اۋديوگيدپەن استانانى ارالاڭىز
استانا قالاسىنداعى «نۇرجول» گۇلزارىندا, بارلىق ساياباق اۋماعىن قامتيتىن ەسىل وزەنىنىڭ جاعالاۋىندا اۋديوگيدپەن جاياۋ جۇرگىنشىلەرگە ارنالعان ەكسكۋرسيالار جۇمىس ىستەي باستادى. «استانا كونۆەنشن بيۋرو» جشس ديرەكتورىنىڭ ورىنباسارى اسقار ادامبەكوۆتىڭ ايتۋىنشا, بيىل ەكى جاياۋ اۋديوگيد كوپشىلىككە قىزمەت ەتپەك. ونىڭ كومەگىمەن تۋريستەر مەن قوناقتار قالانىڭ نەگىزگى ايشىقتى جەرلەرى تۋرالى قاجەت اقپاراتتى الا الادى.
قىزمەتتى پايدالانۋ ءۇشىن «حان شاتىر» ساۋدا جانە ويىن-ساۋىق ورتالىعى جانىندا, «بايتەرەك» مونۋمەنتى الدىندا جانە ەسىل وزەنىنىڭ جاعاسىندا ورناتىلعان ارنايى شاتىرشالارعا بارۋ كەرەك. اۋديوگيد پەن جول كورسەتۋشى كارتانى الىپ, 5 مىڭ تەڭگە كەپىلدەمە قالدىرساڭىز بولعانى. باعىت اياقتالعان سوڭ قۇرىلعىلاردى تابىستاپ, كەپىلگە قالدىرعان تۋريست اقشاسى كەرى قايتارىلادى.
«ەلوردانىڭ ايشىقتى جەرلەرى تۋرالى اقپارات قازاق, ورىس, اعىلشىن, قىتاي جانە وزگە دە تىلدەردە بولادى. بيىل جاياۋ جۇرگىنشىلەر گيدىن «Easy Travel» جەلىسى ارقىلى پايدالانۋعا مۇمكىندىك جاسالدى. باستى ايىرماشىلىعى – مۇنداي جاعدايدا اۋديوگيد ءۇشىن كەپىلدىككە قۇرىلعى الۋدىڭ قاجەتتىلىگى بولمايدى. كەز كەلگەن ادام موبيلدىك قۇرىلعى ارقىلى «Easy Travel» پورتالىنا كىرىپ, سول جەردە استانانىڭ كورىكتى جەرلەرى تۋرالى بارلىق قاجەتتى اقپاراتتى تىڭداي الادى», دەيدى ا.ادامبەكوۆ. ونىڭ سوزىنشە, «Easy Travel» جەلىسىندە بۇكىلالەمدىك جاياۋ اۋديوگيدتەر جۇكتەلگەن. كورگەنىمىزدەي, ول استانادا دا پايدا بولدى.
ۇلتتىق ونىمدەردى ناسيحاتتاۋعا ۇلكەن مۇمكىندىك
ەكسپو-2017 كورمەسى قارساڭىندا وتاندىق تاۋارلار ساتىلاتىن «حالىق ماركاسى» پاۆيلونى بوي كوتەرگەنى تۋرالى وسى ۋاقىتقا دەيىن جازعان بولاتىنبىز. ونىڭ ءبىرىنشى قاباتىنا «ەكسپو-2017» بەلگىسى باسىلعان كادەسىيلار, ماگنيتتەر, سپورتتىق كيىمدەر, ويىنشىقتار, كەڭسە زاتتارى سىندى كوپشىلىك تۇتىناتىن دۇنيەلەر قويىلعان. ەكىنشى قاباتتان قازاقستاندىق ديزاينەرلەر تىككەن كيىمدەر, زەرگەرلىك بۇيىمدار, تەرى ونىمدەرى, بەسىك, ساندىق, توسەك جابدىقتارى, ءتىپتى, وتاندىق كوسمەتيكالاردى دا تابۋعا بولادى. تاعى ءبىر قابات وتاندىق ازىق-ت ۇلىك زاتتارىنا ارنالعان. وندا قۇرت-ماي, ىرىمشىك, ەت تاعامدارىنىڭ ءدامىن تاتىپ, سول مەزەتتە ساتىپ الۋعا مۇمكىندىك بار. ۇلتتىق برەندتەردىڭ باسىن قوسقان پاۆيلوننىڭ ارتىقشىلىعى سول, وتاندىق تاۋار وندىرۋشىلەردەن تىكەلەي جەتكىزىلەدى جانە تاۋارعا ۇستەمە باعا قوسىلمايدى.
«كەز كەلگەن وتاندىق ءونىم ءبىزدىڭ سورەدە ءۇش اي تەگىن تۇرادى. ءۇش ايدا حالىق وڭ پىكىر بىلدىرسە, تاۋار سۇرانىسقا كوپتەپ يە بولسا, كەلىسىمشارت بەكىتىپ, اقىلى تۇردە ىنتىماقتاستىق ورناتامىز», دەيدى «حالىق ماركاسى» قازاقستاندىق تاۋارلار مەن قىزمەتتەر ساپاسىن باقىلاۋ فەدەراتسياسىنىڭ پرەزيدەنتى ريمما تاجىباەۆا. مۇندا قىزمەت كورسەتۋ ساپاسىنا ەرەكشە ءمان بەرىلگەن. قىزمەتكەرلەرىنە ۇلتتىق كيىممەن ءجۇرۋ, كەلۋشىنى «قوش كەلدىڭىز!» دەپ ك ۇلىمدەپ قارسى الۋ مىندەتتەلگەن.
«استاناعا كەلگەن شەتەلدىكتەردى ءزاۋلىم عيماراتتارمەن, گامبۋرگەر, كوكا-كولامەن تاڭ قالدىرا المايمىز. ولار ءبىزدىڭ ۇلتتىق ەرەكشەلىگىمىزدى ىزدەپ كەلەدى. پاۆيلون تابالدىرىعىنان اتتاعان ءاربىر ادام قازاقتىڭ كيىمىن كيىپ, تاعامىن تاتىپ, اسەم بۇيىمدارىن كورىپ, شىن مانىندە قازاقستاندا جۇرگەنىن سەزىنەتىن بولادى», دەيدى ريمما دانابايقىزى. ونىڭ ايتۋىنشا, فەدەراتسيانىڭ باستى ماقساتى – شەتتە سۇرانىسقا يە بولادى-اۋ دەگەن قازاقستاننىڭ ساپالى ونىمدەرىن جيناپ, ەكسپورتقا شىعارۋ. سول سەبەپتى, اقتاۋ اۋەجايىنداعى «Duty free» جەلىسىمەن كەلىسىمشارت جاساسقان. ال اقتاۋ قالاسىنىڭ تاڭدالعان سەبەبى – تەڭىز جاعاسىنداعى شاھار ارقىلى تاۋارلاردى ازەربايجان, اراب ەلدەرى, تۇركيا سياقتى 25 مەملەكەتكە ەكسپورتتاۋعا بولادى.
ر.تاجىباەۆا ەكسپو-2017 كورمەسىنىڭ وتاندىق ونىمدەردى ناسيحاتتاۋعا ۇلكەن مۇمكىندىك ەكەنىن اتاپ ءوتتى. «حالىقارالىق شاراعا كوپ قوناق كەلەدى. بۇل – ۇلتتىق ەرەكشەلىگىمىزدى كورسەتۋگە, ءوزىمىزدى تانىتۋعا, وتاندىق ونىمدەردى ناسيحاتتاۋعا تاماشا مۇمكىندىك», دەدى ول. كورمە اياقتالعان سوڭ, «حالىق ماركاسى» فەدەراتسياسى قازاقستاننىڭ ۇزدىك 100 برەندىن ماراپاتتاپ, «Miss Kazakhstan – Made in Kazakhstan» سۇلۋلىق بايقاۋىن وتكىزبەك.
اسحات رايقۇل, «ەگەمەن قازاقستان»
سۋرەتتەردى تۇسىرگەن
ەرلان وماروۆ, «ەگەمەن قازاقستان»