«شىعارماشىلىق دودا قازاق ۇلتتىق ونەر ۋنيۆەرسيتەتىنىڭ, پ.ي.چايكوۆسكي اتىنداعى ماسكەۋ مەملەكەتتىك كونسەرۆاتورياسى مەن استانا قالاسى اكىمدىگىنىڭ قولداۋىمەن ۇيىمداستىرىلادى. بايقاۋ 17 جاسقا دەيىنگى مۋزىكانتتار اراسىندا فورتەپيانو, سكريپكا, ۆيولونچەل ماماندىقتارى بويىشا وتكىزىلەدى. شارانىڭ اشىلۋ سالتاناتى 15 ماۋسىم كۇنى «استانا وپەرا» تەتارىنىڭ ۇلكەن زالىندا بولادى. كونكۋرستىق تىڭداۋلار قازۇوۋ-ءىنىڭ ورگان زالىندا جانە قازۇوۋ-ءىنىڭ جاباەۆ اتىنداعى زالىندا 16-24 ماۋسىم ارالىعىنا جوسپارلانعان», دەدى بايقاۋدىڭ كوركەمدىك جەتەكشىسى – قازاقستان رەسپۋبليكاسىنىڭ حالىق ءارتىسى, قازۇوۋ رەكتورى ايمان مۇساقوجاەۆا.
پ.ي.چايكوۆسكي اتىنداعى ح حالىقارالىق جاس وسپىرىمدەر بايقاۋىنىڭ قازىلار القاسى قۇرامىنا كەلەتىن بولساق, ولاردىڭ ىشىندە رەسەي, قازاقستان, اقش, جاپونيا, كورەيا, قىتاي, ۆەتنام, فرانتسيا, شۆەيتساريا, ۆەنگريا, فينليانديا جانە باسقا ەلدەردىڭ اتاقتى مۋزىكانتتارى مەن مادەنيەت قايراتكەرلەرى بار.
سپيكەردىڭ سوزىنشە اتالىمدار بويىنشا قازىلار القاسىنىڭ توراعالارىدا وسال ەمەس. «فورتەپيانو» اتالىمى بويىنشا – ۆلاديمير وۆچيننيكوۆ, «سكريپكا» نوميناتسياسىنا – ۆيكتور ترەتياكوۆ, «ۆيولونچەل» اتالىمىندا – سەرگەي رولدۋگين قازىلىق ەتەدى» دەدى ول.
سونىمەن قاتار, جاس مۋزىكانتتاردىڭ ونەرىن ماسكەۋ كونسەرۆاتورياسىنىڭ پروفەسسورلارى ۆالەري پياسەتسكي مەن يۋري سلەسارەۆ, بوريس اندريانوۆ پەن كيريلل رودين, سەرگەي كراۆچەنكو مەن ەدۋارد گراچ, قازۇوۋ-ءىنىڭ پروفەسسورلارى نۇرلان يزمايلوۆ پەن گۇلجاميلا قادىربەكوۆا, سونداي-اق قازىلار القاسىنىڭ مۇشەسى لاسلو مەزو (ۆەنگريا), يۋرگيسدۆاريوناس (ليتۆا), فرانتسيسكو كرۋز پلازا (يتاليا), نام يۋن كيم (كورەيا), اكيكوتاتسۋمي (جاپونيا), مارتتي روۋسي (فينليانديا) باعالايدى.
ا.مۇساقوجاەۆانىڭ مالىمەتىنشە بيىل قازىلار القاسى قۇرامىنا العاش رەت جاس مۋزىكانتتار, وتكەن جىلعى بايقاۋ جەڭىمپازدارى اناستاسيا ۋشاكوۆا مەن دونگحيۋك كيم كىرگەن.
سونىمەن قاتار, اقتىق مارەگە جەتكەن قاتىسۋشىلار ەۋرازيالىق سيمفونيالىق وركەسترى مەن قازۇوۋ-ءىنىڭ سيمفونيالىق وركەسترىنىڭ سۇيەمەلدەۋىمەن ونەر كورسەتەدى.
سپيكەردىڭ سوزىنشە بايقاۋدىڭ باعدارلاماسىنا قازىلار القاسىنىڭ شەبەرلىك سىنىپتارى مەن كونتسەرتتەرى ەنگىزىلگەن. «ولاردىڭ ءبىرى – كيريلل رودين مەن بوريس اندريانوۆتىڭ قاتىسۋىمەن ناتاليا شاحوۆسكايانى ەسكە الۋ كونتسەرتى» دەدى ا.مۇساقوجاەۆا.
بايقاۋعا 20 ەلدەن, رەسەي, قازاقستان, قىتاي, كورەيا, جاپونيا, امەريكا قۇراما شتاتتارى, موڭعوليا, وزبەكىستان, گەرمانيا, يتاليا, يزرايل, ۇلىبريتانيا, مەكسيكا جانە باسقا ەلدەردەن 120 جاس ورىنداۋشى قاتىساتىنىن ايتا كەتسەك دەيمىز.
بايقاۋدىڭ ۇيىمداستىرۋشىلارى پ.ي.چايكوۆسكي اتىنداعى حالىقارالىق بايقاۋ لاۋرەاتتارىنىڭ قاۋىمداستىعى جانە قازاقستان رەسپۋبليكاسى مادەنيەت جانە سپورت ءمينيسترى. شارانىڭ جابىلۋ سالتاناتى مەن لاۋرەاتتار كونتسەرتى 25 ماۋسىم كۇنى «قازاقستان» وكز-دا وتە دەپ جوسپارلانعان.
راۋان قايدار,
"ەگەمەن قازاقستان"