بۇگىن استانادا قازاقستان فۋتبول فەدەراتسياسىنىڭ XIV كەزەكتەن تىس سايلاۋ كونفەرەنتسياسى ءوتتى. كۇن تارتىبىندە قفف پرەزيدەنتىن سايلاۋ ماسەلەسى كوتەرىلدى. كونفەرەنتسيانىڭ جۇمىسىنا فەدەراتسيا مۇشەلەرى جانە اتقارۋشى كوميتەتتىڭ مۇشەلەرى, قفف اپپاراتى, ايماقتىق فۋتبول فەدەراتسيالارىنىڭ دەلەگاتتارى, باق وكىلدەرى قاتىستى.
شارا شەڭبەرىندە دەلەگاتتار سەيىلدا بايشاقوۆتىڭ كانديداتۋراسى ءۇشىن داۋىس بەردى. ونىڭ قورىتىندىسى بويىنشا, سەيىلدا بايشاقوۆ 2020 جىلدىڭ 28 قاراشاسىنا دەيىنگى مەرزىمگە قازاقستان فۋتبول فەدەراتسياسىنىڭ پرەزيدەنتى بولىپ سايلاندى.
«سىزدەردىڭ سەنىمدەرىڭىز بەن جوعارى باعالارىڭىزدى شىن جۇرەكتەن العىسىمدى بىلدىرەمىن. ءوز تاراپىمنان, ەلىمىزدە فۋتبولدىڭ جان-جاقتى دامۋىنا بار كۇش-جىگەرىمدى سالامىن. العا قويىلعان مىندەتتەردى لايىقتى ورىنداپ, بيىك ماقساتتارعا جەتىپ, جاڭا شىڭداردى باعىندىرۋ ءۇشىن فۋتبولدى ساپالىق جاڭا دەڭگەيگە كوتەرەتىنىمىزگە سەنىمدىمىن», – دەدى سەيىلدا بايشاقوۆ.