شيرەك عاسىردان اسا مەرزىم تاۋەلسىزدىگىمىزدى تياناقتاپ, بار-جوعىمىزدى تۇگەندەگەن كەزدە, پرەزيدەنتىمىزدىڭ «... قازاقستانعا تۇبەگەيلى جاڭعىرۋ جانە جاڭا يدەيالار ارقىلى بولاشاعىن باياندى ەتە ءتۇسۋدىڭ تەڭدەسسىز تاريحي مۇمكىندىگى بەرىلىپ وتىر» دەگەن بايلامىن ارقايسىمىزعا بەرىلگەن تاپسىرما رەتىندە قابىل الۋعا ءتيىسپىز. «بولاشاققا باعدار: رۋحاني جاڭعىرۋ» ماقالاسىندا مەملەكەت باسشىسى تۇتاس قوعامنىڭ جانە ءاربىر قازاقستاندىقتىڭ ساناسىن جاڭعىرتۋدىڭ بىرنەشە باعىتىن العا تارتادى. بولاشاقتا ۇلتتىڭ تابىستىلىعى ونىڭ تابيعي بايلىعىمەن ەمەس, ادامدارىنىڭ باسەكەلىك قابىلەتىمەن ايقىندالاتىنىن , ول ءۇشىن تۇتاس ۇلت ءححى عاسىرعا لايىقتى قاسيەتتەرگە يە بولۋ كەرەكتىگىن اتاپ كورسەتەدى. قازاقستاندىق ءپاتريوتيزمدى قالىپتاستىرۋ جالعان ۇگىتپەن ەمەس, تۋعان ولكەنىڭ ءار سۇيەمىن, توعايى مەن كولىن, اۋىلى مەن جايلاۋىن تانىپ, سىيلاپ, قۇرمەتتەۋدەن باستاۋ الماق. ءسوز اراسىندا ءوز تاراپىمىزدان بۇل باعىتتا ءبىراز ىستەردىڭ باسى قايىرىلعانىن ايتا كەتكىم كەلەدى. وسىدان ەكى جىل بۇرىن سولتۇستىك قازاقستاننىڭ تاريحي توپونيميكاسى زەرتتەلىپ, «اتامەكەن اتاۋلارى» دەگەن اتپەن ۇجىمدىق ەڭبەك شىعارىلدى. تەك تارالىمى از بولعانى عانا وكىنىشتى, ايتپەسە رەسپۋبليكادا جوعارى باعالاندى.بىلتىر جارىق كورگەن «سولتۇستىك قازاقستان وبلىسى: تاريح جانە تاعىلىم» دەگەن مونوگرافيا دا «تۋعان جەر» باعدارلاماسىمەن تولىق ۇندەسەدى. ءبىر سوزبەن ايتقاندا, ۇلتتىق رۋحىمىزدىڭ ويانۋى, كەمەلدەنۋى بابالاردان ميراس بولىپ قالعان مۇرالاردى قايتا تۇلەتە بىلۋىمىزبەن دە تىعىز بايلانىستى بولماق. سالت-داستۇرلەردى ساقتاۋ, ءتىلدى قۇرمەتتەۋ, قادىرلەۋ ۇلتتىق سانانىڭ كەمەلدەنگەنىن بىلدىرسە كەرەك. ماقالادا ۇلتتىق مادەنيەتتى جاڭعىرتۋعا, كەرىتارتپا ادەتتەردەن باس تارتۋعا دا ەرەكشە ماڭىز بەرىلگەن. ەلباسى ۇسىنعان «تۋعان جەر» جوباسى دا اسا قاستەرلى. ءبىزدىڭ ۇجىم ءوڭىردىڭ دامۋىنا ايتارلىقتاي ۇلەس قوسقان ءتۇرلى كاسىپ يەلەرىنىڭ, ارداقتى ازاماتتاردىڭ گالەرەياسىن جاساۋدى ۇيعارىپ وتىر. ويتكەنى, شىنايى ءپاتريوتيزمنىڭ كورىنىسى اتامەكەندى تۇلەتۋگە قاتىسۋىڭنان دا ايقىن بايقالادى.
پرەزيدەنت ءاربىر قازاقستاندىقتىڭ «باسەكەلىك قابىلەتى» تۋرالى ماسەلەنى وتە دۇرىس قوزعادى. قازىر توي ەمەس, وي جارىستىراتىن زامان. جۇردەك ۋاقىت ولشەمىمەن قارايتىن بولساق, جەكە ادامداردىڭ قانشاما كۇشىن, بايلىعىن تەككە ءراسۋا ەتىپ جاتقانىن اڭعارامىز. وڭدى-سولدى ەسەپسىز جۇمسالعان ىسىراپشىلىققا جول بەرگەندەر, داڭعويلىقپەن اتاعىن شىعارعىسى كەلەتىندەر, جومارتتىقتى داراقىلىق دەپ ۇعاتىندار قانشاما! وندايلار قاناعاتشىلدىقتىڭ, قاراپايىمدىلىقتىڭ قادىر-قاسيەتىن تۇسىنە بەرمەيدى. مىنە, وسىنداي شەكتەن شىققان, ءۇردىس سيپاتقا اينالعان تەرىس ارەكەتتەردىڭ تامىرىنا بالتا شابۋ ءۇشىن الدىمەن مىنەز-ق ۇلىقتى تۇزەۋ, جۇرەككە يمان ۇيالاتۋ كەرەك. «تالاپ, ەڭبەك, تەرەڭ وي, قاناعات, راحىم» (اباي) عانا ءبىلىمدى, كوزى اشىق, كوكىرەگى وياۋ بولۋعا ۇمتىلدىرادى.
ماقالادا اتاپ وتىلگەندەي, جاڭا جاعدايدا جاڭعىرۋعا دەگەن ىشكى ۇمتىلىس– ءبىزدىڭ دامۋىمىزدىڭ باستى قاعيداسى. ول الدىمەن ساناداعى سىلكىنىستەن تامىر الىپ, زامان اعىمىنا يكەمدەلە وتىرىپ, جاڭا ءداۋىردىڭ جاعىمدى جاقتارىن بويعا ءسىڭىرۋدى مىندەتتەيدى.
ساۋلە مالىكوۆا, وبلىستىق مەملەكەتتىك مۇراعاتتىڭ ديرەكتورى
سولتۇستىك قازاقستان وبلىسى