قر يدم تۋريزم يندۋسترياسى دەپارتامەنتى فيليپپيندەگى جەر سىلكىنىسىنە بايلانىستى قازاقستاندىق تۋريستەرگە قاۋىپسىزدىك تالاپتارىن ساقتاۋعا كەڭەس بەردى. بۇل تۋرالى baq.kz حابارلادى.
«قر ينۆەستيتسيالار جانە دامۋ مينيسترلىگى تۋريزم يندۋسترياسى دەپارتامەنتىنە زارداپ شەككەن قازاقستاندىق تۋريستەر تۋرالى اقپارات, سونداي-اق تۋروپەراتورلاردان شتاتتان تىس جاعدايلار تۋرالى حابارلامالار كەلىپ تۇسكەن جوق. قازىرگى تاڭدا فيليپپين اۋماعىندا قازاقستاننان بارعان تۋريستەر كوپ ەمەس. قر يدم تۋريزم يندۋسترياسى دەپارتامەنتى قر ءسىم-مەن بايلانىستا جانە جاعدايدى باقىلاپ وتىر», - دەپ جازدى تۋريزم يندۋسترياسى دەپارتامەنتىنىڭ باسشىسى م.يعالي.
دەپارتامەنت فيليپپيندە جۇرگەن قازاقستاندىقتارعا جەرگىلىكتى بيلىكتىڭ نۇسقاۋىن ورىنداپ, قاۋىپسىزدىك تالاپتارىن ساقتاۋعا كەڭەس بەرەدى.
ايتا كەتەيىك, 11 اقپان كۇنى تۇندە ءفيليپپيننىڭ وڭتۇستىگىندە ماگنيتۋداسى 6,7 بالدىق جەر سىلكىنىسى بولدى. سالدارىنان, 120-دان استام ادام جارالانعان, قازا تاپقاندار بار. الدىن الا مالىمەتتەرگە سۇيەنسەك, ءزىلزالادان سۋريگاو قالاسىندا بىرنەشە عيماراتتار قيراعان. تۇرعىن ۇيلەر مەن اۋەجايعا زيان كەلىپ, جارىقسىز قالدى. تسۋنامي قاۋپى تۋرالى اقپارات تاراعان جوق.