سايلاۋعا بۇل جولى توعىز كانديدات ءتۇستى. داۋىس بەرۋگە قاتىسقان سايلاۋشىلاردىڭ جارتىسىنان كوبىنىڭ قولداۋىنا يە بولعان كانديدات جەڭىمپاز اتانادى. سايلاۋشىلار تىزىمىنە 3 ميلليون 223 مىڭ 455 ادام ەنگىزىلگەن.
2016 جىلدىڭ 14 قىركۇيەگىندە قابىلدانعان جاڭا كونستيتۋتسياعا سايكەس, پرەزيدەنت وكىلەتتىگى بەس جىلدان جەتى جىلعا ۇزارتىلدى. سونىمەن قاتار, پرەزيدەنتتىڭ جاسى 70-تەن جوعارى بولماۋى كەرەك دەگەن شەكتەۋ الىنىپ تاستالدى.
تۇرىكمەنستان پرەزيدەنتتىگىنە كانديدات, ەلدىڭ قازىرگى باسشىسى گۋربانگۋلى بەردىمۇحامەدوۆ وتباسىمەن بىرگە جەكسەنبى كۇنى تاڭەرتەڭ داۋىس بەردى. سايلاۋ ۋچاسكەسىنە پرەزيدەنتپەن بىرگە ونىڭ اكە-شەشەسى دە كەلدى. «بۇكىل حالقىمىز ەل ءۇشىن ماڭىزدى وقيعاعا قاتىسۋدا. ميلليونداعان ادام كونستيتۋتسيالىق قۇقىعىن پايدالانىپ, ەرىكتەرىن ءبىلدىرىپ جاتىر. ولار بولاشاق الدىنداعى ۇلى جاۋاپكەرشىلىگىن سەزىنىپ, جوعارى مەملەكەتتىك قىزمەتكە الداعى جەتى جىلعا لايىقتى دەگەن كانديداتقا داۋىس بەرۋدە», دەدى گ.بەردىمۇحامەدوۆ.
59 جاستاعى گۋربانگۋلى بەردىمۇحامەدوۆ تۇرىكمەنستاندا بيلىككە 2006 جىلدىڭ جەلتوقسانىندا ەلدىڭ تۇڭعىش پرەزيدەنتى ساپارمۇرات نيازوۆ قايتىس بولعاننان كەيىن كەلدى.
ال 2012 جىلى ول سايلاۋشىلاردىڭ 97% داۋسىمەن ەكىنشى مەرزىمگە سايلاندى.
وسى رەتتە تۇرىكمەنستاندا پرەزيدەنت سايلاۋدىڭ كەيبىر ەرەكشەلىكتەرىنە توقتالا كەتكەندى ءجون كوردىك. تۇرىكمەنستان كونستيتۋتسياسى بويىنشا پرەزيدەنت – مەملەكەتتىڭ جانە اتقارۋشى بيلىكتىڭ باسشىسى. ەل ءتاۋەلسىزدىگىنىڭ, بەيتاراپتىعىنىڭ, تەرريتوريالىق تۇتاستىعىنىڭ كەپىلى.
تۇرىكمەنستان پرەزيدەنتى تىكەلەي سايلاۋدا جەتى جىلعا سايلانادى جانە انت بەرگەن ءساتتەن قىزمەتكە كىرىسەدى.
داۋىس بەرۋ قۇقىنا 18 جاسقا تولعان ەل ازاماتتارى يە. سوت شەشىمىمەن ىستەگەن ءىسى ءۇشىن زاڭ الدىندا جاۋاپكەرشىلىگى جوق دەپ تانىلعان ادامدار جانە ءتۇرمەدە جازاسىن وتەۋشىلەر سايلاۋعا قاتىسا المايدى.
تۇرىكمەنستان پرەزيدەنتتىگىنە كانديدات رەتىندە تۇرىكمەنستاندا تۋعان, جاسى 40-تان تومەن ەمەس, مەملەكەتتىك ءتىلدى بىلەتىن, سوڭعى 15 جىل بويى تۇرىكمەنستاندا تۇرعان, مەملەكەتتىك ورگانداردا, قوعامدىق ءبىرلەستىكتەردە, كاسىپورىنداردا, مەكەمەلەردە جۇمىس ىستەگەن ءتۇرىكمەنستان ازاماتىن ۇسىنۋعا بولادى.
كانديداتتى ساياسي پارتيالار, قوعامدىق بىرلەستىكتەر ۇسىنادى. قۇرىلتايعا قاتىسۋشىلاردىڭ جارتىسىنان كوبىنىڭ داۋسىن جيناعان جاعدايدا ۇمىتكەر سايلاۋعا ۇسىنىلعان بولىپ سانالادى.
ازاماتتاردىڭ توبى ۇسىنعان جاعدايدا, كانديدات بولىپ ءتىركەلۋ ءۇشىن كەمىندە 10 مىڭ سايلاۋشىنىڭ قولى كەرەك.
كانديداتتارعا تەلە-راديوارنالاردان تەڭدەي ەفير ۋاقىتى (كۇنىنە كەمىندە ءبىر ساعات), باسپاسوزدەن بىردەي كولەمدە ورىن بەرىلەدى.
سايلاۋشىلاردىڭ بەلسەندىلىگى قانداي دەڭگەيدە بولعانىنا قاراماستان, سايلاۋ وتكەن بولىپ ەسەپتەلەدى.
داۋىس بەرۋگە قاتىسقانداردىڭ جارتىسىنىڭ كوبىنە يە بولعان كانديدات جەڭگەن بولىپ سانالادى.
تۇرىكمەنستان پرەزيدەنتى ەل كونستيتۋتسياسىنا وڭ قولىن قويىپ انت بەرەدى.
سالتاناتتى جيىننىڭ ءتوراعاسى, تۇرىكمەنستاننىڭ بەس ءۋالاياتى جانە اشعاباتتىڭ اتىنان كەلگەن اقساقالدار مەملەكەت باسشىسىنا تۇرىكمەنستان پرەزيدەنتىنىڭ كۋالىگىن جانە بەلگىسىن تابىستايدى. پرەزيدەنت ەكىنشى مەرزىمگە سايلانعان بولسا, پرەزيدەنت بەلگىسى قايتا تابىس ەتىلمەيدى.
يناۋگۋراتسيادا تۇرىكمەنستان پرەزيدەنتى الدىنا اق كيىز توسەلەدى. پرەزيدەنتكە ءداستۇرلى تۇرىكمەن ساچاگى (نان ورايتىن قاسيەتتى داستارقان), جەبە سالىنعان قورامساق, قۇران جانە رۋحناما تارتىلادى.
بۇدان كەيىن پرەزيدەنت تۇرىكمەنستان ازاماتتارىنا ارناپ قىسقاشا ءسوز سويلەيدى.
ەرجان ءابدىرامان,
«ەگەمەن قازاقستان»