بۇل تۋرالى بۇگىن ەلوردادا ءوتىپ جاتقان شىۇ-عا مۇشە مەملەكەتتەر باسشىلارى كەڭەسىنىڭ كەڭەيتىلگەن وتىرىسىندا قر پرەزيدەنتى نۇرسۇلتان نازارباەۆ ايتتى, دەپ حابارلايدى قازاقپارات.
ء«بىزدىڭ ۇيىمىمىز اياسىنداعى ەكونوميكالىق كووپەراتسيالاردى ىلگەرىلەتۋ ماسەلەلەرىنە ايرىقشا نازار اۋدارۋ ماڭىزدى. ول ءۇشىن جاڭا ينستيتۋتتىق مۇمكىنشىلىكتەر قۇرىلۋدا. بىرىنشىدەن, شىۇ-عا مۇشە مەملەكەتتەر ۇكىمەتتەرىنىڭ اراسىندا حالىقارالىق اۆتوموبيل تاسىمالى ءۇشىن جايلى جاعداي جاساۋ تۋرالى كەلىسىم كۇشىنە ەندى. ءبىزدىڭ ەلدەرىمىزدىڭ ترانزيتتىك-كولىكتىك الەۋەتىن اشۋ دا ازىرلەنىپ جاتقان شىۇ جولدارىن دامىتۋ باعدارلاماسىنا سەپتىگىن تيگىزەتىن بولادى», – دەدى ەلباسى.
ەكىنشىدەن, قازاقستان پرەزيدەنتى ەاەو مەن جىبەك جولى ەكونوميكالىق بەلدەۋ جوبالارىن تۇيىندەستىرۋدى ەسكەرە كەلە وڭىرلىك ساۋدا-ەكونوميكالىق ىنتىماقتاستىق كەلەشەگىنىڭ زور بولارىنا سەنىمدى ەكەندىگىن ايتتى. بۇل رەتتە قازاقستاندا «نۇرلى جول» ۇلتتىق باعدارلاماسى مەن جىبەك جولى ەكونوميكالىق بەلدەۋىن تۇيىندەستىرۋدەگى ىنتىماقتاستىق جوسپارىنىڭ قارقىندى جۇزەگە اسىرىلىپ جاتقاندىعىن اتاپ ءوتتى.
«ۇشىنشىدەن, ءوزارا ساۋدا كولەمىنىڭ ارتۋى بولاشاقتا شىۇ-نىڭ ەركى ساۋدا ايماعىن قۇرۋعا سەپتىگىن تيگىزە الادى. بۇل جەردە ءبىزدىڭ ەلدەرىمىز ەكونوميكالىق ءوزارا ءىس-قيمىل سالاسىنداعى وزدەرىن قىزىقتىراتىن جوبالاردى زەردەلەۋدى باستاۋ ارقىلى كەزەڭ-كەزەڭىمەن ىلگەرىلەي الادى. مۇنان بولەك, ءبىزدىڭ قىزمەتىمىزدىڭ ماڭىزدى ۆەكتورى مادەني-گۋمانيتارلىق ىنتىماقتاستىق سانالادى. بۇل تۇرعىدا شىۇ ۋنيۆەرسيتەتىن قۇرۋ جانە جۇمىسىن جولعا قويۋ تۋرالى كەلىسىمگە قول قويۋدى قولدايمىز», – دەدى قر پرەزيدەنتى.
مۇنان بولەك, نۇرسۇلتان نازارباەۆ شىۇ-عا مۇشە مەملەكەتتەردىڭ 2017-2018 جىلدارعا ارنالعان تۋريزم سالاسىنداعى ىنتىماقتاستىق باعدارلاماسىن ۇيىمداستىرۋداعى بىرلەسكەن ءىس-قيمىل جوسپارىن قابىلداۋ اتالعان سالاداعى ءوزارا ءىس-قيمىلعا تىڭ سەرپىن بەرەتىندىگىن اتاپ ءوتتى.