پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ باستاعان ۇكىمەتتىك توپ وڭىردەگى يندۋستريالىق باعدارلامانىڭ ىسكە اسىرىلۋ بارىسىمەن تانىسۋ ءۇشىن قاراعاندى وبلىسىندا بولدى.
ساپار بارىسىندا ۇكىمەتتىك توپ «Kazplast» جشس قازاقستاندىق-بولگار كاسىپورنىنا باردى. وندا كەڭ اۋقىمدى پوليەتيلەن بۇيىمدارى ءوندىرىسى ىسكە قوسىلعان. كاسىپورىن جىلىنا 390 توننا پوليمەر ءونىمىن شىعارادى. كاسىپورىننىڭ قۇرىلىسىندا جانە ءونىم وندىرىسىندە تەك قانا قازاقستاندىق قۇرىلىس ماتەريالدارى مەن شيكىزات پايدالانىلدى.
بۇدان باسقا, ۇكىمەتتىك توپ «ماشزاۆود №1» جشس-نىڭ پروتوتيپتەۋ كەشەنى جۇمىسىمەن جانە قىزمەتىمەن تانىستى. كاسىپورىن ءونىمى تاۋ-كەن ءوندىرۋ جانە مۇناي-گاز ونەركاسىبىندە, مەتاللۋرگيادا جانە كولىك سالاسىندا سۇرانىسقا يە. زاۋىت شىعاراتىن گيدراۆليكالىق جابدىقتىڭ 90%-ىن تمد ەلدەرىنە ەكسپورتتايدى.
بۇعان قوسا دەلەگاتسيا «كاراگاندا ەنەرگوتسەنتر» جشس وندىرىستىك قۋاتتىلىعىن جاڭعىرتۋ جانە كەڭەيتۋ بويىنشا جۇمىس بارىسىمەن تانىستى. قازىر وبەكتىدە جاڭا جابدىق ورناتۋ بويىنشا قۇرىلىس- مونتاج جۇمىستارى جۇرگىزىلۋدە. وبەكتىنىڭ وندىرىستىك قۋاتى – 425 مۆت, 1157,5 گكالل/ساع. جوبالىق قۋاتقا شىعۋ كەلەسى جىلعا جوسپارلانعان.
جالپى, يندۋستريالاندىرۋ كارتاسى شەڭبەرىندە وسى جىلى قاراعاندى وبلىسىندا 24 جوبانى ىسكە اسىرۋ جوسپارلانۋدا. ونىڭ ىشىندە 9 جوبا ءبىرىنشى جارتىجىلدىقتا قولدانىسقا ەنگىزىلدى.
كاسىپورىنداردى ارالاعاننان كەيىن, وبلىستىق اكىمدىكتە ءۇيدب شەڭبەرىندە بيزنەستى قولداۋ قۇرالدارىنا ارنالعان كەڭەس ءوتتى.
اسەت يسەكەشەۆ جاڭا يندۋستريالىق ساياسات شەڭبەرىندە مەملەكەت, ەڭ الدىمەن, ءۇيدب-نىڭ ستراتەگيالىق باعىتتارىن ىسكە اسىرۋعا تارتىلعانداردى قولدايتىنىن ەسكە سالدى.
«ەگەمەن-اقپارات».