قازاق دالاسى پۋشكيننىڭ ەسىمىن ەكى عاسىر بۇرىن ەستىگەن. ۇلى اباي ونىڭ «ەۆگەني ونەگين» رومانىن ىقشامداپ اۋدارعانىن, قىردىڭ ادامدارى تاتيانانىڭ جان سەزىمىنە ورتاقتاسىپ, سونشالىقتى ىقىلاسپەن قابىلداعانىن مۇحتار اۋەزوۆ «اباي جولىندا» تامىلجىتىپ جازعان. وسى اۋدارمادان سوڭ قازاق اراسىندا ءتاتىش ەسىمدى قىزدىڭ اتى پايدا بولدى. تاتياناڭىز سولاي ەركەلەتە ايتىلاتىن تاتىشكە اينالىپ جۇرە بەردى... ورىستىڭ ۇلى اقىنىنىڭ اتىنداعى زالدىڭ اشىلۋ سالتاناتىندا ءسوز سويلەگەن پارلامەنت ءماجىلىسىنىڭ دەپۋتاتى, پۋشكينتانۋعا وزىندىك ۇلەس قوسقان عالىم ساۋىتبەك ابدراحمانوۆ: «بۇل جەردە پۋشكيننىڭ پايدا بولۋىنا دەيىن رەسەيدە ورىس ءتىلى قاراپايىم بۇقارانىڭ تىلىنە اينالا جازداعانىن ايتۋ ارتىقتىق ەتپەيدى. ەليتا اتانعان اقسۇيەكتەر نەگىزىنەن فرانتسۋز تىلىندە سويلەۋدى دۇرىس كورەتىن, – دەدى. – ورىس ءتىلى ادام ويى مەن سەزىمىنىڭ تەرەڭ قالتارىستارىن اشىپ كورسەتە المايدى دەگەن تۇسىنىكتى بۇزعان ادام – پۋشكين. ورىس حالقىنىڭ ءوز ەلىنە دەگەن سەنىمىن قالىپتاستىرعان دا ناق پۋشكيننىڭ ءوزى. بۇل – ۇلكەن ەڭبەك, ۇلكەن ەرلىك». وسىنداي ۇلى تۇلعانىڭ اتىندا زالدىڭ اشىلۋى قازاقستان مەن رەسەيدىڭ بىرلەسكەن ءىس-قيمىل جوسپارىنا ساي جۇزەگە استى. زالعا ۇلتتىق اكادەميالىق كىتاپحانا قورىنان 500-دەن استام كىتاپ ۇسىنىلعانىن مەكەمە ديرەكتورى ءۇمىتحان مۇڭالباەۆا باياندادى. كىتاپتار نەگىزىنەن اقىننىڭ ءار جىلدارى جارىق كورگەن ءوز ەڭبەكتەرى مەن ول تۋرالى زەرتتەۋلەر, ماقالالاردان تۇرادى. ودان باسقا تانىمال سۋرەتشى ورەست كيپرەنسكيدىڭ «الەكساندر پۋشكين» پورترەتى مەن اقىن قولجازبالارىنىڭ كوشىرمەلەرى قويىلعان. سالتاناتتى شاراعا ەلىمىزدەگى رەسەي فەدەراتسياسى ەلشىلىگى اتىنان رەسەي عىلىمى مەن مادەنيەتى ورتالىعىنىڭ جەتەكشىسى ۆلاديمير نەفەدوۆ, تانىمال پۋبليتسيست عادىلبەك شالاحمەتوۆ, باسقا دا زيالى قاۋىم وكىلدەرى قاتىسىپ, جۇرەكجاردى لەبىزدەرىن ءبىلدىردى.
ايگۇل سەيىلوۆا, «ەگەمەن قازاقستان»