سەناتتا ءدىني قىزمەت پەن سوعان ىلەسپە زاڭ جوبالارى قابىلداندى
كەشە پارلامەنت سەناتىنىڭ توراعاسى قايرات ءماميدىڭ توراعالىق ەتۋىمەن پالاتانىڭ كەزەكتى جالپى وتىرىسى بولىپ ءوتتى. كۇن تارتىبىنە سايكەس دەپۋتاتتار بىرقاتار زاڭ جوبالارىن تالقىلاپ, ولاردىڭ كەيبىرىن ءبىرىنشى وقىلىمدا ماقۇلدادى.
ءبىرىنشى كەزەكتە «نەكە (ەرلى-زايىپتىلىق) جانە وتباسى تۋرالى» كودەكستىڭ جوباسى تالقىعا ءتۇسسە, ول بويىنشا قوسىمشا باياندامانى سەناتور ا.باشماكوۆ جاسادى. ول ءوز سوزىندە زاڭ جوباسىنىڭ نەكە-وتباسىلىق قاتىناستاردى رەتتەپ, ولاردىڭ ءومىر ءسۇرۋىنە كەپىلدىكتى قامتاماسىز ەتىپ قانا قويماي, سونىمەن قاتار, قازاقستاندىق وتباسىن نىعايتۋداعى جاڭا قۇقىقتىق قاعيدالاردىڭ ءمۇمكىندىكتەرىن بەلگىلەيتىنىن اتاپ ءوتتى.
ەنگىزىلگەن وزگەرىستەر نەگىزىنەن نەكە-وتباسى قاتىناستارىن رەتتەۋگە, ولاردىڭ جۇزەگە اسىرىلۋىنىڭ كەپىلدىكتەرىن بەلگىلەۋگە, سونداي-اق وتباسىنىڭ قۇقىقتارى مەن مۇددەلەرىن قورعاۋدى قامتاماسىز ەتۋگە باعىتتالعان. سونداي-اق جوبادا نەكەنى قيۋدىڭ, توقتاتۋدىڭ, ونى جارامسىز دەپ تانۋدىڭ شارتتارى مەن ءتارتىبى ايقىندالعان, ەرلى-زايىپتىلاردىڭ, بالانىڭ (بالالاردىڭ), اتا-انالاردىڭ, بالا اسىراپ الۋشىلاردىڭ قۇقىقتارى مەن مىندەتتەرى ناقتىلانعان. بالانى اسىراپ الۋدىڭ ءتارتىبى, قورعانشىلىق پەن قامقورشىلىقتى رەتتەۋ ماسەلەلەرى, وتباسى مۇشەلەرىنىڭ, ەرلى-زايىپتىلاردىڭ, بۇرىنعى ەرلى-زايىپتىلاردىڭ جانە وتباسىنىڭ باسقا دا مۇشەلەرىنىڭ اليمەنتتىك مىندەتتەمەلەرى بەكىتىلگەن. كودەكستە سۋرروگات انا, بالانى ءتاربيەلەۋگە بەرۋ تۋرالى كەلىسىم جاساۋ جانە ونى بۇزۋ, ازاماتتىق احۋال اكتىلەرىن مەملەكەتتىك ورگانداردىڭ تىركەۋى ماسەلەلەرىن رەتتەيتىن جاڭا ەرەجەلەر بار.
بۇدان باسقا كەشەگى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇيىمداسقان قىلمىسقا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكولوگيالىق ماسەلەلەر بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن تالقىلاۋ ناتيجەسىندە دەپۋتاتتار وسى سالاداعى قولدانىستاعى زاڭدارعا تۇزەتۋلەر ەنگىزۋگە قولداۋ ءبىلدىردى.
قىزۋ تالقىعا تۇسكەن «ءدىني قىزمەت پەن ءدىني بىرلەستىكتەر تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى بويىنشا ءدىن ىستەرى اگەنتتىگىنىڭ توراعاسى قايرات لاما ءشارىپ بايانداما جاسادى. سەنات دەپۋتاتى ب.مۇحامەدجانوۆ بۇرىن ءدىني سەنىمگە قاتىستى زاڭ بولعانىن ايتا كەلىپ, قازىرگى جوبانىڭ اتى نەگە ءدىني بىرلەستىكتەر تۋرالى بولىپ وزگەرتىلگەنى جانە شەتتەن كەلەتىن ءدىني كىتاپتاردى تەكسەرۋ مۇمكىندىگى تۋرالى سۇراعىن العا تارتتى. اگەنتتىك توراعاسى ءدىني سەنىمگە قاتىستى زاڭ ەلىمىزدە توقسانىنشى جىلداردىڭ باسىندا قابىلدانعانىن, ال 1995 جىلى قابىلدانعان كونستيتۋتسيادا ءدىني سەنىم جانە ار-وجدان بوستاندىعى تۋرالى جازىلعانىن ايتا كەلىپ, بۇل جوبادا كونستيتۋتسياداعى ەرەجەلەردى قايتالاماۋ ەسكەرىلگەنىن جەتكىزدى. كەز كەلگەن ازامات كىتاپتى شەكارادان جەكە پايدالانۋ ءۇشىن الىپ وتە الادى, ال ودان كوپ بولسا, تاراتۋ ماقساتىندا اكەلە جاتقاندىقتان, ەلگە كىرگىزۋگە تىيىم سالىنادى. سونداي-اق ءدىن ىستەرى اگەنتتىگىنىڭ جەرگىلىكتى جەرلەردەگى قۇرىلىمدارى ارقىلى ەلگە اكەلىنگەن ءدىني كىتاپتارعا ساراپتاما جاسالاتىنى بەلگىلى بولدى.
سەناتور س.ەڭسەگەنوۆ قازىرگى ۋاقىتتا ءارتۇرلى پىكىر قايشىلىقتارى دا تۋىنداپ وتىرعانىن, دەگەنمەن, ول جۇرتشىلىق اراسىنا جىك تۋعىزۋعا ءتيىس ەمەس ەكەنىن ايتا كەلىپ, زاڭ جوباسىن قولداۋعا شاقىردى. وسى رەتتە سەناتور زاڭ جوباسىنىڭ اتىنا قاراپ ۇرەيلەنبەي, ونىڭ ءمان-ماعىناسىنا تەرەڭ ءۇڭىلۋ قاجەت ەكەنىن ەسكە سالدى. «ءدىني قىزمەت پەن ءدىني بىرلەستىكتەر تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى تالقىدان وتكەننەن كەيىن قابىلداندى.
اسقار تۇراپباي ۇلى.