستانداعى اسكەري ناۋقانعا قاتىسۋ 17 ميلليارد ەۋروعا تۇسكەن.
*تۋۆالۋ مەملەكەتىندە اۋىز سۋدىڭ جەتىسپەۋىنە بايلانىستى توتەنشە جاعداي ەنگىزىلدى. جاڭا زەلانديا ۇكىمەتى بۇل ەلگە ۇشاقپەن اۋىز سۋ جەتكىزىپ جاتىر.
ينتەرنەت ماتەريالدارى نەگىزىندە ازىرلەندى.