عۇلاما جازۋشىنىڭ تۋعان كۇنىنە وراي: عۇلاما جازۋشى مۇحتار اۋەزوۆتىڭ تۋعان كۇنى تۋعان جەرىندە جىل سايىن ءوز مانىندە اتاپ ءوتىلىپ كەلەدى.
كەيىنگى جاس ۇرپاققا تاعىلىمى مول بۇل يگىلىكتى شارادا جىلداعىداي, اسىرەسە, وسىنداعى پەداگوگيكا كوللەدجى بەلسەندىلىك تانىتتى. ال ونىڭ دا سەبەبى جوق ەمەس. ويتكەنى, ءبىر كەزدە مۇحاڭ اتالعان وقۋ ورنى جايعاسقان عيماراتتا وقىعان. ونىڭ سىرتىندا پەداگوگيكا كوللەدجى, مىنە, ۇزاق جىلدان بەرى عۇلاما جازۋشىنىڭ اتىن قۇرمەتپەن الىپ كەلەدى. جازۋشىنىڭ تۋعان كۇنىنە وراي تۇسكە دەيىن كوللەدجدە وقۋشىلار جيىنى وتسە, ءتۇس اۋا بۇل شارا بۇلاردىڭ كۇشىمەن اباي تەاترىندا جالعاستى. «كوللەدجدىڭ الدا كەلە جاتقان 110 جىلدىق تويىنا دەيىن وقۋ ورنىنىڭ تاريحى مەن مۇحاڭنىڭ سول كەزدەگى ءومىر جولى تۋرالى دەرەكتى كىتاپ شىعارساق دەگەن ويىمىز بار», دەيدى كوللەدج ديرەكتورى, عىلىم كانديداتى شاعان الدامجارقىزى.
داۋلەت سەيسەن ۇلى, سەمەي.
ارداگەرلەر اللەياسى اشىلدى. شىمكەنتتەگى دەندروباقتا تاۋەلسىزدىكتىڭ 20 جىلدىعى مەرەكەسى قارساڭىندا “ارداگەرلەر اللەياسى” اشىلدى. تىزەسىندەگى نەمەرەسىن ايالاعان قارت ءمۇسىنى وتكەنگە سالاۋات ايتقان, بولاشاققا جاقسى ۇمىتپەن قارايتىن دانالىقتىڭ بولمىسىنداي سەزىلەدى. ارداگەرلەردى سالتاناتتى جيىندا وبلىستىق ءماسليحاتتىڭ حاتشىسى ءا.دوسبولوۆ, وبلىس اكىمىنىڭ ورىنباسارى ءا.بەكتاەۆ, ەڭبەك ەرى ب.شۇكىربەكوۆ قۇتتىقتادى. جىردان شاشۋ شاشىلعان سوڭ قارتتار اللەياعا ارشا كوشەتتەرىن وتىرعىزدى. نۇراي” مەيرامحاناسىندا “باتامەن باعىڭ اشىلسىن” كىتابىنىڭ تۇساۋكەسەر ءراسىمى ءوتتى.
باقتيار تايجان, وڭتۇستىك قازاقستان وبلىسى.
توراعا تولىمدى ىستەرگە وڭ باعا بەردى. مەملەكەتتىك قىزمەت ىستەرى جونىندەگى اگەنتتىك توراعاسى ءاليحان بايمەنوۆ وسى قىزمەتكە تاعايىندالعان قىسقا مەرزىمدە اقمولا وبلىسىنا جۇمىس ساپارىمەن ەكىنشى رەت كەلدى. ول وبلىس اكىمى سەرگەي دياچەنكومەن بىرگە زەرەندى اۋدانىنىڭ ەكونوميكالىق جانە الەۋمەتتىك دامۋ باعىتىمەن تانىستى. شاعالالى اۋىلىنداعى اگروبيزنەس كوللەدجىنىڭ وقۋشىلارى الدىندا ەلباسى جولداۋىنان تۋىندايتىن وزەكتى وزگەرىستەر تۋرالى لەكتسيا-بايانداما جاسادى. سونداي-اق اگەنتتىك توراعاسى جاڭا مونشانىڭ اشىلۋ سالتاناتىنا قاتىستى. «وسى قاراپايىم قۋانىشتىڭ ءوزى ەلىمىزدە جۇرگىزىلىپ جاتقان رەفورمالاردىڭ باياندىلىعىن بىلدىرەدى», – دەدى ول. سولتۇستىك وڭىردەگى مەكتەبى ەڭ كوپ اۋدان ساپالىق كورسەتكىشتەردى بيىك دەڭگەيگە كوتەرە ءبىلدى. توراعا اۋدان ورتالىعىنداعى №1 مەكتەپتە دە جاقسى ىستەردىڭ كوپتىگىنە ريزاشىلىعىن ءبىلدىردى. ال, استىق قابىلداۋ كاسىپورنىنداعى قاربالاس ەڭبەك اۋەنىنە قۇلاق تۇرگەن ءا.بايمەنوۆ ۇجىم مۇشەلەرىنىڭ يگىلىككە كەنەلۋىنە تىلەك قوستى.
باقبەرگەن امالبەك, اقمولا وبلىسى.
باسقوسۋدا بايقاۋ قورىتىندىلاندى. وبلىس ورتالىعىنداعى «كوسموس» مەيرامحاناسىندا «سال اۋرۋلارىنا شالدىققان ازاماتتاردى قورعاۋدىڭ اقتوبە قالالىق قوعامى» قوعامدىق بىرلەستىگىنىڭ مۇشەلەرى باس قوستى. قازىر قوعامدىق بىرلەستىككە 1200 ادام مۇشە. بۇل جولى باسقوسۋعا جينالعان جۇزگە جۋىق ادامعا داستارقان جايىلىپ, بۇعان دەيىن «ەرەكشە بالا» جوباسى اياسىندا ەل تاۋەلسىزدىگىنىڭ 20 جىلدىعىنا وراي مۇگەدەك بالالار اراسىندا ۇيىمداستىرىلعان «قۋانىشتىڭ 20 ءساتى» اتتى فوتوسۋرەتتەر بايقاۋى قورىتىندىلاندى. بايقاۋدى ۇيىمداستىرۋعا وبلىستىق ىشكى ساياسات باسقارماسى قارجىلاي قولداۋ كورسەتتى, سونداي-اق, «دوستىق» ءۇيى مەن ء«ديماشالي» شىعارماشىلىق ورتالىعى دا كومەك قولىن سوزدى. ارقايسىسى بەس-بەستەن سۋرەت تاپسىرعان 30 ۇمىتكەردىڭ 20-سى ىرىكتەلىپ, «باقىتتى كەزەڭ», «كۇن ساۋلەلى كۇلكى», «وتانىم, ولەڭىم, ءوزىم», «ادال دوستىق» جانە «مەن ءومىردى سۇيەمىن» نوميناتسيالارى بويىنشا ماراپاتتالدى. بايقاۋعا قاتىسۋشىلار ماقتاۋ قاعازدارى مەن باعالى سىيلىقتارعا يە بولدى.
ساتىبالدى ءساۋىرباي, اقتوبە وبلىسى.
جاس كوشباسشىلار فورۋمى. جىلىوي اۋدانىندا 11 كوشباسشى كلۋبتان 100-گە جۋىق جاس باس قوسقان العاشقى فورۋم ءوتتى. فورۋم اياسىندا «ازيمۋت» تۋريستىك كلۋبى اۋدان تابيعاتىنىڭ كورىكتى جەرلەرىنەن, فلوراسى مەن فاۋناسىنان فوتوكورمە ۇيىمداستىردى. «بۇل – ءتۇرلى يدەيالار, ءوزارا دوستىق پەن ىنتىماق بيلىك ەتەتىن ەرەكشە باسقوسۋ. سونىمەن قاتار, بالالاردىڭ شىعارماشىلىعىن, اقىل-ويىن دامىتادى», دەيدى فورۋمعا جەتەكشىلىك ەتكەن پسيحولوگ نەللي كۋليكوۆسكيح. فورۋمدا جاستار ءوز تاجىريبەلەرىمەن ءبولىسىپ, الەۋمەتتىك پروبلەمالار جونىندە پىكىر الماستى. الاۋ جاعىپ, ءتۇرلى ويىندارعا قاتىستى.
جولداسبەك شوپەعۇل, اتىراۋ وبلىسى.
«جايىق تاڭىنا» – 80 جىل. كەشەگى نارىقتىڭ وتپەلى كەزەڭى اۋداندىق گازەتتەردىڭ جاعدايىن قيىنداتىپ جىبەرگەنى بەلگىلى. سونداي قىسپاقتان كىدىرمەي, مۇدىرمەي وتكەن باسىلىمداردىڭ ءبىرى – اقجايىق اۋداندىق «جايىق تاڭى» گازەتى. وتكەن اپتادا ونىڭ 80 جىلدىعى كەڭىنەن اتالىپ ءوتتى. ايتۋلى داتا قۇرمەتىنە اقىندار ايتىسى ۇيىمداستىرىلىپ, گازەتتىڭ كەشەگىسى مەن بۇگىنگىسىن بەينەلەيتىن بەينەسيۋجەتتەر كورسەتىلدى. ارنايى شاقىرىلعان قوناقتار قۇتتىقتاۋ تىلەكتەرىن ايتتى.
تەمىر قۇسايىن, باتىس قازاقستان وبلىسى.
سوت ورىنداۋشىلار جۇمىسىن باستادى. وسىدان ءبىراز بۇرىن ەلباسى جەكە سوت ورىنداۋشىلار ينستيتۋتىن ەنگىزۋ تۋرالى وي ايتقان. اتالعان ماسەلەنى زەرتتەپ جانە ونى ءبىزدىڭ قوعامعا ەنگىزۋ كەرەك دەپ تاپسىرعان ەدى. وسى ورايدا ادىلەت مينيسترلىگىنىڭ سوت اكتىلەرىن ورىنداۋ كوميتەتى بيىلعى ناۋرىز ايىنان باستاپ ۇمىتكەر تۇلعالاردان ليتسەنزيا الۋعا قۇجاتتار قابىلداعان بولاتىن. قىزىلوردا وبلىسى بويىنشا 4 ورىن بولىنگەن. وتكەن اپتادا كوميتەت توراعاسىنىڭ بۇيرىعىمەن مارات ابدۋل, سەرىكقالي قازانقاپوۆ جانە نۇرلىبەك قىدىرباەۆ جەكە سوت ورىنداۋشى بولىپ تاعايىندالدى. سونداي-اق وڭىرلىك القا قۇرىلىپ, ونىڭ توراعالىعىنا وبلىس پروكۋراتۋرا ورگاندارىنىڭ ارداگەرى مارات ابدۋل سايلاندى. جەكە سوت ورىنداۋشى قىزمەتىنە اقى تولەۋ بورىشكەردەن ءوندىرىپ الىنعان قاراجات ەسەبىنەن جۇرگىزىلەتىنىن ايتا كەتۋ كەرەك. ولار شامامەن وندىرىلگەن سومانىڭ 10 پايىزىن يەلەنەدى.
ەرجان بايتىلەس, قىزىلوردا.