ءماجىلىس دەپۋتاتتارى ابزال ەراليەۆ, مايرا ايسينا, مانسۇرحان ماحامبەتوۆ, اسىلبەك سماعۇلوۆ جانە ناتاليا جۇمادىلداەۆا سىرداريا اۋدانى تۇرعىندارىمەن كەزدەسىپ, جەرگىلىكتى حالىققا ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن جان-جاقتى ءتۇسىندىردى.
اۋداندىق مادەنيەت ءۇيىندە بولعان كەزدەسۋدە جولداۋدا ايتىلعان ءۇشىنشى جاڭعىرۋدىڭ نەگىزگى بەس باسىمدىعى تاقىرىپقا ارقاۋ بولدى. ابزال ەراليەۆ «ەلباسى جولداۋى ەلىمىزدىڭ باسەكەگە قابىلەتتىلىگىن ارتتىرۋعا باعىتتالعاندىعىن ايتىپ, بۇل كاسىپكەرلىكتى, ەلدى مەكەندەردە ينتەرنەت جۇيەسى مەن ساندىق تەحنولوگيانى دامىتۋعا جاسالىپ وتىرعان زور مۇمكىندىك جانە زامان تالابى» ەكەنىن نازارعا سالدى.
قازاقستان حالقى اسسامبلەياسى اتىنان سايلانعان دەپۋتات ناتاليا جۇمادىلداەۆا IT-ءبىلىمدى, قارجىلىق ساۋاتتىلىقتى قالىپتاستىرۋعا, ۇلتجاندىلىقتى دامىتۋعا, قالا مەن اۋىل مەكتەپتەرى اراسىنداعى ءبىلىم بەرۋ ساپاسىنىڭ الشاقتىعىن ازايتۋ جولىنداعى جۇمىستاردى جانداندىرۋ مەن ءۇش ءتىلدى وقۋعا كەزەڭ-كەزەڭمەن كوشۋ ماسەلەسىنە دەن قويدى.
كەزدەسۋ سوڭىندا تۇرعىندار مەملەكەت باسشىسىنىڭ جولداۋىنان تۋىندايتىن نەگىزگى باعىتتاردى حالىق اراسىندا كەڭىنەن ناسيحاتتاپ, جۇكتەلگەن جاۋاپكەرشىلىكتى ناقتى جۇزەگە اسىرۋدا بىرلەسە جۇمىس جاساۋعا ۋاعدالاستى.
ەرجان بايتىلەس,
«ەگەمەن قازاقستان»
قىزىلوردا وبلىسى