كەڭەس وداعى ىدىراپ, ەكونوميكالىق بايلانىستار شىرىگەن جىپتەي ۇزىلگەننەن كەيىن-اق كەزىندەگى ءاپ-اسەم تىرلىگى بار التىندى اۋىلىنىڭ كۇيى تايىپ جۇرە بەردى. وسىنداعى التىن كەنىشى جابىلىپ قالدى, اۋىلدا ەلەكتر جارىعى بولمادى, باسقا دا الەۋمەتتىك نىسانداردىڭ قىزمەتى توقتادى. التىندىلىقتار شاھارلى جەرلەرگە ۇدەرە كوشتى. وسىنداي كۇردەلى كەزەڭدە التىن كەنىشىن ساتىپ العان «يۋبيلەينىي» جشس قاراۋسىز قالعان كەنىش ءوندىرىسىنىڭ بويىنا قان جۇگىرتۋدى قولعا الدى. ءسويتىپ, اجارى تايعان التىندى اۋىلىنىڭ ينفراقۇرىلىمىن قالپىنا كەلتىرۋدى, الەۋمەتتىك نىساندارىنا كوڭىل ءبولۋدى دە ۇمىتپادى. مۇنداي يگىلىكتى ءىس جەمىسىن بەرىپ, اۋىلدىڭ اجارى كىرە باستادى, التىندىلىقتاردىڭ ەرتەڭگى كۇنگە سەنىمى ارتتى.
جاقىندا التىندى اۋىلىنىڭ تۇرعىندارى تاعى ءبىر قۋانىشقا بولەندى. «يۋبيلەينىي» جشس اۋىلدىڭ قاق ورتاسىنان سۋ جاڭا 75 ورىندىق «بالاپان» بالاباقشاسىن سالىپ, پايدالانۋعا بەردى. بۇل بالاباقشا تولىقتاي سەرىكتەستىكتىڭ قارجىسىنا سالىنىپ, جەرگىلىكتى بيۋدجەتكە تەگىن بەرىلىپ وتىر. بالاباقشانىڭ سالتاناتتى اشىلۋىنا اۋىلدىڭ تايلى-تاياعى قالماي ۇلكەن-كىشىسى تۇگەل جينالدى. ينۆەستورلار التىندى اۋىلىنىڭ بولاشاعىمەن تانىستىرۋ ءۇشىن الەمنىڭ ونداعان ەلدەرىنەن قارجى قۇرىلىمدارىنىڭ وكىلدەرىن دە ەرتە كەلىپتى. مەرەكەلىك سالتاناتتا ءسوز العان مۇعالجار اۋدانىنىڭ اكىمى سەرىك شانعۇتوۆ التىندىلىقتاردى قۋانىشتى ساتپەن قۇتتىقتادى.
«يۋبيلەينىي» جشس ديرەكتورلار كەڭەسىنىڭ توراعاسى بوريس لۋزين مۇنداي جوبانى جۇزەگە اسىرا وتىرىپ, بولاشاقتى قارجىلاندىرىپ جاتقاندارىن تىلگە تيەك ەتتى. بۇگىنگى بۇلدىرشىندەر ەلدىڭ ەرتەڭى, ولار بولاشاق ينجەنەرلەر, ەكونوميستەر, بىلىكتى ماماندار. بىلىكتى ماماندارسىز ەكونوميكا دامىمايدى, ءوندىرىس ورگە باسپايدى. ياعني, ءبىز ءوز بولاشاعىمىزدىڭ قامىن ويلاپ وتىرمىز, دەدى ول.
قايىڭدى اۋىلدىق وكرۋگىنىڭ اكىمى ءىلياش نيازوۆا ينۆەستورلار كەلگەلى جاسالعان جاقسىلىقتاردىڭ بىرقاتارىن تارقاتىپ ايتتى. ونىڭ ايتۋىنشا, وكرۋگكە قاراستى قايىڭدى, التىندى اۋىلدارىندا 257 وتباسى تۇرادى, وسى اۋىلعا كوشىپ كەلۋگە تىلەك بىلدىرۋشىلەر كوپ ەكەن, الداعى كوكتەمدە 47 وتباسى تۇرعىن ءۇي سالۋعا جەر الىپ وتىرعان كورىنەدى. جوعارىدا ايتىلعانداردان باسقا سەرىكتەستىكتىڭ اۋىلعا سۋ جەتكىزۋگە, مەكتەپتى ءجوندەۋگە, ستۋدەنتتەردىڭ ءبىر جىلدىق وقۋ اقىسىن تولەۋگە كومەكتەسكەنىن تىلگە تيەك ەتتى.
ءۇش بالاسى سەرىكتەستىكتە جۇمىس ىستەيتىن, نەمەرەسى وسى بالاباقشاعا باراتىن اۋىل اعاسى اباي بايمۇحامبەتوۆ باتا بەردى, اجەلەر شاشۋ شاشتى. «يۋبيلەينىي» جشس ديرەكتورلار كەڭەسىنىڭ توراعاسى بوريس لۋزين بالاباقشانىڭ سيمۆولدىق كىلتىن اۋدان اكىمى سەرىك شانعۇتوۆقا تاپسىردى.
سالتاناتتى ساتكە جينالعاندار بالاباقشانىڭ بولمەلەرىن ارالاپ كورىپ, سۋ جاڭا جيھازدارىنا ريزا بولعان اۋىلدىقتار ءبىرىن-ءبىرى قۇتتىقتىپ, مارە-سارە بولدى. اتا-انالارىمەن, اتا-اجەلەرىمەن ەرە كەلگەن, ەرتەڭگى كۇنى وسى بالاباقشادا تاربيەلەنەتىن بۇلدىرشىندەردىڭ قۋانىشىندا دا شەك جوق. ءسابي كوڭىلدىڭ اۋەستىگىمەن جارىق تا تازا ءبولمەلەردەن شىققىلارى جوق, ءماز-مەيرەم. بالاباقشانىڭ اشىلۋ سالتاناتى كوڭىلدى كونتسەرتكە ۇلاستى.
ساتىبالدى ءساۋىرباي.
اقتوبە وبلىسى, مۇعالجار اۋدانى.