ق. توقاەۆ ءبىزدىڭ مەملەكەتتەرىمىزدىڭ اراسىنا ديپلوماتيالىق قاتىناستار ورناعان 25 جىلدان بەرى جوعارى دەڭگەيدەگى سەنىمدى ديالوگ قالىپتاسقانىن, پارلامەنتتەر, ۇكىمەتتەر جانە ىسكەرلەر قاۋىمدارى اراسىنداعى بايلانىستار دامىپ كەلە جاتقانىن اتاپ ءوتتى.
سەنات توراعاسى «ەكسپو-2017» حالىقارالىق كورمەسىنە قاتىسقانى ءۇشىن گرۋزياعا العىس ايتتى جانە وسى ەلدىڭ ۇلتتىق پاۆيلونىنىڭ جۇمىسى تابىستى بولۋىنا تىلەكتەستىگىن ءبىلدىردى.
ق. توقاەۆ گرۋزين باسشىسىنا ارناعان سوزىندە پارلامەنتارالىق ىنتىماقتاستىقتى دامىتۋعا نازار اۋداردى جانە ەكى ەلدىڭ زاڭ شىعارۋ ورگاندارىندا جۇمىس ىستەيتىن دوستىق توپتارىنىڭ الەۋەتىن ۇدەتە تۇسۋگە شاقىردى.
اڭگىمە بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى ىلگەرىلەتۋگە ەرەكشە نازار اۋدارىلدى. «جىبەك جولىنىڭ ەكونوميكالىق بەلدەۋى» باعىتىنداعى ءبىرىنشى ەل بولا وتىرىپ, قازاقستان قىتاي مەن ەۋروپا اراسىنداعى نەگىزگى بايلانىستىرۋشى بۋىن بولىپ تابىلادى. سوندىقتان ءبىز ءۇشىن ءىس جۇزىندە ترانزيت-كولىك سالاسىنداعى ىنتىماقتاستىق ماڭىزدى», - دەدى جوعارعى پالاتانىڭ باسشىسى.
ق. توقاەۆ قازاقستان گرۋزيانىڭ كەيىنگى جىلدارداعى دامۋىنا ءجىتى كوز جىبەرىپ وتىرعانىن اتاپ ءوتتى. سەنات توراعاسى وسى ەلدىڭ دەموكراتيالىق ينستيتۋتتاردى جەتىلدىرۋدەگى, ازاماتتاردىڭ لايىقتى ءومىر دەڭگەيىن قامتاماسىز ەتۋدەگى, كۇردەلى سىرتقى ساياسي مىندەتتەردى شەشۋدەگى اتقارىلىپ جاتقان جۇمىستاردى جوعارى باعالادى.
گ. مارگۆەلاشۆيلي ءوز كەزەگىندە قازاقستانمەن قاتىناستاردى ءداستۇرلى دوستىق سيپاتىندا ەكەنىن ايتا كەلىپ, ءبىزدىڭ مەملەكەتتەرىمىز اراسىندا اۋقىمدى ماسەلەلەر بويىنشا ءوزارا تۇسىنىستىك قالىپتاسقانىن اتاپ ءوتتى. گرۋزيا پرەزيدەنتى ەكىجاقتى بايلانىستاردىڭ نەگىزگى ماسەلەلەرىنىڭ ءبىرى بولىپ تابىلاتىن پارلامەنتارالىق ديالوگتى كەڭەيتۋ قاجەتتىگىن قولدادى.