لي دەنسۋ, قحر «سينحۋا» اگەنتتىگى ەۋرازيا بيۋروسىنىڭ ءتىلشىسى: – بۇل مەنىڭ استاناعا ەڭ العاش كەلۋىم. ءبىز ەكسپو-2017 كورمەسى وتە جاقسى دەڭگەيدە وتەدى دەپ كۇتتىك. دايىندىق شارالارىنا قاراپ, كوپشىلىكتىڭ ءۇمىتى اقتالاتىنىنا سەنىمدى بولىپ ءجۇرمىن. بارلىق عيماراتتاردىڭ اجارى تاڭداي قاقتىرادى, وتە ادەمى. كەز كەلگەن نىساننىڭ زامان تالابىنا ساي سالىنعانىن كورەمىز. مەنىڭ ويىمشا, قازاقستان كورمەنى دەڭگەيىنە ساي ۇيىمداستىرادى. قىتايلىق «سينحۋا» اگەنتتىگىنەن جيىرما شاقتى جۋرناليست قازاق توپىراعىنا تابان تىرەدى. جالپى, اسپاناستى ەلىنەن 100-گە تارتا بۇقارالىق اقپارات قۇرالىنىڭ وكىلى وسىندا باس قوستىق. ءبىز تىكەلەي ەفير ارقىلى كوپتەگەن رەپورتاجدار جاسايتىن بولامىز.
دينا سەكورسكايا, رەسەي فەدەراتسياسىنان كەلگەن ساياحاتشى: – مەن ەنەرگەتيكا سالاسىنىڭ مامانىمىن, سوندىقتان استانادا باستالعان ەكسپو كورمەسىنىڭ تاقىرىبى مەنى قاتتى قىزىقتىرادى. حالىقارالىق شاراعا جۇزدەن استام مەملەكەت قاتىساتىنىن ەستىدىم. ال ولاردىڭ اراسىندا بالامالى ەنەرگيا كوزدەرىن وندىرۋدەن شارىقتاپ دامىعان ەلدەردىڭ دە بارى ءسوزسىز. وسى كورمەدەگى عىلىمي جاڭالىقتار مەن جەتىستىكتەر تاجىريبەگە ەنىپ, يگىلىككە اينالاتىن بولسا, پايداسى ۇشان-تەڭىز بولار ەدى. ءبىز سول كەزدە جاڭا وركەنيەتتىڭ شىڭىن باعىندىرعان ءداۋىردى باسىمىزدان وتكەرەمىز. مامىر ايىنان بەرى قازاقستان وڭىرلەرىن ارالاپ ءجۇرمىن. شىمبۇلاق, «مەدەۋ», شارىن شاتقالىنان العان اسەرلەرىمدى سوزبەن ايتىپ جەتكىزە المايمىن. مۇنداي تابيعات پەيزاجىن ءالى كۇنگە كورگەن ەمەسپىن. استانا قالاسىنىڭ اجارى ءتىپتى بولەك. ءزاۋلىم عيماراتتار كوز اربايدى, ساۋلەت كەشەندەرى سۇيسىندىرەدى.
جەڭىس نۇرلىبەك, تاراز قالاسىنىڭ تۇرعىنى: – استاناعا اۋليەاتا شاھارىنان شىققان ەكسكۋرسيا توبىمەن ىلەسىپ كەلدىم. باس قالامىزعا وسى ۋاقىتقا دەيىن بىرنەشە مارتە تابانىم تيگەن. ءار كەلگەن سايىن ءارتۇرلى اسەرگە بولەنەتىنىم بار. وسى ەكسپو كورمەسىنىڭ اشىلۋىن تاماشالادىم. كورمە قالاشىعىنداعى عيماراتتاردىڭ ءسانى بولەك اڭگىمە, العاشقى كۇنگى مۋلتيمەديالىق شوۋ, وتشاشۋ, وزگە دە مەرەكەلىك جيىندار كوڭىلىمىزدى كوتەردى, ايرىقشا اسەر سىيلادى. بىرىنەن كەيىن ءبىرى اشىلىپ جاتقان ءار پاۆيلوندا ءارتۇرلى جاڭالىق بارىن سەزەمىن. ويتكەنى, ءبىر-ءبىرىن قايتالامايدى, ۇقسامايدى. ولارداعى عاجايىپتاردىڭ قاي-قايسى دا تاڭداي قاقتىرماي قويمايدى. مەنىڭ قۋانعانىم, ءدال ورتاداعى دوڭگەلەك سفەرادا ورنالاسقان ەلىمىزدىڭ پاۆيلونى باسقا مەملەكەتتەردىڭ پاۆيلوندارىنان ەش كەم ەمەس. ءبىزدىڭ ونەرتابىستارىمىز بەن جاڭالىقتارىمىز دا كوپكە شاپاعاتىن تيگىزەتىنى ءسوزسىز.
جازىپ العان اسحات رايقۇل, «ەگەمەن قازاقستان»