اتاپ ايتقاندا, ءوڭىر جاڭاشىلدارى مەن عالىمدارى جانە وندىرىستىك كاسىپورىندار جەتەكشىلەرى كورمەنىڭ باستى تاقىرىپتارىنىڭ ءبىرى – «جاسىل ەكونوميكاعا» قاتىستى ءوز جوبالارىن ازىرلەدى. وسىعان وراي وبلىستاعى «TalanTeسhnology» جشس قوقىس وڭدەۋ زاۋىتى كورمەگە كەلۋشىلەرگە تمد اۋقىمىندا ەشقانداي بالاماسى جوق ايرىقشا جوبالار ازىرلەگەن. سونىمەن بىرگە, «كەمپىرساي» جەل-ەلەكتر ستانساسى جانە «يۋنايتەد ەنەردجي اقتوبە» زاۋىتتارى سەكىلدى كاسىپورىندار ۇسىنعان ونىمدەردە الەمنىڭ ءار قيىرىنان كەلگەن كورمەنى قىزىقتاۋشىلاردى ەنجار قالدىرا المايتىنىنا سەنىم مول. ەكسپو-2017 حالىقارالىق كورمەسى اياسىندا استاناعا كەلگەن مەيماندار كەڭ-بايتاق قازاقستاننىڭ كورىكتى دە كيەلى قويناۋلارىمەن تانىسىپ, كەڭىنەن ارالايتىنى جونىندە دە ارنايى باعدارلاما جاساقتالعانى بەلگىلى. بۇل باعىتتا ولار ءۇشىن اقتوبە ايماعىندا ەكى تۋريستىك مارشرۋت بەلگىلەنگەن. ونىڭ ءبىرىنشىسى – «قوبدا – باتىرلار وتانى» تاقىرىبى بويىنشا وسى قاسيەتتى توپىراقپەن تانىسۋ بولىپ وتىر. سونىمەن بىرگە, قازاقتىڭ باتىر قىزى ءاليا مولداعۇلوۆانىڭ تۋعان جەرى بۇلاق اۋىلىن ارالايدى. ەكىنشى باعىت «مارتوك-اققايىڭ» باعىتى بويىنشا بولماق. مۇندا ساياحاتشىلار بۇل ولكەنىڭ وسىمدىكتەر مەن جانۋارلار دۇنيەسىنىڭ قايتالانباس كەلبەتىنە قانىعا الادى. وڭىردە كولىك-لوگيستيكا قىزمەتىنىڭ جوعارى دەڭگەيدە دامىعانى جانە ىڭعايلى تەمىر جول قاتىناسى مەن اقتوبە قالاسىنداعى حالىقارالىق دەڭگەيدەگى اۋەجايدىڭ قالىپتى قىزمەتى, ەل قوناقتارىنىڭ وڭىرگە كەلۋىنە قولايلى جاعداي تۋعىزادى, دەيدى اقتوبە وبلىستىق سىرتقى بايلانىستار جانە تۋريزم باسقارماسىنىڭ باسشىسى ەرمەك كەنجەحان ۇلى. سونىمەن بىرگە, ونىڭ ايتۋى بويىنشا اقتوبە مادەنيەت پەن ونەر قىزمەتكەرلەرى دە استاناعا كەلىپ, كورمەگە قاتىسۋشىلارعا ءوز ونەرلەرىن ۇسىنباق. مۇندا اسىرەسە, قولونەر شەبەرلەرىنىڭ ءتول تۋىندىلارىنا باسىمدىقتار بەرىلمەك. قازاقتىڭ زەرگەرلىك بۇيىمدارى مەن اشەكەيلەرى ۇلتتىق برەند دەڭگەيىنەن تابىلا الاتىن قۇندىلىقتار دەسەك, قاتەلەسە قويماسپىز. بۇل تۇرعىدا جيىرما بەس اقتوبەلىك قولونەر شەبەرىنىڭ ءوز جوبالارىن ەتنواۋىل جوباسى اياسىندا قوناقتارعا ۇسىنۋى ارتىقتىق ەتپەسى انىق. «قازاق پوەزياسىنىڭ پات- ريارحى قادىر مىرزا ءالىنىڭ وسىدان كەم دەگەندە 40 جىل بۇرىن جازىلعان «قازاقتاردى شەتەلدىك قوناقتارعا تانىستىرۋ» دەگەن تاماشا ولەڭى وقىرماندارعا جاقسى تانىس دەپ ويلايمىن. بۇل ولمەيتىن, وشپەيتىن, رۋحاني قۇندىلىعىن ەشۋاقىتتا جوعالتپايتىن ناعىز كلاسسيكالىق تۋىندى. حالقىمىزدىڭ بويىنداعى بارلىق جاقسى قاسيەتتەر وسى ولەڭدە كورىنىس تاپقان. كورمە كەزىندە بۇل پوەزيا تۋىندىسىن قازاق, ورىس جانە اعىلشىن تىلدەرىندە كورنەكى ورىنداردىڭ بىرىنە ءىلىپ ورنالاستىرسا ارتىقتىق ەتپەس ەدى» دەگەن ويىن ءبىلدىردى گازەت تىلشىسىنە حالىقارالىق «قازاق ءتىلى» قوعامى وبلىستىق بولىمشەسى توراعاسىنىڭ ورىنباسارى جانعابىل قاباقباەۆ. مىنە, اقتوبەلىكتەردىڭ شەتەلدىك قوناقتارعا ۇسىناتىن تارتۋ-تارالعىلارىنىڭ سىر-سيپاتى وسىنداي.
تەمىر قۇسايىن, «ەگەمەن قازاقستان»
اقتوبە