كەزدەسۋ بارىسىندا ج.تۇيمەباەۆ مەملەكەت باسشىسىنا وبلىستىڭ بيىلعى پەرسپەكتيۆالارى, سونداي-اق ءوڭىردىڭ 2021 جىلعا دەيىنگى الەۋمەتتىك-ەكونوميكالىق دامۋ جوسپارى تۋرالى باياندادى, دەپ حابارلايدى اقوردانىڭ رەسمي سايتى.
ەلباسى ءوڭىردىڭ سالىق تۇسىمدەرى كورسەتكىشىنىڭ تومەن ەكەنىن, ءوڭىردىڭ رەسپۋبليكا بويىنشا مەيلىنشە دوتاتسيالى بولىپ وتىرعانىن اتاپ ءوتتى.
سونداي-اق, نۇرسۇلتان نازارباەۆ ەڭبەك نارىعىن رەتتەۋ سالاسىنداعى جۇمىسسىزدىق ماسەلەلەرىنە نازار اۋداردى.
ء"وزىن-ءوزى جۇمىسپەن قامتىعان ازاماتتاردىڭ ۇلەسى جوعارى. وڭتۇستىك قازاقستان ءۇشىن جۇمىسسىزدىق پەن حالىقتىڭ كوشى-قون ماسەلەسى ارقاشان وزەكتى بولىپ قالا بەرمەك. بۇل ماسەلەلەردى شەشۋ ءۇشىن شاعىن جانە ورتا بيزنەستى ودان ءارى دامىتۋ قاجەت," – دەدى قازاقستان پرەزيدەنتى.
بۇدان بولەك, مەملەكەت باسشىسى شىمكەنتتىڭ تاياۋ كەلەشەكتە تۇرعىندارىنىڭ سانى 1 ميلليون ادامنان اساتىن قالاعا اينالاتىنىن اتاپ ءوتتى.
وبلىس اكىمى ەلباسىعا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدا بەلگىلەنگەن ماقساتتار مەن مىندەتتەردى ايماق تۇرعىندارى جان-جاقتى قولداپ وتىرعانى تۋرالى مالىمدەدى.
سوڭىندا نۇرسۇلتان نازارباەۆ وبلىس ونەركاسىبىن, اۋىل شارۋاشىلىعى مەن مال شارۋاشىلىعى سالالارىن دامىتۋ, ينۆەستيتسيالىق تارتىمدىلىعىن ارتتىرۋ جونىندە مىندەتتەردى ورىنداۋعا باعىتتالعان بىرقاتار ناقتى تاپسىرما بەردى.