بالقاش قالاسىنداعى كوپ قاباتتى ۇيلەردىڭ بىرىنەن ءورت شىعىپ, ەكى جاسار بالا, ونىڭ اتا-اناسى مەن كورشىسى ءتىلسىز جاۋدىڭ سالدارىنان قازا تاپتى, دەپ حابارلايدى baq.kz
وقيعا ورنىنا كەلىپ جەتكەن ءورت سوندىرۋشىلەر 4 ادامنىڭ ءمايىتىن تاپقان. قاراعاندى وبلىسى توتەنشە جاعدايلار دەپارتامەنتىنىڭ مالىمەتىنشە, مايىتتەر ءبىرىنشى جانە ەكىنشى قاباتتاعى ەكى پاتەردەن تابىلعان.
«تۇرعىن ۇيدەن 14 ادام ەۆاكۋاتسيالاندى. ءورت سوندىرۋشىلەر ەكىنشى قاباتتاعى پاتەرلەردى تەكسەرگەن ۋاقىتتا ءۇش ادامنىڭ ءمايىتى تابىلدى. ونىڭ بىرەۋى بالا. بۇل پاتەردە ءورت بولماعان. ءورت ءبىرىنشى قاباتتاعى پاتەردەن شىققان», – دەپ حابارلايدى توتەنشە جاعدايلار دەپارتامەنتى.
ءورت 30 شارشى مەتر اۋماقتى قامتىعان. ءتىلسىز جاۋدىڭ سالدارىنان پاتەردەگى جيھازدار, ەسىك پەن تەرەزەلەر, سونداي-اق ەدەن ورتەنىپ كەتكەن.
«ءورتتى ءسوندىرۋ كەزىندە پاتەردەن ەر ادامنىڭ ءمايىتى تابىلدى. توتەنشە جاعدايدىڭ سەبەپتەرى انىقتالىپ جاتىر», – دەپ مالىمدەدى دەپارتامەنتتىڭ ءباسپاسوز قىزمەتى.