كونتسەرت شىمىلدىعىن الماتى قالاسىنىڭ اكىمى باۋىرجان بايبەك اشتى. ول استانا قالاسىنىڭ ءرولى ەرەكشە ەكەنىن اتاپ ءوتىپ, ەلوردا ەلىمىزدىڭ جەتىستىگىن, بولاشاققا ۇمتىلىسىن ايقىندايتىنىن جەتكىزدى. «بارلىق قازاقستاندىق جاقسى كورەتىن الماتى – ەل تاريحىنا تاۋەلسىزدىكتىڭ التىن بەسىگى رەتىندە ەندى. پرەزيدەنتتىڭ تۇراقتى قامقورلىعىنىڭ ارقاسىندا الماتى زاماناۋي مەگاپوليسكە اينالىپ, ەۋروپا قالالارىمەن باسەكەگە تۇسە الاتىن دەڭگەيگە جەتتى. الماتىنىڭ استاناداعى مادەني كۇندەرى اياسىندا ءبىز سىزدەرگە ەلىمىزدىڭ باي مادەني مۇراسىن ۇسىنامىز», دەدى قالا اكىمى.
ول پرەزيدەنتتىڭ حالىقارالىق جوعارى مارتەبەسىنىڭ ارقاسىندا ەكسپو-2017 كورمەسىنىڭ استانادا وتكىزىلىپ جاتقانىن ايتتى. «ەكسپو-2017 – بۇل زاماناۋي تەحنولوگيا مەن ينۆەستيتسيا تارتۋ عانا ەمەس, سونىمەن قاتار سانانى وزگەرتۋ, يننوۆاتسيالىق ويلاۋدى قالىپتاستىرۋ. ەكسپو – ەلباسى ۇسىنعان رۋحاني جاڭعىرۋدىڭ ءبىر جوباسى», دەدى ب.بايبەك. ول ءوز سوزىندە حالىقارالىق كورمە اياسىندا وتكىزىلىپ جاتقان مادەني كۇندەر بارىسىندا, ياعني 11-19 ماۋسىم ارالىعىندا 400-دەن استام الماتىلىق ءارتىس ءوز ونەرلەرىن تارتۋ ەتەتىنىن حابارلادى.
سولايشا مادەني كۇندەر «الماتىدان ماحابباتپەن» اتتى كونتسەرتپەن باستالدى. كونتسەرتتە «دوسمۇقاسان», «جىگىتتەر», «كەشيۋ» توپتارى, روزا رىمباەۆا, نۇرلان ابدۋللين, ءمادينا سادۋاقاسوۆا, مارجان اراپباەۆا, ايقىن تولەپبەرگەن, لۋينا سىندى ەلىمىزگە تانىمال ونەرپازدار ءان شىرقادى. ال الماتىنىڭ مەملەكەتتىك قۋىرشاق تەاترى ق.قۋانىشباەۆ اتىنداعى قازاق مۋزىكالىق دراما تەاترىندا كۇنىنە ەكى رەت قازاق جانە ورىس تىلدەرىندە «ق ۇلىنشاق پەن بولتىرىك», «كوڭىلدى ايۋلار» اتتى سپەكتاكلدەرىن قوياتىن بولادى. سونداي-اق, «الماتىنىڭ ەتنواۋىلى» كورمە-جارمەڭكەسى, «سازگەن سازى» فولكلورلىق-ەتنوگرافيالىق ءانسامبلىنىڭ جانە «اسقار تاۋلى الماتى» كونتسەرتتەرى كورەرمەندەرگە تارتۋ ەتىلەدى.
ايگۇل سەيىلوۆا, «ەگەمەن قازاقستان»