تۇركىمەنستانداعى پرەزيدەنت سايلاۋىنا جەرگىلىكتى ۋاقىت بويىنشا ساعات 11:00-گە دەيىن قاتىسۋشىلاردىڭ 51%-ى داۋىس بەردى. بۇل تۋرالى ريا «نوۆوستي» اقپارات اگەنتتىگى حابارلادى.
تۇركىمەنستان ورتالىق سايلاۋ كوميسسياسىنىڭ مالىمەتى بويىنشا, ۋچاسكەلەر اشىلعاننان كەيىن ءتورت ساعات ىشىندە داۋىس بەرۋگە 1 ميلليون 661 مىڭ 342 ادام قاتىستى.
ەڭ جوعارى كورسەتكىش احال ءۋالاياتىندا تىركەلگەن. مۇندا 11:00-گە دەيىن 58,77% داۋىس بەرۋشى قاتىستى. بالقان ءۋالاياتىندا – 51,52%, داشوعۇز ءۋالاياتىندا – 52,84%, لەباپ ءۋالاياتىندا – 51,90%, مارى ءۋالاياتىندا – 49,40%, اشحاباد قالاسىندا – 45,02%.
داۋىس بەرۋ جەرگىلىكتى ۋاقىت بويىنشا 07:00-دە باستالىپ, 19:00-گە دەيىن جالعاسادى. تۇركىمەنستاندا 2587 سايلاۋ ۋچاسكەسى جۇمىس ىستەيدى, ونىڭ 39-ى وزگە ەلدەردەگى ديپميسسياسىندا اشىلعان. سايلاۋشىلار تىزىمىنە 3 ميلليون 223 مىڭ 455 ادام ەنگىزىلگەن.