تۇركىمەنستان كونستيتۋتسياسى بويىنشا پرەزيدەنت – مەملەكەتتىڭ جانە اتقارۋشى بيلىكتىڭ باسشىسى. ەل تاۋەلسىزدىگىنىڭ, بەيتاراپتىعىنىڭ, تەرريتوريالىق تۇتاستىعىنىڭ كەپىلى.
تۇركىمەنستان پرەزيدەنتى تىكەلەي سايلاۋدا جەتى جىلعا سايلانادى جانە انت بەرگەن ساتتەن قىزمەتكە كىسىرەدى.
داۋىس بەرۋ قۇقىنا 18 جاسقا تولعان ەل ازاماتتارى يە. سوت شەشىمىمەن ىستەگەن ءىسى ءۇشىن زاڭ الدىندا جاۋاپكەرشىلىگى جوق دەپ تانىلعان ادامدار جانە تۇرمەدە جازاسىن وتەۋشىلەر سايلاۋعا قاتىسا المايدى.
تۇركىمەنستان پرەزيدەنتتىگىنە كانديدات رەتىندە تۇركىمەنستاندا تۋعان, جاسى 40-تان تومەن ەمەس, مەملەكەتتىك ءتىلدى بىلەتىن, سوڭعى 15 جىل بويى تۇركىمەنستاندا تۇرعان, مەملەكەتتىك ورگانداردا, قوعامدىق بىرلەستىكتەردە, كاسىپورىنداردا, مەكەمەلەردە جۇمىس ىستەگەن تۇركىمەنستان ازاماتىن ۇسىنۋعا بولادى (جاسى 70-تەن جوعارى بولماۋ كەرەك دەگەن بۇرىنعى شەكتەۋ 2016 جىلى قابىلدانعان جاڭا كونستيتۋتسيادان الىنىپ تاستالدى).
كانديداتتى ساياسي پارتيالار, قوعامدىق بىرلەستىكتەر ۇسىنادى. قۇرىلتايعا قاتىسۋشىلاردىڭ جارتىسىنان كوبىنىڭ داۋسىن جيناعان جاعدايدا ۇمىتكەر سايلاۋعا ۇسىنىلعان بولىپ سانالادى.
ازاماتتاردىڭ توبى ۇسىنعان جاعدايدا, كانديدات بولىپ تىركەلۋ ءۇشىن كەمىندە 10 مىڭ سايلاۋشىنىڭ قولى كەرەك.
ۇسىنۋ سايلاۋدان 60 كۇن بۇرىن ۇسىنىلىپ, سايلاۋعا 30 كۇن قالعاندا توقتاتىلادى.
كانديداتتارعا تەلە-راديوارنالاردان تەڭدەي ەفير ۋاقىتى (كۇنىنە كەمىندە ءبىر ساعات), باسپاسوزدەن بىردەي كولەمدە الاڭ بەرىلەدى.
داۋىس بەرۋ 07.00-دە باستالىپ, 19.00-دە اياقتالادى.
داۋىس بەرۋگە قاتىسقانداردىڭ جارتىسىنىڭ كوبىنە يە بولعان كانديدات جەڭگەن بولىپ سانالادى.
سايلاۋ كوميسسياسى سايلاۋدان كەيىنگى جەتى كۇن ىشىندە سايلاۋدىڭ قورىتىندىسىن شىعارىپ, حاتتاما تولتىرادى. سايلانعان پرەزيدەنتتى تىركەپ, وسى مەرزىم ىشىندە تۇرعىندارعا سايلاۋ ناتيجەسى تۋرالى اقپارات بەرەدى.
كانديداتتاردىڭ ەشقايسىسى جەڭە الماعان جاعدايدا نەگىزگى سايلاۋدان كەيىن ەكى اپتا ىشىندە ەڭ كوپ داۋىس جيناعان ەكى كانديدات اراسىندا سايلاۋ وتەدى.
تۇركىمەنستان پرەزيدەنتى ەل كونستيتۋتسياسىنا وڭ قولىن قويىپ انت بەرەدى.
سالتاناتتى جيىننىڭ توراعاسى, تۇركىمەنستاننىڭ بەس ءۋالاياتى جانە اشگاباتتىڭ اتىنان كەلگەن اقساقالدار مەملەكەت باسشىسىنا تۇركىمەنستان پرەزيدەنتىنىڭ كۋالىگىن جانە بەلگىسىن تابىستايدى. پرەزيدەنت ەكىنشى مەرزىمگە سايلانعان بولسا, پرەزيدەنت بەلگىسى قايتا تابىس ەتىلمەيدى.
يناۋگۋراتسيادا تۇركىمەنستان پرەزيدەنتى الدىنا اق كيىز توسەلەدى. پرەزيدەنتكە ءداستۇرلى تۇركىمەن ساچاگى (نان ورايتىن قاسيەتتى داستارحان), جەبە سالىنعان قورامساق, قۇران جانە رۋحناما تارتىلادى.
بۇدان كەيىن پرەزيدەنت تۇركىمەنستان ازاماتتارىنا ارناپ قىسقاشا ءسوز سويلەيدى.
ەرجان ءابدىامان, ريا "نوۆوستي" ماتەريالدارى بويىنشا