كەشە ينتەرپول ليۆيانىڭ بۇرىنعى پرەزيدەنتى مۋاممار كاددافيدىڭ ۇلى ءسااديدى تۇتقىنداۋعا وردەر بەردى. حالىقارالىق پوليتسيا ۇيىمى كاددافيدىڭ ۇلىنىڭ اسا ىزدەۋ سالىنعان قىلمىسكەرلەر تىزىمىنە ەنگىزىلگەنىن حابارلادى.
وردەر سااديگە جىلجىمايتىن م ۇلىككە بايلانىستى الاياقتىققا باردى, ادامداردى قورقىتىپ-ۇركىتتى جانە جالعاسىپ جاتقان ازامات سوعىسىندا ليۆيالىقتاردى ءولتىرۋگە قاتىستى دەگەن ايىپ تاققان ەلدەگى جاڭا بيلىكتىڭ سۇراۋ سالۋى بويىنشا بەرىلگەن. سوڭعى مالىمەت بويىنشا, ساادي كاددافي كورشى نيگەر مەملەكەتىندە وتباسىمەن بىرگە جاسىرىنىپ ءجۇر.
اسكەريلەرگە ۋلتيماتۋم قويىپ وتىر
مىسىردىڭ ساياسي پارتيالارى ەگەر ەل بيلىگىندەگى اسكەريلەر سايلاۋ زاڭناماسىنا بىرقاتار تۇزەتۋلەر ەنگىزبەيتىن بولسا, وندا پارلامەنتتىك سايلاۋعا بويكوت جاريالايتىندىقتارىن ءمالىمدەدى. وسىنداي مالىمدەمەمەن, قازىرگى كەزدەگى اسا ىقپالدى «مۇسىلمان باۋىرلار» پارتياسىن قوسا العاندا, ءتۇرلى ساياسي باعىتتاعى 60 پارتيا وكىلى شىعىپ وتىر.
پارتيالار تالاپ ەتىپ وتىرعان تۇزەتۋلەر نەگىزىنەن پارلامەنتتىڭ تومەنگى جانە جوعارعى پالاتالارىنا دەپۋتاتتار سايلاۋ تارتىبىنە قاتىستى. قارۋلى كۇشتەردىڭ جوعارعى كەڭەسى ماقۇلداعان زاڭعا سايكەس, ساياسي پارتيالاردان كانديداتتار سايلاۋعا تەك ءتىزىم شەڭبەرىندە عانا تۇسۋلەرى ءتيىس. پارتيالار وكىلدەرى, سونداي-اق سايلاۋعا تەك پارتيا تىزىمىمەن عانا ەمەس, سونداي-اق تاۋەلسىز كانديداتتار رەتىندە دە قاتىسۋ قۇقىن يەلەنبەك.
كورول كەشىرىم جاسادى
ساۋد ارابياسىندا ايەل بالاسىنا رولگە وتىرىپ, كولىك جۇرگىزۋگە زاڭمەن تىيىم سالىنعان. بۇرناعى كۇنى ساۋديا كورولى ابدۋللا ماشينە جۇرگىزگەنى ءۇشىن ون مارتە دۇرە سوعىلعان دجاستايناعا كەشىرىم جاساۋ تۋرالى شەشىم قابىلدادى.
بۇل ساۋديا تاريحىنداعى وسىنداي العاشقى وقيعا بولىپ وتىر. بۇعان دەيىنگى ايەلدەردىڭ بارلىعى ايىپ تولەيتىن. سودان كەيىن ءتيىستى ورىندار قىز-كەلىنشەكتىڭ جاۋاپتى ادامىنان بولاشاقتا رولگە وتىرعىزبايمىز دەگەن قولحات جازدىرىپ الاتىن. جالپى, ساۋديادا كولىك جۇرگىزگەنى ءۇشىن ەڭ قاتال جازاعا جەرگىلىكتى بەلسەندى مانال ءال-شاريف تارتىلعان-تىن. ول 10 كۇنگە باس بوستاندىعىنان ايىرىلعان ەدى.
باسشى بۇيرىق بەرمەپتى
بوليۆيا پرەزيدەنتى ەۆو مورالەس پوليتسيا قاتىگەزدىكپەن قۋىپتى تاراتقان دەمون- ستراتسياعا قاتىسۋشىلار الدىندا كەشىرىم سۇرادى. امازونكا ۇندىستەرى تايپالارىنىڭ وكىلدەرى شەرۋگە بيلىكتىڭ امازونكا ويپاتىندا اۆتوماگيسترال سالامىز دەگەن شەشىمىنە قارسىلىق ءبىلدىرىپ شىققان بولاتىن.
ەۆو مورالەس سونداي-اق ءوزىنىڭ دەمونستراتسيانى جاۋىزدىقپەن قۋىپ تاراتۋ تۋرالى بۇيرىق بەرمەگەنىن اتاپ كورسەتتى جانە بولعان جاعدايدى ەل ۇكىمەتى ءۇشىن «قاتەرلى قوڭىراۋ» دەپ اتادى. شەرۋگە كەلسەك, وعان ەلدىڭ ءتۇرلى قالالارى بويىنشا ونداعان مىڭ ادام قاتىسقان بولاتىن. شەرۋشىلەر وكىلدەرىنىڭ سوزدەرىنە قاراعاندا, 4 ادام قازا تاۋىپتى.
كۋبا ەلى ومىرىندەگى جاڭالىق
كۋبا ۇكىمەتى ەلدە اۆتوكولىكتەردى ەركىن ساتۋعا جانە ساتىپ الۋعا رۇقسات بەرەتىن قاۋلى جاريالادى. بۇعان دەيىن وسىنداي وپەراتسيالاردى 1959 جىلعا دەيىن شىققان ماشينەلەرگە قاتىستى عانا قولدانۋعا بولاتىن. سوندىقتان كوشەلەردە نەگىزىنەن كونەرگەن كولىكتەردى كورەتىنسىڭ. ولار نەگىزىنەن امەريكالىق ماشينەلەر بولسا, كەيىننەن كەڭەستىك كولىكتەر دە جەتكىزىلە باستاعان ەدى.
ەندى كۋبادا ەشقانداي ارنايى رۇقساتسىز-اق كولىكتەردى ساتۋعا, ساتىپ الۋعا نەمەسە سىيلاۋعا مۇمكىندىك بەرىلە باستادى. مۇنداي قۇقىق ەل ازاماتتارىنا عانا ەمەس, سونداي-اق كۋبادا تۇراتىن شەتەلدىكتەرگە دە بەرىلىپ وتىر. دەي تۇرعانمەن, اۆتوموبيلدەردى شەت ەلدەردەن اكەلۋ ازىرشە شەت ەل ازاماتتارى مەن بيلىك ارنايى رۇقسات بەرەتىن ەل ازاماتتارى ءۇشىن عانا مۇمكىن بولماق. وسى سەبەپتى كۋبالىقتار بۇگىندە تەك ارالعا اكەلىنىپ ۇلگەرگەن كولىكتەردى عانا ساۋداعا سالماق.
كازينوعا تىيىم سالىندى
قىرعىزستان پارلامەنتى كازينو مەن ويىن اۆتوماتتارى زالدارىن زاڭعا تومپاق كەلەدى دەپ جاريالادى. 29 قىركۇيەكتە ەل اۋماعىندا ويىن بيزنەسىنە تىيىم سالۋ تۋرالى زاڭ جوباسى بىردەن ءۇش وقىلىمدا تالقىلانىپ, قابىلداندى. ءسويتىپ, 2012 جىلدىڭ 1 قاڭتارىنان باستاپ اتاعان زاڭ كۇشىنە ەنەتىن بولدى.
زاڭ جوباسىن 105 دەپۋتات قولداپ داۋىس بەرسە, ءبىر ادام قارسىلىق بىلدىرگەن جانە ءبىر حالىق قالاۋلىسى قالىس قالعان. ارتىنشا قۇجات قىرعىزستاننىڭ ۋاقىتشا پرەزيدەنتى روزا وتۋنباەۆاعا قول قويۋ ءۇشىن جىبەرىلگەن. رەسمي دەرەك بويىنشا, قازىرگى كەزدە قىرعىز رەسپۋبليكاسىنىڭ اۋماعىندا 21 كازينو بار بولسا, 3 مىڭعا جۋىق ويىن اۆتوماتتارى زالدارى تىركەلىپتى. ويىن بيزنەسىنىڭ وكىلدەرى وزدەرى ءۇشىن «جامانات حاباردى» ەستي سالا, ميتينگكە شىقتى.
قىسقا قايىرىپ ايتقاندا:
ۆەنەسۋەلا پرەزيدەنتى ۋگو چاۆەس بۇيرەك جەتىسپەۋشىلىگى دياگنوزىمەن شۇعىل اۋرۋحاناعا جاتقىزىلدى. ونىڭ دەنساۋلىعى جازدا جانە كۇزدىڭ باسىندا وتكىزىلگەن بىرنەشە حيمياتەراپيا كۋرستارىنان كەيىن كۇرت ناشارلاپ كەتكەن.
بۇرناعى كۇنى تايۆان پوليتسياسى قىتايدىڭ جانە وڭتۇستىك-شىعىس ازياداعى تاعى جەتى ەلدىڭ ارنايى قىزمەتىمەن كۇش بىرىكتىرىپ, الاياق توپتاردىڭ قىلمىسىن اشۋ بويىنشا ارنايى وپەراتسيا وتكىزدى. ونىڭ بارىسىندا 827 كۇدىكتى ۇستالعان.
سينگاپۋردەگى Shell كومپانياسىنىڭ مۇناي وڭدەۋ زاۋىتىندا شىققان ءورتتىڭ اياعى جارىلىسقا اكەلىپ سوقتىردى. وسىنىڭ سالدارىنان ءورت قايتا كۇشەيە ءتۇستى. ەگەر ءتىلسىز جاۋ مۇناي قويمالارىنا جەتەر بولسا, سوڭى ۇلكەن اپاتقا الىپ كەلۋى مۇمكىن.
ينتەرنەت ماتەريالدارى نەگىزىندە ازىرلەندى.