قاراعاندىدا وندىرىستىك قۋاتى تاۋلىگىنە 75 تونناعا دەيىن نان ونىمدەرىن شىعارا الاتىن, ەلىمىزدە تەڭدەسى جوق جاڭا زاۋىت اشىلدى. قۇرىلىسى نەبارى 8 ايدىڭ ىشىندە اياقتالعان جاڭا جوبا كاسىپكەرلىكتى قولداۋ كارتاسىنىڭ اياسىندا جۇزەگە اسقان. ءونىمىن سىرتقى نارىققا شىعاراتىن جاڭا نان زاۋىتىنا قاراعاندى, تەمىرتاۋ, شاحتينسك, ساران, اباي قالالارىنان 3 ملرد تەڭگەدەن استام ينۆەستيتسيا تۇرىندە قارجى قۇيىلعان.
– ءبىز بۇگىن قاراعاندى وبلىسىندا تاعى ءبىر جاڭا زاۋىتتىڭ تۇساۋىن كەسىپ تۇرمىز. «سارىارقا-نان-قاراعاندى» جشس نان زاۋىتى قازاقستاننىڭ يندۋستريالىق-يننوۆاتسيالىق دامۋ مەملەكەتتىك باعدارلاماسى نەگىزىندە سالىندى. كاسىپورىن الەمدىك بارلىق ستاندارتتارعا ساي, – دەدى «سارىارقا-نان» زاۋىتىنىڭ تۇساۋىن كەسكەن قاراعاندى وبلىسى اكىمىنىڭ ءبىرىنشى ورىنباسارى اسىلبەك دۇيسەباەۆ.
زاۋىت قۇرىلىسىنا تەك وتاندىق قۇرىلىس جابدىقتارى مەن قۇرىلعىلىق ەلەمەنتتەر پايدالانىلعان. ال, بارلىق قوندىرعىلار شەت ەلدەن, ياعني, گەرمانيا, يتاليا, فرانتسيا, سلوۆەنيا, سلوۆاكيا سىندى الدىڭعى قاتارلى ەۋروپالىق وندىرۋشىلەردىڭ قۇرىلعىلارىمەن جابدىقتالعان.
– بۇل زاۋىتقا نان پىسىرۋگە ارنالعان ەڭ وزىق ۇلگىدەگى جاڭا تەحنوگيالار ەنگىزىلدى. ونداعى قوندىرعىلار مەن كەشەندى جۇمىستار – قازاقستاندىق وندىرۋشىلەر مەن الەمدىك بەلگىلى كومپانيالار سەرىكتەستىگىنىڭ جەمىستى ناتيجەسى. سىزدەر كورىپ تۇرعان ارا-قاتىناستىڭ التىن كوپىرى اتالعان سالا بويىنشا تمد كولەمىندەگى ەڭ ءىرى ينۆەستيتسيالاردىڭ ءبىرى بولىپ تابىلادى, – دەدى تۇساۋكەسەر ءراسىمىنە قاتىسقان سلوۆەنيالىق «Gostol» كومپانياسىنىڭ باس ديرەكتورى ماتياج كومپارا.
«سارىارقا-نان» بۇگىنگى تاڭدا تمد-داعى جانە ەۋروپا مەن ازياداعى زاماناۋي ءارى جەتەكشى نان زاۋىتتارىنىڭ ءبىرى بولىپ تابىلادى.
«سارىارقا گرۋپپ» باقىلاۋ كەڭەسىنىڭ توراعاسى, كاسىپكەر ەرلان نىعماتۋلين جوباعا قاتىسقان بارلىق قۇرىلىسشىلار, شەتەلدىك سەرىكتەستەر جانە كاسىپورىن ۇجىمىن قۇتتىقتادى.
– قاراعاندىلىق «سارىارقا-نان» زاۋىتىنىڭ ۇجىمىندا بەلگىلەنگەن ستراتەگيا, ۇستانعان ايقىن باعىت بار. كىمدى ۇلگى تۇتىپ, قايدا تالپىنۋدى بىلەدى. مەن وسى جەردە جينالعان كاسىبي ۇجىمنىڭ الداعى ۋاقىتتا زور جەتىستىكتەرگە قول جەتكىزەتىندىگىنە ەرەكشە سەنىمدىمىن, وعان بارلىق نەگىز بار. ءبىز مۇندا ينۆەستيتسيا تارتىپ قانا قويماي, سونىمەن قاتار, نان ءوندىرىسىنىڭ الەمدىك وزىق ۇلگىدەگى تەحنولوگيالارىن قولداندىق. بارلىق ۇجىمنىڭ اتىنان ەلىمىزدە ينۆەستيتسيالىق قولايلى احۋال تۋدىرىپ وتىرعان ەلباسىمىز نۇرسۇلتان نازارباەۆقا شەكسىز العىسىمدى بىلدىرەمىن, – دەدى ول.
زاۋىت قاراعاندى مەن جاقىن ەلدى مەكەندەردىڭ 550-دەي تۇرعىنىن تۇراقتى جۇمىسپەن قامتاماسىز ەتپەك. بيزنەستىڭ الەۋمەتتىك جاۋاپكەرشىلىگى شەڭبەرىندە مۇمكىندىگى شەكتەۋلى جاندارعا دا جۇمىس ورنى قاراستىرىلعان. كاسىپورىن قىزمەتكەرلەرىنە زامان تالابىنا ساي سانيتارلىق-تۇرمىستىق جاعداي جاسالعان. سونداي-اق, كۇندىزگى جانە تۇنگى اۋىسىمدا جۇمىسكەرلەردى تەگىن تاماقتاندىرۋ مەن قىزمەتتىك اۆتوكولىك ماسەلەسى جولعا قويىلعان.
زاۋىتتا ادام قولىمەن جاسالاتىن اۋىر جۇمىس جوق. بارلىق ۇدەرىس مەحانيكالاندىرىلعان, ال نان ءپىسىرۋ جۇيەسى اۆتوماتتاندىرىلعان.
كونديتەرلىك ءوندىرىستىڭ باس تەحنولوگى, اتالمىش سالادا 40 جىل ەڭبەك ەتكەن ليۋبوۆ بوريسوۆنا: «بۇل وندىرىسكە كەلگەندە, قاراعاندىدا وسىنداي قۋاتتى زاۋىت سالىنىپ, وندا قاراعاندىلىقتار جۇمىس جاسايتىندىعى ءۇشىن بويىمدى ماقتانىش پەن قۋانىش قاتار كەرنەدى. بارلىعى باستان-اياق ويلاستىرىلعان, شىنىمەن قامقورلىقتى سەزىنەسىڭ. جاڭا تەحنولوگيالارمەن جۇمىس ىستەسەك تە, ەسكى رەتسەپتىنى ۇمىتپايمىز. قالا تۇرعىندارى دۇكەن سورەلەرىندەگى بەلگىلى ءبىر نان ونىمدەرىنە ۇيرەنىپ قالعان. دەسەك تە, الداعى ۋاقىتتا تۇتىنۋشىلاردى باسقا دا جاڭا نان ونىمدەرىمەن قۋانتاتىن بولامىز», دەپ ءوز ويىمەن ءبولىستى.
زاۋىت ءوزىنىڭ جۇمىسىن 45-تەن اسا نان ونىمدەرىن شىعارۋمەن باستادى. ماسەلەن, «مرامورنىي» دەپ اتالاتىن جاڭا نان ءونىمى بار. بۇدان ءارى شىعارىلاتىن ءونىم اي سايىن 3-4 تۇرمەن تولىقتىرىلىپ وتىرادى. ال, ءونىمدى تاراتۋ ماقساتىندا 65 ارنايى اۆتوكولىك ساتىپ الىنعان.
الەۋمەتتىك قولداۋ شاراسى اياسىندا «سارىارقا-نان» زاۋىتىنىڭ العاشقى ءونىمى قاراعاندى قالاسىنداعى بالالار ۇيىنە جونەلتىلدى.
ميراس اسان,
«ەگەمەن قازاقستان»
قاراعاندى