قر پرەمەر-ءمينيسترى ب.ساعىنتاەۆ ۇكىمەت وتىرىسىندا تاياۋ ارادا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىن ماقۇلداۋدى اياقتاپ, ونى بەكىتۋگە شىعارۋدى تاپسىردى.
پرەمەر-مينيستر جاسالعان باعدارلاما اياسىندا جۇمىسسىز ازاماتتارمەن جۇمىس ىستەۋ بارىسى وزگەرەتىنىن اتاپ ءوتتى.
«بۇرىن «جۇمىسپەن قامتۋ 2020» جول كارتاسى باعدارلاماسى بويىنشا ۋاقىتشا جۇمىس ورىندارىنا كوڭىل بولىنسە, ەندى وقىتۋ ارقىلى تەك قانا تۇراقتى جۇمىس ورىندارىنا كوڭىل بولىنەدى. ەڭ باستىسى, ادامدارعا ءوز ىستەرىن اشۋعا جانە جاڭا جۇمىس ورىندارىن قالىپتاستىرۋعا مۇمكىندىك بەرەمىز. جاۋاپتى ورگاندار انىقتالدى, وكىلەتتىلىكتەر بەرىلدى, ولاردىڭ اراسىندا جەرگىلىكتى اتقارۋشى ورگاندار بار», – دەدى ب.ساعىنتاەۆ.
پرەمەر-مينيستر وسى باعدارلاما بويىنشا بارلىق ازىرلىك جۇمىستارىن اياقتاپ, ونى 15 جەلتوقسانعا دەيىن ۇكىمەتكە بەكىتۋگە ۇسىنۋدى تاپسىردى.
مەملەكەت باسشىسى نۇرسۇلتان نازارباەۆتىڭ تاپسىرماسى بويىنشا, قر ۇكىمەتى جاڭادان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن جاساعان بولاتىن. بۇل باعدارلامانىڭ ماقساتى – ناتيجەلى جۇمىسپەن قامتۋعا جاعداي جاساي وتىرىپ, حالىققا ءوز تابىستارىن ارتتىرۋعا مۇمكىندىك بەرۋ.
ارنۇر اسقاروۆ,
«ەگەمەن قازاقستان»