قازاقستان رەسپۋبليكاسىنىڭ ءىىى پاراوليمپيالىق ويىندارى ۇستىمىزدەگى جىلدىڭ 5-9 قازانى كەزەڭىندە شىمكەنت قالاسىندا وتەدى. جارىسقا ەلىمىزدىڭ بارلىق وڭىرلەرىنەن 507 سپورتشى قاتىسادى. التى پاراوليمپيالىق سپورت ءتۇرى بويىنشا 523-تەن ارتىق مەدالدار جيىنتىعى ساراپقا سالىنادى: ءجۇزۋ (سپودا, كورۋ), پاۋەرليفتينگ (سپودا), وقپەن اتۋ (سپودا), جەڭىل اتلەتيكا (سپودا, كورۋ), وتىرىپ ويناۋ ۆولەيبولى (سپودا), ۇستەل تەننيسى (سپودا).
وسى جىلعى مامىر مەن قىركۇيەك ايلارى كەزەڭىندە ەلىمىزدىڭ بارلىق وڭىرلەرىندە بۇل شارانىڭ وبلىستىق جانە قالالىق ويىندارى وتكىزىلىپ, وعان 2500-گە جۋىق مۇگەدەك سپورتشىلار قاتىستى. سونداي-اق بۇل ويىندارعا وبلىستىق تۋريزم, دەنە شىنىقتىرۋ ءجانە سپورت باسقارمالارىنىڭ وكىلدەرى, پاراوليمپيالىق سپورت تۇرلەرىنىڭ باس جاتتىقتىرۋشىلارى, قوعامدىق بىرلەستىكتەردىڭ وكىلدەرى, ءىىى پاراوليمپيالىق سپورت تۇرلەرىنىڭ باس تورەشىلەرى قاتىسادى. ولاردىڭ ىشىندە حالىقارالىق ساناتتاعى 10 تورەشى, جوعارى ۇلتتىق ساناتتاعى 21 تورەشى, ۇلتتىق ساناتتاعى 14 تورەشى جانە ءبىرىنشى ساناتتاعى 15 تورەشى جارىستى ءادىل وتكىزۋگە بارىن سالاتىن بولادى.
شىمكەنت قالاسىندا 5 سپورتتىق نىسان: «دەنساۋلىق» ءجۇزۋ باسسەينى, قاجىمۇقان اتىنداعى ورتالىق ستاديون, «دينامو» اتۋ ءتيرى, «سۇڭقار» سك, «موك-2002» جشس قاتىسۋشىلارعا قىزمەت كورسەتەدى.
2001 جىلى استانادا العاش رەت ءى پاراوليمپيالىق ويىندار ءوتكىزىلگەن ەدى. وندا جالپىكوماندالىق ەسەپتە الماتى قالاسىنىڭ كومانداسى جەڭىمپاز بولىپ تانىلدى. التى جىل وتكەننەن كەيىن 2007 جىلى تالدىقورعان قالاسىندا (الماتى وبلىسى) ءىى پاراوليمپيالىق ويىندار دا جوعارى دارەجەدە ءوتتى. ويىنداردىڭ قورىتىندىسى بويىنشا ءبىرىنشى ورىندى الماتى قالاسى, ەكىنشى ورىندى قاراعاندى وبلىسى, ءۇشىنشى ورىندا استانا قالاسى يەمدەندى.
بۇگىندە رەسپۋبليكادا مۇگەدەكتەر سپورتى بويىنشا 8 سپورتتىق ۇيىم جۇمىس ىستەيدى. ماڭعىستاۋ, اتىراۋ وبلىستارى مەن استانا جانە الماتى قالالارىندا مۇگەدەكتەر سپورتىنىڭ 4 سپورتتىق كلۋبى بەلسەندى جۇمىس ىستەپ كەلەدى. سول سياقتى الماتى وبلىسىندا مۇگەدەكتەرگە ارنالعان 1 سپورتتىق كلۋب اشىلىپ, زاڭدى تۇردە ادىلەت ورگاندارىندا تىركەلدى. وڭتۇستىك قازاقستان مەن قاراعاندى وبلىستارىندا 2 ارنايى سپورتتىق مەكتەپ جۇمىس ىستەۋدە. سول سياقتى پەتروپاۆل قالاسىندا «قاراساي» ستاديونىنداعى جوعارى سپورتتىق شەبەرلىك مەكتەبىندە مۇگەدەكتەر سپورتى بويىنشا ءبىر بولىمشە تابىستى جۇمىس ىستەپ كەلەدى.
تۋريزم جانە سپورت مينيسترلىگى جىل سايىن مۇگەدەكتەردىڭ ءارتۇرلى ساناتىنا ارنالعان 70-تەن استام رەسپۋبليكالىق چەمپيوناتتار مەن تۋرنيرلەر وتكىزەدى, وعان 5000-نان استام مۇگەدەك سپورتشىلار قاتىسادى, سونداي-اق ولاردىڭ شەتەلدەردەگى حالىقارالىق جارىستارعا دا قاتىسۋىن قامتاماسىز ەتۋدە.
قازاقستان رەسپۋبليكاسى قۇراما كومانداسىنىڭ سپورتشىلارى مەن جاتتىقتىرۋشىلارىن – پاراوليمپيالىق ويىنداردىڭ قاتىسۋشىلارىن ىنتالاندىرۋ ماقساتىندا قازاقستان رەسپۋبليكاسى ۇكىمەتىنىڭ 2008 جىلعى 19 اقپانداعى № 167 «پاراوليمپيالىق ويىنداردا جوعارى سپورتتىق ناتيجەلەرى ءۇشىن قازاقستان رەسپۋبليكاسى قۇراما كومانداسىنىڭ سپورتشىلارى مەن جاتتىقتىرۋشىلارىن ماتەريالدىق ىنتالاندىرۋدىڭ كەيبىر ماسەلەلەرى تۋرالى» قاۋلىسىنا سايكەس مىناداي كولەمدە سىياقىلار بەلگىلەنگەن:
1-ورىن – 50 مىڭ دوللار;
2-ورىن – 35 مىڭ دوللار;
3-ورىن – 25 مىڭ دوللار;
4-ورىن – 14 مىڭ دوللار;
5-ورىن – 6 مىڭ دوللار;
6-ورىن – 4 مىڭ دوللار.
قازاقستان رەسپۋبليكاسىنىڭ ءىىى پاراوليمپيالىق ويىندارى 2012 جىلى لوندوندا ( ۇلىبريتانيا) وتەتىن پاراوليمپيالىق ويىندارعا ليتسەنزيانى جەڭىپ الۋعا دايىندىقتىڭ كەزەڭى بولىپ تابىلادى.
اتالعان ويىنداردى ۇيىمداستىرۋشىلار: تۋريزم جانە سپورت مينيسترلىگى, وڭتۇستىك قازاقستان وبلىسىنىڭ اكىمدىگى, «نۇر وتان» حالىقتىق-دەموكراتيالىق پارتياسى, قازاقستان رەسپۋبليكاسىنىڭ پاراوليمپيالىق كوميتەتى.
ويىن قورىتىندىسى بويىنشا سپورتشىلار مەن كوماندالار ءتۇرلى دارەجەدەگى ديپلومدارمەن, كۋبوكپەن, مەدالدارمەن جانە باعالى جۇلدەلەرمەن ماراپاتتالادى.
رەسمي ءباسپاسوز كونفەرەنتسياسى 2011 جىلعى 4 قازاندا ساعات 17.00-دە «ورداباسى» (شىمكەنت قالاسى) قوناق ۇيىندە وتەدى.
«ەگەمەن-اقپارات».