توقسانىنشى جىلداردىڭ باسىندا شولپان جۇلدىزداي جارقىراپ شىققان بۇل توپتى بۇگىنگى جاستاردىڭ كوپشىلىگى بىلمەۋى دە مۇمكىن. بىراق سول كەزدەگى اعا بۋىن وكىلدەرى ولاردىڭ اۋەلەتە شىرقاعان اندەرىن ءالى كۇنگە ۇمىتقان جوق. ساعىنادى, ىزدەيدى. بۇل «جەرۇيىق» انسامبلى ەدى. كەزىندە ونەرىمەن شىعىس ءوڭىرىن عانا ەمەس, كۇللى قازاقستاندى ءتانتى ەتكەن انسامبل مۇشەلەرى قازىر قايدا ءجۇر؟
...80-جىلداردىڭ اياق كەزىندە زايساندا جۇرگەن مارات قوندىباەۆ, ەسبول كيرچيباەۆ, باۋىرجان زەينەش, قانات زاكاريانوۆ سىندى جۇرەگى ونەر دەپ سوققان جىگىتتەر ءبىر كۇنى كاتونقاراعايعا تويعا بارادى. سول ساپاردا اۋداننىڭ سول تۇستاعى باسشىسى جانىمقان قۇندىزباەۆپەن كەزدەسىپ, ونەرگە جاناشىر ازامات سول جەردە ونەرپاز جىگىتتەرگە «قۇدا» ءتۇسىپ, سوندا قالۋلارىن ءوتىنىپتى. سودان نە كەرەك, تورتەۋى تاۋەكەلگە بەل بۋىپ التايعا كەلەدى, جۇمىسپەن, باسپانامەن قامتىلادى.
– كاتونقاراعاي جەر ءجانناتىنداي كورىندى ماعان. ءسويتىپ, تابيعاتىمەن بايلانىستىرىپ, توبىمىزدى «جەرۇيىق» دەپ اتاۋدى ءجون كوردىك, – دەپ ەسكە الادى سول شاقتاردى سازگەر مارات قوندىباەۆ.
وسىلايشا, 1989 جىلى «جەرۇيىق» توبى ونەر الەمىنە جول تارتادى. اۋەلى كاتونقاراعايدا تۇساۋكەسەر كونتسەرتتەرىن وتكىزىپ, 1990 جىلى وسكەمەندە ۇيىمداستىرىلعان «ۆوستوك» اتتى ءان بايقاۋىنا قاتىسادى. ساحناعا 15 مينۋتتىق «نەۆادا-سەمەي» مۋزىكالىق كومپوزيتسياسىن الىپ شىققان توپ مۇشەلەرى قازىلار القاسىن ءتانتى ەتىپ, 1-ورىندى يەلەنەدى. بۇدان سوڭ پاۆلوداردا وتكەن رەسپۋبليكالىق بايقاۋدا توپ جارادى.
– ءسويتىپ, توبىمىز وڭىرگە عانا ەمەس, قازاقستانعا تانىلا باستادى. «قاريالار», «ساعىنىش», «الاش», «قۇربىم-اي» سىندى اندەرىمىز سول كەزدىڭ حيتىنە اينالدى. 1990 جىلى «ازيا داۋىسى» فەستيۆالىنە ءوتىنىش جىبەردىك. العاشىندا مۋزىكالىق اسپاپتاردا ويناۋىمىز تۇسىنىكسىز دەپ قابىلداي قويمادى. ءستيلىمىز تۇسىنىكسىز بولعان كورىنەدى. ويتكەنى, بىزدىكى ەتنوفولك پوپ ەدى, – دەيدى توپتىڭ بۇرىنعى مۇشەسى باۋىرجان زەينەش.
ارادا ازداعان ۋاقىت وتكەننەن كەيىن الماتىدان «ازيا داۋىسىنا» شاقىرتۋ كەلەدى. ءان بايقاۋىنا قىتاي, وزبەكستان, ءۇندىستان, تايلاند, سينگاپۋر, ۋكراينا مەملەكەتتەرىنىڭ ونەرپازدارىمەن قاتار, ءبىزدىڭ ەلدەن «اسسالاۋمالەيكۋم» اتتى توپ قاتىسادى.
كاتونقاراعايدان كەلگەن جىگىتتەر اۋەلى ەسبول كيرچيباەۆتىڭ «الاش» ءانىن, ودان سوڭ «قاراتورعايدى» اكاپەللامەن ورىندايدى. ءتورت جىگىتتىڭ مەرەيى بۇل بايقاۋدا دا ۇستەم بولىپ, حالىقارالىق ونەر باسەكەسىندە 3-ورىندى يەلەنەدى. شالعايداعى الىس اۋداننان كەلىپ, الاتاۋ باۋرايىن ءدۇر سىلكىندىرگەن ونەرپاز جىگىتتەردى فەستيۆالدان كەيىن روزا رىمباەۆا مەن تاسقىن وقاپوۆ ارنايى كەلىپ قۇتتىقتاپ, ىزگى تىلەكتەرىن ايتادى. ايتىپ قانا قويمايدى, الماتىدا قالۋ جونىندە ۇسىنىس بىلدىرەدى. «قازاقكونتسەرتكە» جۇمىسقا شاقىرادى. الايدا, توپ مۇشەلەرى تۋعان جەرلەرىنە قايتۋعا اسىعادى.
توقسانىنشى جىلدارى شىعىس جۇرتىن عانا ەمەس, كۇللى قازاقستاندى ونەرىمەن مويىنداتقان توپ مۇiەلەرى بۇگىندە ەلىمىزدىڭ ءار ايماعىندا تىرشىلىك كەشىپ جاتىر. «جەرۇيىق» توبىنا جەتەكشىلىك ەتكەن مارات قوندىباەۆ استانادا سازگەرلىكپەن اينالىسىپ جۇرسە, قانات زاكاريانوۆ پەن ەسبول كيرچيباەۆ الماتىدا تۇرىپ جاتقان كورىنەدى. توپتىڭ تاعى ءبىر مۇشەسى باۋىرجان زەينەش وسكەمەندە تەاتردا مۋزىكانت بولىپ قىزمەت اتقارادى.
ازامات قاسىم,
«ەگەمەن قازاقستان»
وسكەمەن