ليۋكسەمبۋرگتىڭ پرەمەر-ءمينيسترى كساۆە بەتتەل ءوز سوزىندە قازاقستانمەن اراداعى قارىم-قاتىناستاردى نىعايتا تۇسۋگە مۇددەلى ەكەنىن جەتكىزدى. – مەن استاناعا وسىمەن ەكىنشى رەت كەلىپ وتىرمىن. وسى قالادا ليۋكسەمبۋرگ ۇلى گەرتسوگتىگى كونسۋلدىعىنىڭ اشىلعانىنا قۋانىشتىمىن. بۇل ءبىزدىڭ ەلىمىز ءۇشىن دە, قازاقستان ءۇشىن دە ماڭىزدى وقيعا دەپ ويلايمىن. استاناعا العاش كەلگەننەن بەرگى ارالىقتا قازاقستان تۋرالى كوپ مالىمەتكە قانىقتىم. قازاقستاندا كوپتەگەن ۇلت وكىلدەرى, ءدىن وكىلدەرى تۇراتىنىن ءبىلدىم, سان قيلى مادەنيەتتەردىڭ شوعىرلانعان جەرى ەكەنىن ءتۇسىندىم. قازاقستان تاۋەلسىزدىك العاننان بەرى الەم ەلدەرىمەن ديپلوماتيالىق قاتىناس ورناتۋعا دايىن ەكەنىن كورسەتتى. استانادا اشىلعان كونسۋلدىق قازاقستان-ليۋكسەمبۋرگ اراسىنداعى بايلانىستاردى ودان ءارى كەڭەيتە تۇسۋگە ىقپال ەتەدى دەپ سەنەمىن,– دەدى كساۆە بەتتەل. قازاقستان مەن ليۋكسەمبۋرگ اراسىندا ديپلوماتيالىق بايلانىستار ورناعانىنا بيىل 25 جىل تولاتىنىن ايتا كەتۋ كەرەك. سودان بەرگى ارالىقتا ساۋدا-ەكونوميكالىق, مادەني-گۋمانيتارلىق باعىتتاردا بايلانىس جولعا قويىلعان. استاناداعى باسقوسۋدا ءسوز العان ليۋكسەمبۋرگتىڭ قازاقستانداعى توتەنشە جانە وكىلەتتى ەلشىسى جان-كلود كنەبەلەر: – بۇگىنگى جيىنعا ەكى ەلدىڭ ەكونوميكاسى مەن ىشكى قاۋىپسىزدىگىنە جاۋاپتى لاۋازىمدى تۇلعالاردىڭ قاتىسقانى اشىلۋ ءراسىمىنىڭ قانشالىقتى ماڭىزدى ەكەنىن كورسەتەدى. ءوز باسىم بۇل كونسۋلدىققا ءجيى كەلىپ, ەلدىڭ ءتۇرلى قۇرىلىمدارىنىڭ وكىلدەرىمەن ءجيى كەزدەسىپ تۇرۋعا تىرىسامىن. ءبىز بۇل جەردە ورتاق باستامالار مەن جوبالاردى ىسكە اسىراتىن بولامىز,– دەدى. وتكەن جىلدىڭ قورىتىندىسى بويىنشا ەكى ەل اراسىنداعى ساۋدا اينالىمى 60 پايىزعا ءوسىپ, 18 ملن دوللاردان اسقانىن ايتىپ وتكەن ءجون. ليۋكسەمبۋرگ قازاقستانعا نەگىزىنەن كولىك قۇرالدارىن, ەلەكتر-تەحنيكالىق جابدىقتار, توقىما ماتالارى مەن مەتالل ەكسپورتتايدى.
ارنۇر اسقار, «ەگەمەن قازاقستان»