اياگوز دەگەن اياداي بۇلاق دەسەدى,
جۇرتتاردا قالعان جۇمباقتى كىمدەر شەشەدى.
اياگوز بولىپ عاسىرلار العا كوشەدى,
اياگوز – ايا, ارۋلار ەلى كەشەگى...
اقيىق اقىن مۇقاعالي ماقاتاەۆتى تەبىرەنتكەن ارۋلار ەلى, اقىندار ەلى اياگوزدە تاريحتان سىر شەرتەتىن ەسكەرتكىشتەر از ەمەس. قوس عاشىقتىڭ قۇرمەتىنە بوي كوتەرگەن ءبىر عانا «قوزى كورپەش-بايان سۇلۋ» مازارىنىڭ ءوزى نەگە تۇرادى؟! عاشىق دەمەكشى, اياگوز قالاسىنىڭ وزىندە جاستار ءجيى باس قوساتىن, تالاي بويجەتكەن مەن بوزبالانى تانىستىرعان, تابىستىرعان ادەمى ءبىر جەر بار. بۇل – شاعىن عانا شاھاردىڭ «7 كۆارتال» ايماعىندا ورنالاسقان 60 جىلدىق تاريحى بار التىباقان.
قالا تۇرعىندارىنىڭ ساعىنىسىپ باس قوساتىن شۋاقتى مەكەنىنە اينالعان التىباقاندى كىمدەردىڭ ورناتقانى بەلگىسىز. بەلگىلىسى, بۇل جەردەن ادام ارىلمايدى. قىسى-جازى. بالكىم, ەگدە جاندار جالىندى جاستىق شاعىن, بۇلا كۇندەرى مەن قۇلا تۇندەرىن ساعىناتىن, ىزدەيتىن بولار وسى جەردەن. ال جاستار اياگوزدىكتەردى 60 جىل بويى تەربەتىپ كەلە جاتقان التىباقاننىڭ تاريحىنا تامسانادى.
– بۇل التىباقان بىزدەر ءۇشىن تىم ىستىق. مەن 1960 جىلى اياگوز قالاسىندا دۇنيەگە كەلدىم. بالالىق, جاستىق شاعىمىز وسى التىباقاننىڭ ماڭايىندا ءوتتى. التىباقان كەيىن تاشكەنت قالاسىندا اسكەري بورىشىمدى وتەپ, جوعارى وقۋ ورنىندا ءبىلىم الىپ جۇرگەن كەزدەرىمدە دە جادىمنان ءبىر ءسات وشپەدى. ەندى قازىر مەنىڭ بالالارىم مەن نەمەرەلەرىم وسى جەرگە ءجيى كەلەدى. بۇل التىباقاندى جاستىق داۋرەنىمنىڭ مەنىمەن بىرگە تەربەلگەن شاقتارى دەپ بىلەمىن, – دەيدى وسىندا تۋىپ-وسكەن بەيسەن ەلۋباەۆ ەسىمدى ازامات.
P.S: قازاقتىڭ قابىرعالى قالامگەرى قابدەش ءجۇمادىلوۆتىڭ «سوڭعى كوش» رومانىنىڭ ءبىر تۇسىندا «قايران, التىباقان! تەاترى, وپەراسى, فيلارمونياسى جوق كوشپەلى ەلدىڭ كوڭىل اشارى بولعان التىباقان! كەڭ دالانى انمەن جاڭعىرتىپ, جاس جۇرەكتەردى ماحاببات بەسىگىندە تەربەتكەن التىباقان!» دەپ توگىلدىرە جازاتىنى بار. اياگوزدەگى التىباقان وسى جولداردى ەرىكسىز ەسكە ءتۇسىردى.
ازامات قاسىم,
«ەگەمەن قازاقستان»
سۋرەتتى تۇسىرگەن
بەرىكحان تايجىگىت