بۇگىنگى تاڭدا «قازاگرو» ۇبح» اق قۇرىلىمىنا ەنەتىن «قازاگروقارجى» اكتسيونەرلىك قوعامىنا كوكتەمگى-دالا جۇمىستارىن جۇرگىزۋ ءۇشىن جالپى سوماسى 15 ميللياردتان اسا تەڭگەگە اۋىل شارۋاشىلىعى تەحنيكاسىن جانە جابدىقتار ساتىپ الۋعا 1269 ءوتىنىم ءتۇستى. بۇل تۋرالى «قازاگروقارجى» اق ءباسپاسوز قىزمەتى حابارلادى.
اگرارشىلارمەن جالپى سوماسى 9,2 ملرد تەڭگەگە 744 قارجى ليزينگى شارتى ەندىگى جاسالىپ تا قويعان. جاسالعان شارتتاردىڭ شەڭبەرىندە فەرمەرلەر 463 تراكتور, 126 تۇقىم سەپكىش, 13 ەگىس كەشەنىن جانە 142 بىرلىك وزگە دە تەحنيكالاردى ساتىپ الدى.
وتىنىمدەردىڭ كوپشىلىك بولىگى – 172 ءوتىنىم استانا قالاسىنداعى ورتالىق وفيسقا كەلىپ تۇسكەن, سولتۇستىك قازاقستان وبلىسىنداعى فيليالعا – 168, شىعىس قازاقستان وبلىسىنداعى فيليالعا – 157 جانە الماتى وبلىسىنداعى فيليالعا -142 ءوتىنىم تۇسكەن.
سونىمەن بىرگە, وتاندىق اگرارشىلار ەگىن جيناۋ ناۋقانىنا دايىندىق جونىندە دە ۇمىتپاعان. «قازاگروقارجى» اكتسيونەرلىك قوعامىنا جالپى سوماسى 13,8 ملرد. تەڭگەگە كومبايندار, ءشوپ ماشينالارىن, دەستەلەگىشتەر مەن باسقا دا تەحنيكالار ساتىپ الۋعا 637 ءوتىنىم ءتۇستى.